شُدي عليكِ الجُرح وانتصبي*

تنويه : البوست شخصي للغاية وكئيب لحدٍ ما وخطه صغيَّر أصلاً.. لف وارجع تاني 

 ...

كل ما حُزن ييجي يُقطم حتّة من قلبك

متستغربش لمّا الفرح يبدأ يوجعك.

-العايدي-

.........................

في آخر اليوم وقفت لوحدي ببص للنجوم وبفكر .. لحد ما جت جمبي وسألتني :"راء زعلانة ليه؟"

قلتلها إني حاسة بوَحشة وإن معنديش حد أحكيله لمّا أروح ..حد أحكيله أد ايه الناس الموجودين دول حلوين وبحس معاهم بألفة ،و
إني كان نفسي جداً أطير طيارة وأتمشى شوية، وكمان أقول له إن مناقيش ياسين وعماد وحشة بس مقدرتش أقول كده وأكلت اتنين عشان أرفع معنوياتهم-اتضح لي إني مبحبش المناقيش غالباً-، عماد وياسين من فلسطين..ده فكرني بجدتي خالة بابا اللي عايشة مع ولادها هناك..وفكرني برضه بجدتي نفسها.. النهارده 12-2 ذكراها التامنة..مفتكرتش غير وأنا بكتب الكلام ده..

لحد دلوقتي فاكرة أحمد وهو داخل لي المدرسة عشان ياخد إذن ،كنت في تانية إعدادي.. ساعتها حسيت بالحزن لحد الغثيان، روّحنا فلبست البالطو الرمادي والهاي كول الكبير ورفعت شعري بشكل مزري بتوكة أستك بنفسجي..كل حاجة في ذاكرتي مشوشة ،في لحظة بفتكر شكلها وهي كويسة جداً اليوم اللي قبله، فجأة بلاقيني واقفة ادام باب عارفة اني لما أخبط عليه مش هلاقيها جواه..كان يوم وحش، من 8 سنين كنت حاساه نهاية الكون.. والنهارده أنا لسه صغيرة وعبيطة وبرضه برفع شعري وانا زعلانة..وبفتكر كل خبطة نهاية الكون.

لما كلمتني محكتش ليها ده كله .. مش فاكرة حكيت ايه بس هي بصت لي وعملت الايموشن اللي بيطلع لما بيكون نفسها تطبطب بيه على حد بس حاسة بالعجز وقالت لي: "إنه ميبقاش هنا أحسن ما يبقى هنا وأنتِ عارفة إنه برضه مش هيبقى موجود لما تحبي تحكي..وبعدين ليه مفيش حد تحكيله!! ممكن تحكي لميم عشان معرفش ييجي.. أو تحكيلي وأنا هعمل نفسي مجتش..أو تحكي في التقارير بتاعتك!"

أنا مش عارفة أنا بحكي لمين دلوقتي .. بس أنا بحكي وخلاص

 .............

بحب مصر القديمة بالليل.. بحب التاكسيهات اللي مشغلة فيروز وماشية بتكسر صوت السكوت وسط البيوت القديمة والمقابر.. غالباً سواقين التاكسي دول هيطلعوا حرامية وهيلفوا مصر كلها عشان يروحوا مشوار ميجيش 4 كيلومتر على بعضه.. بس اللف حلو مش هيفهم متعته اللي بيسوقوا ومش بيقدروا يتأملوا الطرق وبيفضلوا مركزين على المرايات والعربيات اللي قدامهم ..كنت بفكر جوا عقلي إن اللحظة ديه تستاهل ادفع كل الفلوس اللي معايا عشان تطول.. ودفعت فعلياً كل الفلوس اللي معايا بس اللحظة خلصت ماعدا صوت فيروز وهي بتقول "رجعت الشتوية" لسه مراحش.

.............

حُسام شافني الصبح.. سألني أنا كويسة ولا لأ.. لما مصدقش إجابتي.. سألني أنا حطيت مكياج امبارح أو أول؟..قلتله لأ ومقلتلوش اني مرضتش انزل من البيت ومرحتش اتنين ميتنج ولا حتى اعتذرت عنهم.. 

حُسام عارف إني لما بلبس كويس وبحط مكياج غير معتاد ببقى مكتئبة فشخ..بس عمرنا ما بنواجه بعض بالحقايق ديه.. عمرنا ما بنقول إني مكشوفة ووشي بيفضحني.. فبنلعب لعبة ؛ أنا بعمل نفسي بخبي، وهو بيعمل نفسه بيكشفني.. وكل مرة بنعيدها من غير ما نزهق :)

لما سرحت سألني على حاجة واتخضيت وقلت كلام عبيط..وزعل.. حسام زعل؟ أنا اللي زعلت؟مش فاكرة.

نسيت أقول له شكراً عشان بتحب تصورني عشان اضحك..ونشت أقول له شكراً على الصور اللي خدتهالي بالعافي ونسيت أقوله إني كلمته امبارح وموبايله كان مقفول.

.............

رُحت لعمرو الـ store بتاعه في آخر اليوم.. مشوار متأجل بقاله زمن.. عمرو مسموحله يحضني وسط الشارع وبيدعي إني بنته مع إنه أكبر مني ب 12 سنة بس! ..طلبنا Asian food وضحكنا على واقعة ال sweet chicken الأخيرة..اتفقنا إننا هنخرج ف date الأسبوع الجاي بعد ما حس إني مش كويسة..مبحبش حد يحاصرني عشان أحكي.. مش هحكي يا حبيبي متحاولش 

 كنت بحكيله عن البالطو أبو 2999 بعد خصم 50 % ..وبقوله إني تنحت للبياع وقلتله "ليه هو بيمشي لوحده؟!" وسيبتهوله ومشيت..بعدها خدني لفة في الاستور ووراني الكاتالوجات وبذل مجهود عشان يفهمني في الماركات وليه القميص اللي ب  350 الانجليزي.. مش شبه العادي بتاعنا اللي ب 100..اعتقد إنه هيحبط جداً لو اكتشف إني برضه مش مقتنعة .

لّما جيت أروّح ملقتش فلوس معايا لتاكسيهات تاني فركبت ميني باص.. الاتنين اللي قاعدين قدامي كانوا بيتكلموا عن الست المطلقة اللي هترفع قضية عشان تاخد من جوزها 300 جنيه زيادة نفقة عشان ولادها..ساعتها حسيت إني حقيرة اوي ومعنديش دم ولا إحساس بالعالم المنيّل ده.

.............

معلومات متفرقة: 

- خلصت 3 كتب النهارده.. الكتب حلوة طول ما هي مبترشش ملح على الوجع.

- مش بعترف باليوم اللي الناس بتكتشف فيه إن حواليهم ناس بيحبوهم.

- هسيب نفسي أقع دلوقتي عشان أعرف أقوم بعد كده..العالم قاسي لوحده مش طالبة البني آدم يقسى على نفسه.

- حتة في العمق نفسها اطلع غلط.. كل حاجة تانية بتقول إني صح.. الحتة اللي في العمق ديه سبب كل البلاوي :/

............

يحيى وياسمين بيروحوا النادي يلعبوا تنس.. يحيى قال لي كده ونسيت أقول له شكراً عشان فكرني بحاجة كنت بحبها اوي.. شكراً عشان طلعها في دماغي.. ونسيت أقول لنورهان اللي معرفهاش شكرا برضه عشان هي اللي اديته الدفعة الأولانية..الولاد دول خلوني أطلع المضرب من تاني :)

............

أي حاجة في الأول صعبة.. صعبة أوي.. بأعراض انسحابها ..إحساس الحزن وانت ماشي جارر وراك خيبة تقيلة..أحلامك بتتبخر.. صورة اللي بتحبهم بتتشوه.. ثقتك بتقع منك وروحك بتتسحب..الخوف بيلعب بأعصابك.. والفجوة بتكبر بينك وبين الناس.. تبدأ تفقد شغفك ورغبتك في الصحيان كل يوم..ولما تيجي تعيط قبل النوم تفتح الواتساب تكلم صحابك وتنام وأنت ماسكه يمكن تعرف تنام وسط الحكاوي..

عادي كل ده عدينا بيه قبل كده.. وفرحنا تاني.. وانبسطنا تاني والحياة مشيت.. 

الصبر الصبر بس..وربنا هيبعت الطبطبة وهيفرحنا بحق الوجع ده كله..

.........

* أغنية لأميمة الخليل