15.7.13

لا سلم / لا حرب


عزيزي ميم..

أنا عارفة إنك قاعد دلوقتي بتشتغل، عارفة إن 99% من يومك كده ، ولو مش بتشتغل يبقى بتفكر ازاي تخلي الشغل احسن، وعارفة إنك حاولت تساعدني النهارده..أو على الأقل منسيتنيش وسط زحمة يومك، وده بيأكد اعتقادي وتلكيكاتي بإنك مش عارف يعني ايه خذلان.
الخذلان يا ميم إن حد يكلمك يقول لك كل سنة وأنت طيب علشان عيد ميلادك.. وينساك باقي أيام السنة.
يكلمك عشان عاوز منك حاجة أو بيدور على حد مركون على الرف يسليه شوية وبعدين يركنه تاني.
الخذلان إنك تقع من تفكير حد مش بتبطل تفكر فيه.
الخذلان يعني كسرِة نفس غير منطقية.. ممكن تبرره تماماً بالمنطق أغلب الوقت .. بس المنطق ده مش بيقلل من إحساسك بإنك منسي ومرمي ف درج مقفول عشش فوقيه عنكبوت.
حقيقي جداً إنه مهم الناس تبقى هنا وأنت مبسوط وبتستمتع بانتصاراتك الصغيرة، بس الأهم إنهم يبقوا هنا عشان أنت مش كويس أو مش مبسوط ، مهم انك تحسهم بيعملوا حاجة عشان يخلوك وقتها أحسن، حتى لو بوقوفهم قدامك مبيعملوش حاجة غير انهم يبصولك أو حتى قعدتهم على الخط في التليفون وهما مبينطقوش بـ ولا كلمة. 
عارف كمان الناس اللي بتخاف يومها يتقفل ببشاعة؟ عارف إن أنا أحسن واحدة ممكن يومها يبقى ممتاز وتيجي على آخره تقع في الدرك الأسفل من الاكتئاب .

عموماً أنا مش كده اليومين دول ، انا في حالة من السلام ولأول مرة من مدة يبقى غير مشروط بظهور أي حد أو اختفاءه.. أنا معايا اوي وديه من اروع 3 حاجات في الكون.. بنزل انترفيوهات ، بخاف متقبلش ، بذاكر IQ tests اونلاين عشان خايفة اعدي كل ال phases واعُك بسبب الامتحان العبيط ده، بكلم اللي بحبهم وبشوفهم قدر الإمكان، بستنى الزحمة وبشحن طاقة ليها من دلوقتي ، بطلع كل يوم الرووف أطمن على الزرع وأجمع فُل فريش، أطمن ان بيتنا لسه بيبص على منظر حلو وإن الشجرة اللي تحت شباكي محدش قطعها ولا جيه جمبها..استنى الفطار والتراويح والفجر وعنيا تدمع في اعلان بيبسي..

تصور حتى إني بقيت من الناس اللي بتشغل الساوندكلاود وتسمع جدل بيغنوا وميتأثروش بيهم.. عادي يعني محستش إني عاوزة أعيط ولا بتنجان رغم إني من ساعة ما عرفتهم لأول مرة من كام شهر جدل بقت عندي فرقة مأساوية بينكشوا ف وجعك بمنكاش عملاق دون مراعاة لآداب الخصوصية.. 

معدتش خايفة من الخوف..طبيعي اخاف ومعرفش آخد نفسي ، اللي بيخاف بس هو اللي عنده حاجات كتير ممكن يخسرها، ومن خبرتك معايا في الشطرنج انت عارف اني مبضحيش.. مبحبش

أنا فخورة بيا اوي دلوقتي ، النهارده كنت فخورة فوق ما تتخيل ، كان لازم تشوفني ف الانترفيو العبيطة عشان تعرف إني مهندسة شاطرة وكويسة.. آه وآي سبيك إنجلش تو ، كما تعلم عني جيداً 

خلاصة الكلام..أنا فعلاً مش بستنى حاجة من الدنيا والكون اليومين دول 
تصبح على ملايكة يا ميم.. وشكراً عشان بتعرف تسمعني حتى وأنت مش موجود