8.2.13

جديلتين..



المهم إنك تبقى عاوز تكون مبسوط..مش أنت اللي علمتني كده ؟
لما سألتني من كام يوم أنتِ مكتئبة ليه..هو انتِ بتحبي تبقي مكتئبة؟ 
وفضلت تستفزني لحد ما قلت لك : لأ أنا عاوزة أبقى مبسوطة.
أقولك سر ،ساعتها أنا كنت غضبانة منك اوي...عشان حسستني إني كئيبة وروحي لونها رمادي  
ازاي ممكن البشر يشوفوني كده...ازاي أنتَ شوفتني كده؟
 وانا مؤمنة إن روحي قوس قزح ، ده مش عدل أبداً ، أنا روحي ملونة أيها الكون حتى لو قلبي مش كويس..

..............

شوفت اللي بيحصل في البلد تحت ظل الأخوان؟ شوفت أصلاً الناس وهما يائسين..الإسلام مش يأس..دول مش أفكار دول وشوش و شوية ناس ربنا العالم بيهم..

شوفت الناس وهي بتزعق لبعض من غير ما تفكر في الشوارع ؟ هما مش وحشين ، دول بس بيطلعوا طاقتهم السلبية في وش بعض ، وأنا بتفرج عليهم ، وبعيط من جوا اوي ، واعمل نفسي مش مهتمة ، اقرا الجرايد المرمية على ترابيزة السفرة كل يوم الصبح ومحدش شايفني كأني بنكر جريمة المعرفة ، عشان مش في ايدي حاجة اعملها ، واتجاهل كل حرف أكني مقرتهوش واقول اني مبتكلمش في السياسة، 

شايف العجز اللي أنا حاسة بيه والاحباط اللي بيشدني؟ هما مرتاحين ومطمنين عليا كده وأنا بعيدة عن السياسة  ووجع الدماغ ومش شايفين ان الدماغ مبتتغيرش بسهولة ، بحاول أريحهم على أد ما أقدر بلتزم بمواعيد رجوعي علشانهم وبكلمهم من وقت للتاني طول مانا بره عشان ميحسوش اني اتخطفت !..
طب شوفت اللي بيحصل في البنات؟ شوفت التحرش والاعتداءات المتكررة والجماعية !! هو أنا ممكن في يوم ابقى منهم؟ هما مش أقل مني في حاجة..
أقولك سر ، أنا مش بخاف في العادي بس أنا خايفة اوي ، خايفة انزل من البيت وخايفة اركب المترو او انزل الجامعة خايفة من كل واحد وواحدة بيخبطوا فيا بالغلط..خايفة وعاوزة اخرج من هنا ، عاوزة امشي ، المكان ده معدش يطاق..
 المكان ده مبيجبش غير الوجع زي أخباره اللي مبينشروش غيرها..



.............



هو ليه يارب ميم مش أخويا؟ ليه باباه مش اسمه طارق وجده يونس ؟ ليه يارب؟ انا عاوزة أخ زيه
وأوعدك اني مش هغلس عليه كتير وهبقى حنينة ، وهو كمان ممكن يوعد بإنه هيعزم عليا بالشيبسي بتاعه وهياكل معايا بيتزا لما اقول إني عاوزة آكل بيتزا..هنبقى أخوات كويسين جدا ، ده حتى لما آخده للأماكن السرية بتاعتي مش هيزهق، وهيستحمل الرغي بتاعي لما ببقى مكتئبة، لأ أنا اصلا مش هبقى مكتئبة وهو هنا (ده مش وعد بس ممكن)
هو احنا لو اعتكفنا 100 سنة في الصحرا وفضلنا ندعي انك تبقى أخويا..هينفع؟
خلينا نصدق إنه يمكن في حياة أخرى يبقى اسم باباك طارق ، يمكن يبقى عنوانك نفس عنواني ، ويمكن لما تبقى متضايق كده أعرف أعملك هوتشوكليت يفرحك...

معلشي ..هتبقى كويس :)



..............



- عرفتيني .. كده ؟
- آه
انت واحد ربنا بعته ليا..عشان يقول لي ان الدنيا كويسة ومش مفروض ابقى زعلانة دلوقتي..

أنت الأمل بتاعي آخر اليوم مش أنا اللي بمثل الأمل بالنسبالك ،أنت ورفقائك أسعدتوني بابتسامة مخفية وأنا ممتنة وآسفة عشان هخذلك ، أنا مش زي ما بتتخيلني ، أنا دايماً بخذل اللي بيحتاجوني اوي وبالتالي اللي بيحطوا فكرة مبدئية عني ، شايفني وأنا بعُك اهو؟ أصل البلوج ديه عاملة زي بيتي ومش دايماً بيتي بيبقى مترتب !
بس برضه ممتنة ليك وليهم..ومتهيألي أنا عاوزة اعرفكم اوي ..وانا مش بحس كده في العادي يعني ..شكراً جامد


............



أحلام مستغانمي...هو أنتِ ليه عملتِ فيا كده النهارده؟ 
تيتة...ممكن متموتيش قبليا؟
نرمين...ممكن تقري الجواب وتبعتيلي ادامه جواب تاني؟
رضوى...هو ممكن الناس تخف في يوم وأنتِ تفضلي عيانة؟


............


ربنا.......أنت عارف

وأنا...آسفة


هناك 3 تعليقات:

asmaa fathy يقول...

مبسوطه اني اول تعليق عندك

بس بجد البوست ده وجعنى اوووي

حسيته وحسيت انك بتتكلمى عننا كلنا كل المصريات

شوفت الناس وهي بتزعق لبعض من غير ما تفكر في الشوارع ؟ هما مش وحشين
والجزء ده حقيقي الناس من كتر الكبت اللي عندها بقوا بيتنرفزوا ويتعصبوا لاتفه الاسباب

ان شاء الله بكره يبقى احلي لان مصر تستاهل تبقى افضل

تحياتي لكِ ولقلمك ولمدونتك

Asmaa Fathy

faroukfahmy58 يقول...

رضوا
انها فعلا حكمة ( ظفرى الحزن جديلتين وارميه خلف ظهرك
وهنام مثل انجليزى غالبا ما كنت اسمعه وانا فى انجلترا
(let,s every problem behind you )
الفاروق

إبـراهيم ... معـايــا يقول...

ممممممممم .. طيِّب :)

جميلة قـوي برضو ..

مفيش فايدة :P