2.3.14



العزيزة سارة/

مساء الخير، يسعد مساءك وقلبك بكل التحيات الطيبة وصلوات الامتنان ...
متفهمينيش غلط.. في العادة مبيجليش نوبات فزع في وسط المترو، وفي أغلب نوبات فزعي مبشوفش شكل الناس اللي بيشوفوني بيبقى عامل ازاي لأن مفيش ناس بتشوفني.
ده كله كان قبل النهارده أقصد، مش عارفة ازاي ده حصل لكن خلينا نتفق إن دايماً فيه مرة أولى لكل شيء حتى لو القاعدة ديه بتتضمن الانهيار غصب عنك.

سارة الحلوة.. أنا مكنتش بعيط ولا بتنفس ولا حاسة بالتخبيط ولا بالناس..
أنا كنت بعيش كابوس فكرة مفزعة في دماغي تتابعت بأحداث مأساوية وصحيت فجأة لقيتك قاعدة جنبي على الأرض أُدام السلم بتاع المترو، رامية كتب نور عبد المجيد وهديل عبد السلام بتوعي جمبنا وبتخليني اتنفس جوا الشنطة البلاستيك واملاها هوا واتنفس تاني، كنتي بتملِّيني إمتى آخد نفس وإمتى أسيبه يطلع واركز مع الكيس وهو بيتنفخ ويفضى...مفهمتش عملتي ده ليه ، بس نجحتي، ومش عارفة الناس كانوا باصين لي بصة عجز كده ازاي.. حتى الولد اللي فضل واقف وكان نفسه يعمل حاجة كان مخضوض وأنا كان نفسي أقوله "أنا كويسة متخفش".. بس مقدرتش اتكلم .. 
من بين ده كله سمعتك أول ما اتكلمتي وأنتِ بتقوليلي بصيلي، كنت باصة في الأرض ومكنتش شايفاكي من الدموع الهيستيرية اللي غطت عينيا ...قلتيلي إن اسمك سارة وانك شغالة في مستشفى...-.مش فاكرة اسم المستشفى- وفي قسم القلب بالتحديد..(دلوقتي ممكن أخمن إنك غالباً بتشتغلي ملاك بيصلح قلوب الناس بالطبطبة عليهم من غير ما تلمسيهم)
كملتي وقلتيلي إن ديه panic attack.. إني محتاجة اتنفس وإنك هتطلبي الاسعاف لو حسيتيني مش قادرة أعمل ده لوحدي وجايز احتاج اكسجين بس، وبعدين طمنتيني إن الموضوع بسيط و كل حاجة هتبقى تمام..
كانوا أطول ربع ساعة في حياتي، وبعديها فضلتي هناك معايا ،قومتيني وفضلتي ماشية جمبي لحد ما ركبتيني تاكسي.. وطول السكة كنتِ بتتكلمي وبتحاولي تضحكيني..قلتيلي هتبقي كويسة وكلام كتير من ضمنه إنك مش هتقدري تيجي معايا بالتاكسي عشان لازم تروحي توزعي مصاصات على الولاد في المستشفى قبل ما يفضحوا الدنيا عشان اتأخرت عليهم.. ابتسمت بسرعة للفكرة فـ قولتيلي ايوا دي بداية كويسة المرة الجاية هتضحكي.

سارة، رغم كل اللي عملتيه أنتِ مسألتينيش اسمي ايه حتى!.. أنا اسمي رضوى.. رضوى اللي من غيرك كانت فضلت قاعدة على الأرض مش قادرة ترفع عينيها حتى تطلب مساعدة... واللي بتعيط قبل ما تنام عشان محدش قالها تصبحي على خير وباسها من راسها عشان يصالحها على العالم... رضوى اللي أول مرة تيجي تتنفس النهارده فتحس إنها بتتنفس فراغ مش هوا ...واللي مش متأكدة تشكرك ازاي لو مش هتلمح طيفك تاني فقررت تكتبك عشان متنساكيش وتفضل تفكر في الأطفال اللي لو موزعتيش عليهم المصاصات مش هيخفوا أبداً من وجعهم.

تصبحي على خير وحب وسلام...