فضفضة مش أكتر

مدونتي العزيزة/بيتي/وطني الأوحد .. اعتذر بشدة عن تقصيري مع سيادتك وأنتِ سندي الأخير بعد ما بتقع من إيدي كل الحيل للتماسك والصمود أو التواجد ..الامتحانات بقى وأنتِ عارفة ..

ولهذا ده بوست إعتذار ثم رغي لأن ميم سألني ازاي منزلتش بوست للسنة الجديدة وحطيت فيه لحظات حلوة زي السنة اللي فاتت.. مهما كانت السنة بشعة أكيد فيها حاجات حلوة.. كان عندي امتحان قبليها بيوم ومش فاكرة كان امتحان ايه بس فاكرة إني كنت مسحولة مذاكرة وقاعدة بسمع نعناع الجنينة..دلوقتي هحتفل بإن المادة الجاية بعد 5 أيام وإن عندي ديدلاين بكرة هفكسله وهكتب للحفاظ على لياقتي.. وشكراً :)

.......................

ليه مبكتبش؟ عشان فيه حاجات مينفعش تتحكي..
زي وجع قلبي لما شوفت ميم تعبان امبارح..
كل اللي كان نفسي فيه لو إن عقلنا يتوصل بالبلوتوث..اسحب منه شوية وجع وأفكار وآخدهم أنا يمكن يحس أحسن.
زي إنك مينفعش تفضل تقول لحد إن ساعات الدنيا بتدينا ضهرها وبنتكسر اوي مر واحدة من غير أي استعداد ..
وإن الوجع ربنا دايماً بيبعته بطبطبة متبطنة من جوا عشان مننهارش..
بحس كده ومش شايفة أي سبب يدعو للصمود وميكونش مبتذل.

فيه حاجات مينفعش تتحكي..
زي مروة وهي بتقولي برضه مجبتيش مونتو أسود محترم تعزي بيه! هتقتنعي امتى إنك كبرتي!

زي الولد اللي أغمى عليه وجريت ناحيته بكل أنواع الشيكولاته اللي معايا وأول ما قربت كلهم زعقولي عشان عنده مرض ف المخ هو سبب الإغماء مش نقص سكر.. وأنا مش دكتورة فلازم أمشي من هنا دلوقتي !...

زي خلود وهي بتسألني قلتيلي كده ليه؟ فاكتشفت إني مكنش مفروض أقول.

زي لولو وهي بتقولي بهشاشة ازاي يعملوا فينا كده ..احنا مش ضدهم ولّا عشان مبقاش لينا ضهر؟
زي وحشتني اللي مقلتهاش عشان نفسك متتكسرش تاني ووحشتيني اللي مش هتجي تاني..

زي سعاد ماسي وهي بتقول "غاضتني عمري كي جت من عندك"
 

زي إنك مش عارف مفروض تحاول ولا لأ.. تحب ولا لأ.. تخاف ولا لأ ..ومحدش يقدر يقول لك حاجة في الموضوع ده ويساعدك.. أنت لوحدك.. لوحدك وبس والمشاعر مش بزراير ولا عمرها هتكون.

فيه حاجات مينفعش تتقال عشان بتتحس..وقت ما نحس الكلام عاجز..بنحس بس ونكتم غصة أو أكتر وننام.

........

يارب فرح قلوبهم
وعلمني أعرف أطبطب عليهم من غير ما أوجعهم 

وأسكت وقت ما الكلام بيكسر أكتر ما بيصلح.
..............

ولما يكون عندك اسبوع قبل الامتحان.. استحالة تذاكر أول يوم.. يبقى بكل بساطة تتأخر ف النوم.. تصحى الضهر تقرر عمل المهام المؤجلة لإشعار آخر ومحدش هقوم بيها بدالك عكس كل الـ Project & Time management بيقولوه عن ال Urgent and unnecessary tasks ..اللي الصح معاها إنك ترميها لحد غيرك يعملها، فبكل بساطة تتناسى إن الست هتيجي تنضف أول الأسبوع الجاي وتقلب الأوضة رأساً على عقب وبعدها تقعد تشرب قرفة باللبن فوق الحطام..وإنت فاتح الشباك على آخره عشان الشمس نورها يطول كل شبر حواليك..

....................... 

......................... 

بخاف شعري يقُع أكتر من إن أحمد أخويا يقرا مدونتي مثلاً.. ده بيفسر إني بقالي 3 شهور بصرف عليه بالهبل من ساعة ما مريم - الكوافيرة -  قالتلي إن الجنب الشمال شعري أخف فيه من الجمب اليمين وحسيت إن ده مؤشر خطير ونقلة حياتية عملاقة ومن هنا بدأت الرحلة .. لما حسبت الأدوية والسيرم والشامبو الأخير اللي لوحده ب 254 جنيه بس .. اكتشفت إن ماما مستحملة مني كتير أوي ومبتشتكيش بالعكس ديه بتزود هوسي وبتأكلني خيار - عشان فيه فيتامين A - أكثر مما ينبغي.. ومن هنا بدأت استوعب هوسي بحاجات كتير في حياتي.. أمي العزيزة .

..................

دراسياً .. السنة ديه صعبة وقاسية لأقصى مدى .. بكتشف يوم ورا التاني إن وجودي ف الكلية ديه دمر مَلكة الإبداع تماماً وحصرني في منطقة مش بتاعتي.. هعدي منها بس مش متأكدة لو كانت الحياة الحقيقية شبيهة بنفس الزنقة.. لأنها لو كده لازم أبدأ أشكك لو كنت عاوزة حياتي تكمل في المسار ده..

...................

خططتي بتبوظ حتى لو لا إرادياً فبتقمص.. ستوري أوف ماي لايف

خطة اللقاء العميق مع رضوى عند نرمين ماتت.. وبدالها فضلت أحكي طول اليوم عن الراجل اللي راكب BMW وشافني الصبح وأنا رايحة الامتحان حقيقي كان نفسي أفهم هو كان بيعاكس ولا بيتكلم بجد..! Anyways, I'm flattered

..................

صديقاتي الأعزاء مروة وسو (أصدقاء من الطفولة - وديه حاجة لا أرجحها.. لأن كل ما فترة معرفتك بتزيد بصحابك كل ما هيمسكوا مصايب عليك أكتر )

مروة بتقول إني بتأثر لما حد من صحابي يكون زعلان أكتر من الحد نفسه..وده بيفسر إن يوم ما جدتها توفت مجاتليش ولا سابتني أروح معاها رغم إلحاحي الشديد ،ولما فكرت تنزل من البيت كانت هتروح عن سو.. التفسير إن سو معندهاش دم أغلب الوقت وهتخليها تتماسك.. وأنا كنت هقعد جمبها أحضنها ونعيط سوا لحد ما أقول حاجة هبلة نفضل نضحك عليها لتاني يوم.. 

في نفس اليوم ميم قال لي إني قوية اوي رغم إنه أكتر حد عارف هشاشتي بس بيقول إني قوية اوي..فمكنش عندي فرص تانية غير إني أصدقه. أنا قوية يا ميم بس ضعيفة جداً ناحية اللي بحبهم.

...................

.....................

أرخم 3 مشاوير في التاريخ بالنسبالي:

دكتور السنان.

تجديد النضارة واللينسز.

 تدريب السواقة مع ماما.

.................

بكره الغباء البشري بشكل بشع..وبكره أكتر منه الصراحة اللي بتقلب بوقاحة.

وبكره لما حد يتدخل ف النص بين اتنين متخانقين .. بكره الصحاب ال over protective عشان لو حمايتهم تخطت حدودي وخرجت للناس التانية هتقلب بكوارث وكسور مش هنعرف نجبرها.

.................

واحدة صاحبتي اوي مقتنعة إن ذاكرتي ضعيفة وكنت هوديها في داهية مرتين بسبب الموضوع ده..

متهيألي لازم أخبي عليها إني روحت أجيب لينسز ونضارة جداد.. اخترت النضارة ونسيت احجزها وخدت اللينسز بس وروحت.. 

هو المساطيل أمثالي بيروحوا لدكتور ايه بالظبط؟

.............

تطورات حياتي وفي نفس الوقت إنعدام فترات كتابتي مثيرة للقلق، نومي الكتير والعسكرة في البيت مش حاجة طبيعية اوي..مقاطعتي لمواقع التواصل شيء مبالغ فيه.. ومع هذا أنا مرتاحة جداً في جزيرتي الخاصة ودماغي مبسوطة وونسانة بشكل لطيف فبلاش نكبر المواضيع..

God's will be done.

.