17.1.14

عن البنت اللي بتقول "اوي" أكتر من"صباح الخير"

.
.
.
بصوت راجف 
تهمس:
" الحب لا يصنعُ المعجزات
 هو، بحدِّ ذاته ، معجزة " 
 
......................

مرة كنت أعرف بنت..بتعرف تطبطب على قلوب الناس وتلمسها من غير ما توجع أبداً.
عندها ضحكة ممكن توقف حروب العالم وتحل السلام العالمي في 5 ثواني بالظبط..

جزء من روحها كان دايماً بيحكي عنه..هو وبس دايماً موجود.. كانت دايبة فيه زي الكراميل ما بيدوب في الشوكولاته..أيقونة فرحها الكبيرة "هو".. حافظة كلامه حرف حرف..حافظة تواريخه وبتدور على إنجازاته اللي تعرفها واللي متعرفهاش..كل طبطة هو ساكنها.. كل فرح متأجل هو معاها فيه..
إزاي تخطت فقده والوجع اللي كان ممكن يفضل ساكنها وبياكل جزء من روحها؟ هيفضل لغز غموضه أكبر من خطوط نازكا والموناليزا وبنا الأهرامات!

البنت ديه كان عندها قدرات لغوية خاصة.. يعني مثلاً تقدر تقول أي اسم وتحط بعديه "اوي" وبعدين تستخدمه كجملة مفيدة.. "راااء اوي".."ندى اووووي"..
ده دون ذكر "الله.. ديه فكرة حلوة اووووي"
وعندها قدرات سحرية بتعرفها كل واحد بيحب ايه وتعملهوله بكل بساطة.. فبتجيب لأسامة صن توب..وتحضن بسمة وتكتب لها جواب تحكيلها عن البنت اللي بتعزف كمانجا.. وتحب سارة من غير مناسبات..وتطبطب على آية وياسمين..وتحكي حواديت مع بنداري..وتدور على صبري أو حسام لما بيحصل ضرب عشان يتصرفوا.. وتقول "يا كيشووووووو" بطرق مبهجة للغاية..

طول ما أنت ماشي معاها هتلاقيها بتفكر في حد عشان تعمل له حاجة تفرحه..متستغربش.. هي كده فعلاً .. قادرة تعمل قنابل بهجة موقوتة لما الناس يبقوا extremely down

مبتعرفش تزعل أبداً.. حتى لمَّا العالم كان بخيل عليها كفايا وملقتش البلوفر النبيتي الطويل اللي كان نفسها فيه رغم إنها قلبت شارع قصر النيل.. متضايقتش منه وقررت تعمل Start up بلوفرات نبيتي بس !

أنا ممكن أحكي عن تفاصيلها ليوم الأربع الجاي ومذاكرش إلكترونكس.. بس حالياً يكفيني إنه
بسبب البنت ديه أنا قاعدة بسمع رق الحبيب ، باكل شوكولاته، وعينيا مدمعة بابتسامة حنينة زي اللي بتوزعهم لمَّا الدنيا بتقسى عليا ومش بعرف اتماسك وبتحضني فبعيط على كتفها بجد من تعبي ..

.......................

خلود.. أنتِ معجزتي اللي جت من غير ميعاد
أنتِ اللي خلتيني أفتكر إن ربنا بيأجل فرحتنا وبيخليها بعد تعب.. 
عشان نفرح "اوووووي"..

......................

خوخة
ربنا يحبك.. :)