11.2.13

Grow back down



حينما يباغتك الحنين 
فسمِ الله...وكُل تمرة.

تمرة واحدة لن تكفيك، فاستمر بالمحاولات حتى تنسى و ينساك الزمن
اليوم أسوأ من البارحة ، كل يوم يزداد سوء الوضع ، قرأت كتابين اليوم حتى أغير حالتي النفسية لا فائدة، ربما أخطأت حين تركت كل شيء، أصبت بانهيار داخلي مزلزل فلم أستطع مواجهة أشخاص لم يروني من قبل..وكشفني الآخرون ثم توافدت أسئلة : لا تبدين بخير ما الذي يجري؟ وكالعادة اتهرب منهم..لا شيء آخر يستحق الذكر

...........

أنا مش عاوزة اكتئب برضه ، لسه الحتة المنورة بتزُقني بعيد عن هناك ، لسه الحتة ديه بتبتسم كل ما بتسمع dancing queen وتفكر إن ميريل ستريب هنا عمرها 60 سنة ، بس روحها أصغر بكتير، نفسي ابقى زيها لما أكبر .. ميريل ستريب ديه عظيمة اوي.
عارف محتاجين ايه؟ تعويذة ديمنتورز، بس ديه في الواقع (مش في الروايات) بتتطلب فكرة مش ذكرى، الذكريات السعيدة بتوجع أحياناً عشان مش هتقدر تعيشها تاني، الأفكار هي اللي بتوقفنا وبتخلينا نكمل، فكرة واحدة قوية اوي هتخلينا تمام..
وبمناسبة الفيديو ده ، أحب أفكر نفسي وإياكم إني لازم أفضل بروح صغيرة لما أكبر..أحب أفكر نفسي إني لازم أعيش لآخر ثانية في عُمري بحاول أبقى أنا..

تعرف كمان إن كل حاجة حوالينا بتشع waves، لدرجة إنك لما حتى بتفكر في كدبة بتبعت موجات للي حواليك بتأثر على إشارات دماغهم ، لما بتبتسم بتأثر فيهم برضه، لما بتتكلم وروحك خفيفة بتبعت ده للناس، يعني كل شيء في الدنيا ، البوتجاز ، التكييف اللابتوب و الدبدوب بتاعي بيبعت waves بما إن كل الأجسام اللي في الكون أجسام سودا، وده بيفسر بالنسبالي فكرة الــ noise اللي بيقولوا انها حصلت من الــ big bang  وانا مقتنعتش اوي بالفكرة ديه ، متركزش اوي ده اسمه تفكير اتصالاتي بشع .. ولسه هدور في الموضوع ده ، بس الخلاصة يا عزيزي بحاول ابعتلك اشارات ايجابية من بعيد اوي، استقبلها بقى :) ،ومش مسامحة في فنجان القهوة بتاعي، باتمان بيشرب قهوة صح؟

.........

حاجات متهمش حد : غالبا لما بكون حاطة الهاند فري في وداني وبضحك فجأة ده معناه إني بكون بسمع سيلين ديون وبالتحديد وهي بتقول I finally cut my hair..i hear you say at last ، من يعنيه الأمر هيضحك برضه ، شكلي مختلف لما بشوفني وشعري طويل ، اعتقد ده بيتناسب مع مرحلتي الحياتية الجديدة ، وخليني اعترف أخيراً إن لونه أسود وأبطل اقنع سحر أنه مائل للاحمرار  ، مجبتش لسه بيجامة أحلامي ، وقررت آخد بنصيحة نيرمو واشتري قماش على مزاجي وديه هتكون مغامرة لطيفة جداً بالمناسبة ، كمان عاوزة ألعب بينج بونج في الكلية بس صحابي يحبطوا اسرائيل ذات نفسها من تحقيق مخططتها ، بفكر جدياً أقطع علاقتي بيهم (الحمد لله انهم مبيقروش المدونة)

اوكي أنا بدأت أهري حرفياً..

.........


أنا آسفة لكل حد كنت رخمة معاه النهارده ، آسفة عشان خلفت ميعاد وانا مش بعمل كده في العادي ، آسفة عشان انا مش حلوة وبطلوا تقولولي كده من غير سبب ،عشان بفتكر كل حاجة وحشة عملتها وبحس بالذنب ، بس ممكن لو عندكم أسباب وجيهة تقولولي إني حلوة وتقولولي السبب لما أسألكم ليه بتقولوا كده ، مش من باب رفع المعنويات فقط ، عشان مينفش يطولني الغرور ، قلة الثقة احسن بالنسبالي..وشكراً لحسن تعاونكم

بكرة هيبقى يوم أحسن إن شاء الله وهستغل الونس ونروح سوا مكان بحبه..ده كفايا عشان استنى بكرة ، صح؟

..

هناك 8 تعليقات:

إبـراهيم ... معـايــا يقول...

كلنا لازم نستنى بكرة يا راء ..

ولازم يفضل عندنا أمل .. عشان نعيش

والأمل ده مش هييجي إلا من جوانا

مش برفع روح معنوية ولا حاجة

بس فيه حقائق علمية لايجب إنكارها :)

Ahmed ElGaMmaL يقول...

:)

Ramy يقول...

ممممممممممممم

برغم عدم السعادة (تخفيف لفظى)هههههههه
اللى باين فى البوست (أعتقد انك أبتسمتى _ و اعتقد ان ابتسامتك زادت بعد ما قاريتى الأعتقاد الأول

انا كدة كفاية لو دة حصل


برغم انى عاوز اقول انى حاسس بكلامك بس دة مينفعش

عارفه ليه علشان كل واحد بيكون حزنه شيىء عزيز عليه برغم انه حزن و مش عاوز حد يوكن عنده نفس الحزن (انانية بقى) ايوة انانية حتى فى الحزن

الأنسان كدة عموما حتى لو بان عكس كدة

ارجو ان يكون مودك بقى احسن دلوقت (يا رب)
(:

معلش للفلسفة اللى ملهاش لازمة دى (:

تصبحى على سعادة دائمة

doaa elattar يقول...

تؤ ..

انتي مش وحشة إنتي حلوة وأنا بحبك :)

راء يقول...

إبراهيم

مهو الحقائق بتتبني على مشاهدات او تجارب..وانا معنديش حاجة م الاتنين

مبحبش حد يفهمني على اساس اني انسانة مش انا..!

راء يقول...

احمد الجمال

.....

:)

راء يقول...

رامي

عارف...بتيجي لحظة مبتحسش إن الحزن هو أكبر مشكلاتك ، فيه حاجات تانية وقعت منك ف السكة..

انا مش حزينة
ومش زعلانة من الدنيا

انا بس مستنية اللحظة اللي حاساه ده ينتهي

دمت بكل ود

راء يقول...

دعاء...


كم أحبك في الله :)