قلبي مش خفيف، ولا تقيل... هو متخدر، بالظبط زي لحظة السكون المبدئية اللي بتحسها لما صباعك الصغير يتخبط في طرف الكومودينو.
أو كأنه محطوط في فريزر زي قالب التلج عشان يفضل متماسك...المشكلة مش في إني مش حاسة،
المشكلة إني مش عارفة أفهمك إني مش حاسّة.. .وده بيوجعك، بيحسسك إني Don't care, وبقصر في الكلام معاك بالذات
الموضوع مش شخصي.. مش شخصي تماماً.
..................
المشلكة الحقيقية إني كل ما ببص لي بفتكر آخر مرة وأنت بتقول عليا ببالغ.. وأغضب جوا نفسي والغضب يتحول لنقطة مايّة بتتبخر أول ما توصل لطرف شفايفي..
مينفعش تقول لبنت بتحبها إنها بتبالغ.. ده ضد كل مبادئ الجنتلة اللي في الكون بالإضافة إنك مينفعش تسيبها تنام زعلانة منك بس ده موضوع تاني مش هنتكلم فيه مش النهارده في الواقع مش هنفتحه تاني للأبد بالإضافة لمليون حاجة تانية...
مينفعش تقول لبنت بتحبها إنها بتبالغ.. ده ضد كل مبادئ الجنتلة اللي في الكون بالإضافة إنك مينفعش تسيبها تنام زعلانة منك بس ده موضوع تاني مش هنتكلم فيه مش النهارده في الواقع مش هنفتحه تاني للأبد بالإضافة لمليون حاجة تانية...
مش مشكلة خالص إنك مقولتش "أنا آسف" ولا مرة وأعتبرتني "ببالغ"
وفرت عليا جملة مكنتش هقولهالك وكانت هتوجعك وهتحسسني أحسن..(زي البنت اللي كسرت إزاز عربية الولد رغم كل حاجة عشان تفوّقه ويقل إحساسها بالعجز).
يا عزيزي..عاوزاك تفهم بس إن اللي بيبالغ هو اللي ممكن يسيب كل حاجة تقع من إيديه عشان يمسك في حاجة واحدة بس مش باقياله ومش هتطبطب عليه لما يتعب آخر اليوم .. يا عزيزي متفكرش تلعب في قلوب الناس وترجع تقول عليهم بيبالغوا، متسبش العمى يتملكك للدرجادي !
...................
شايفني وأنا لابسة فورمال وماسكة شوكة وسكينة؟ بتكرهني؟
آسفة.. بس حالياً المهم إني مكرهنيش.. المهم قلبي يفضل في تلاجته وأفضل بصحى كل يوم مش حاسة لايك كراب بخصوص نفسي واختياراتي وانتكاساتي الشخصية.. لو ديه اللعبة اللي هتخليني اتخطى الوقت الصعب لوحدي، فبقيت أستاذه فيها.
هتسأل طب وبعدين؟! هعمل ايه بعد ما الإحساس يرجع؟ معنديش أي ربع فكرة
متزعلشي...
.......................
"أنتِ لسه خدودك بتحمر!!"
من ساعة يوم الخميس الساعة 3 الضهر يا ميم.. من ساعتها بس .
........................
I'm so sorry i don't know how i feel about anything in life!
وده مش معناه إني مش بفرح لما بسمع صوت خلود أو بتجيلي رسالة مفاجئة أو لما النور بيقطع عند ميرو ونقعد نحضر أرواح.. أو وانا بجيب آي لاينر ملون وبخطط هلبس أنهي فستان على أنهي هييلز عشان أروح حفلة الأوبرا مع البنتين الحلوين .. أو لما بلاقي رسايل كتير بتقول إني شاطرة اوي في الشغل والاقي الناس مبسوطين بيا ونجحت في اللي بوظته الأسبوع اللي فات..أو لما بشوف فيلم حلو واقعد اعيط ادامه.. لما عمرو بيخرجني ويأكلني حاجات غريبة من شرق آسيا..لما افتكر أغنية بحبها تطلع في دماغي.. ولما بنام على سورة مريم عشان ديه الوحيدة اللي موجودة على الموبايل..ربنا بيبعت طبطبات كتير اوي وأنا بستقبلها حلو جداً ، متهيألي أنا كده لسه موصلتش لمرحلة soulless monster me .. متهيألي فيه أمل.
.........................
عارف الموضوع عامل زي إيه.. زي اختيارين، الاتنين أسوأ من بعض ، هديلك مثال واقعي وصريح
مثلاً لما رجعت من تمرين التنس اللي فات دراعي اليمين كان تعبان جداً من المضرب التقيل اللي لعبت بيه، من كتر التعب كنت حاسة إن إيدي اليمين بقت أكبر من الشمال ويحيى أخد فترة عشان يقنعني إن ديه هلاوس بصرية ..
وقتها كان قدامي اختيارين : إني أنام على إيدي الشمال مع العلم إني بعاني من صعوبة في التنفس وانا نايمة على جنبي الشمال.. أو اني استحمل وجع دراعي اليمين في مقابل إني اتنفس حلو.
وقتها كان قدامي اختيارين : إني أنام على إيدي الشمال مع العلم إني بعاني من صعوبة في التنفس وانا نايمة على جنبي الشمال.. أو اني استحمل وجع دراعي اليمين في مقابل إني اتنفس حلو.
الاتنين هيخلوني أواجه خساير أياً كان الاختيار.. فاخترت الأقل بؤساً وإرهاقاً بالنسبالي.
يمكن اللخسارة الأكبر إني كنت متأكدة إنك هتخذلني ولما خذلتني متفاجئتش برضه بس مستمرتش عادي! .. تو بي أونست مبقتش أحس التمثيليات الكدابة المكررة اللي ابطالها بيقلبوا الترابيزات على بعض عشان اللي بيتفرجوا ينبسطوا.. أنا البطلة وحاسة بالاشمئزاز من العبث المحيط.. عادي بقى!
...................
دايماً كنت فاكرة إن الناس طول ما هم على وعيّ باللي بيمروا بيه ده بيسهل الأمور.. بس مخدتش بالي إن العيان ممكن يبقى عنده إنكار لوقوعه في حالة الإنكار.. أو إنه بيتألم بس بيكابر.. أو مش عاوز اللي حواليه يشوفوه هَش تاني.. أو عاوز بقى لوحده عشان ده أسلم حل للوقت الحالي.. دايماً كنت فاكرة إن الوعي بيبسط الأمور.. ونسيت إن مفيش شواذ للقواعد دي حتى الدكاترة بيعيوا وبيكابروا عشان فاكرين نفسهم فاهمين الأعراض بالظبط والعلاج عارفينه وبينسوا وقتها إن مناعتنا كبشر -أياً كانت مسمى وظيفتنا وسواء متعلمين أو حتى جاهلين- لها حدود.
..................
حقيقة مطلقة : خايفة أواجه الكتابة واستبيح مشاعري قدام الناس، حتى لو المشاعر ديه مجمدة.
.......................
احنا مش مغفلين يا جوزفي لازم نتقبل الواقع ده مهما ساءت الأوضاع...
كنا بنحكي عن إننا بنمر بتجارب سودا وزي الزفت ...ومع هذا لمّا تعدي علينا أول نسمة هوا بتيجي الصبح بننسى كل حاجة ونقرر نتصالح مع العالم ويرجع عندنا إيمان بالناس وبالحاجات الحلوة ف الحياة.
عارف كام بنت في الكون بتعمل كده Every freakin' single day ؟!!
