السنة اللي فاتت كنت بتكلم مع صديق عن حوار كبير ما بين هو القلب اللي بيفكر ولا العقل- زي ما احنا عارفين- هو اللي بيقوم بالمهمة..؟
حِجّته الكبيرة كانت تجارب عملية بتقول إن فيه عمليات نقل قلب (من ناس عانوا مثلا من فقد أو اكتئاب قبل موتهم أو ماتوا في حوادث عربية أو نتيجة جرايم قتل وغيرها) ، لناس تانيين عمرهم ما مروا بالتجارب ديه..
فـ لقوا إن الناس الجداد اللي اتزرعلهم القلب الجديد بيوصفوا أحلام او تهيؤات شبيهة تماماً بالطريقة اللي مات بيها الناس الأولانيين أو بيمروا بنوبات اكتئاب وفزع مكنتش معتادة عليهم قبل القلب الجديد..
وفي جرايم القتل بعض الناس كانوا بيتمكنوا من وصف الشخص اللي قتل صاحب القلب اﻷساسي..وده كان شيء غريب جداً لأن العلماء بيتعاملوا مع القلب زيه زي أي عضو تاني ممكن يتنقل..
لما رجعت عشان أفهم الموضوع ده وتفسيره، دورت في حاجة اسمها "ذاكرة الخلايا" .. ووصلت في النهاية إن الجسم مش بينسى الذكريات اللي عقلنا حتى ممكن ينساها.. لا الحب ولا الكره ولا الخوف ولا الوجع ولا اللسعات..وده بيقول إنك لما بتلمس حاجة سخنة بدرجة معينة ذاكرة خلايا إيدك قبل عقلك ما ياخد آكشن هتعرف إنك هتتلسع..كل ده متسجل جواها..
عشان كده بسأل نفسي طول اليوم بفرض إننا تناسينا الوجع..
هل ده كله كفايا لنسيان الوجع اللي في قلبنا وروحنا واللي كل خلية مننا جربته؟
معرفش حقيقي.
