6.2.13

ريتك معايا


بيتها عُمره ما هيبقى بنفس الطعم ، حتى لو رَجعّنا الفازة القديمة وبدلنا الورد الميت بغيره جديد ، حتى لو صلحنا اللمبات المكسرة وحطينا بدالها لمبات دافية جديدة عمرها ما هتكون بنفس الدفا ، الدفا كان جاي منها هي مش من الضوء الأصفر الهادي اللي مالي الأوض  ، البيت حتى لو اشتريته بعد ما هي تمشي ، وخليته شبهي وعلقنا صورنا في كل حتة مش هيبقى بطعم وجودها ، حتى الكافيه عمره ما بيكون ليه نفس الطعم لو مش ميدو هو اللي موجود بياخدالطلبات وبينادي شرمب عشان ينام أو يشرب اللبن بعيد عن الزباين ، المكان عمره ما هيكون هو ومفيهوش قطط بتنط عليك عشان تدفى منك .
 الأماكن يا عزيزي مش بترتبط بينا هي بترتبط باللي عايشين فيها ، ولهذا عُمر ما الذكريات اللي هنعملها جديدة هتبقى زي القديمة.. مهما كانت مميزة هيفضل امبارح مليان ، بيهم مش بينا..


...............

-هو احنا ازاي نفهم الدنيا
-الدنيا مبتتفهمش ، مفيش حاجة اسمها كده أصلاً..

الأسئلة اللي ليها إجابات حتمية بتبقى ساذجة وملهاش طعم ، الحياة مش رياضة ، مش جمع وطرح ، مش نظريات ثابتة ، الثابت الوحيد في الكون هو إن ليه إله..
مين هو الإله ده؟ سؤال وجودي لو كان ليه جواب كنا كلنا هنعبده بدون اختلاف ديانات ، بدون ملحدين بدون شكوك أو قلق ، مليون سؤال في الكون ملهمش جواب وإجابتك أنت اللي بتحدد شخصك ، بتحدد اللي أنت مؤمن بيه ، بتحدد حياتك وبتخلي الناس تختلف ، عشان كل واحد فينا بيجاوب السؤال
بطريقته زي ما هو شايف الدنيا...

والحيرة مش بتمَوِت ، بتخليك تدور و بتخليك تمشي في كل مسار ممكن عشان تكتشف حاجات جديدة ..والهدف مش دايماًإنك توصل ، بس لو بصيت ع الرحلة ، أنت مخسرتش وعرفت أسئلة لإجابات غيرك كان نفسه يوصل لها ، حوشها في خلفية عقلك ولما ييجوا يسألوك عليها متنساش تحكيهالهم بضمير زي ما أتعلمتها ..

......

اللي اخترع الماسكارا والكُحل اخترعهم عشان اللي يفكر يعيط يخاف شكله يتحول لوحش مثير للشفقة وسط البني آدمين ، فيراجع نفسه وميعملش كده :)

أشكر صاحب تلك الاختراعات من أعماق أعماق أعماقي.

......

زمان كان عندي رغبة إن حد يكتب عني ، كنت بنبسط ، وكأني دخلت لبوابةالخلود من أوسع أبوابها ، دلوقتي الموضوع أختلف وبقيت كارهة فكرة إن حد
يكتب عني اوي..أنا مش حدوتة تتحكي ، البشر مش كده ، يمكن الكتابة ييجي عليها لحظة وتتحول لوجع قلب ، يمكن متبقاش حواديت بروعة الموقف أو ما شابه ، ده مش معناه إني هبطل أكتب عن الناس اللي في حياتي ، ومش معناه إني مش عاوزة حد يكتب عني ، بس خايفة الكلام اللي يتكتب عني في يوم يثبت في دماغي وممكن يكون غلط ، فاصدقه .. متكتبوش عن حد في لحظة غضب أو وأنتوا مش متأكدين بالظبط من اللي بيحصل ..ساعات الحروف بتكسر الناس زي الكلام بالظبط

...........

كانت بتحاول تفهمني إن البشر كائنات لعينة لا تستحق الثقة ، هي عارفة ده كويس ، هي أكبر وهي شافت ، سألت نفسي هو فعلاً فيه بني آدمين يستحقوا(متضمنة نفسي في السؤال ده)؟ وفضلت أدور أيام كتير مكنش عندي رغبة فيها إني أكلم حد لأن الحد ده ممكن يكون ميستحقش الثقة نظراً لأني
مجاوبتش السؤال ده لسه ،فـفضلت أدور لوحدي لحد ما أكتشفت إني مش لازم أكون مؤمنة ببشر أنا مؤمنة بأفكار البشر بيمثلوها بالنسبالي.

يعني لما أقولك وحشتني ، أفهم إن أنا مش مفتقداك كشخص ، أنا مفتقده الفكرة ، الفكرة اللي كانت "أنت" في يوم ، الفكرة اللي نفسي أفضل مؤمنة بيها لما لا نهاية
 والإجابة ديه كانت رغبةً مني في الإيمان إن العالم ليس بهذا السوء

شكراً اوي عشان أنت مكسرتنيش ، سبتلي مليون طريق مفتوح فلما واحد أتقفل ، أنا مموتش ، أنا لسه هنا ولسه عايشة ، وبعرف أبقى كويسة ، شكراً عشان خلتني أكتشف إن قلبي مينفعش ينكسر عشان حد ، ده بتاع ربنا مش بتاعي ، وبالتالي مينفعش نكسر أمانة هترجع في الآخر لصاحبها

.............

ريتك معايا تطوفي
وسط البشر والزحام تشوفي
حيرتي عليكي وخوفي
من ديه الآلام...*

ريتَك معايا ، تيجي لي ، ونكتشف العالم زقاق زقاق لحد ما نبقى عواجيز ،

ساعتها نرجع لأكتر مكان حسيناه دفا ونموت فيه ، واحنا مليانين حواديت بتضحك من كل مكان عدينا عليه وسيبنا فيه بصمة،
 فـ الناس يقولوا علينا بعد ما نموت : الله يرحمهم كانوا عواجيز آه بس دمهم زي السُكر ..

............

المجد كل المجد للبنات الجدعة اللي بيعتمد عليها في كل مكان في العالم..وأنا على رأس القائمة طبعاً ^^


........

*مسار إجباري (ترشيح من أميرة اللي ساكنة هنا :) )