13.1.13

..


عاوزة أجيب فستان غالي اوي (اوي اوي يعني) لونه أبيض أو أسود ، لحد الرُكبة ، وألبس عليه كعب عالي..بس مش بيعمل صوت مبحبش الدوشة ، حتى وأنا عارفة إن محدش هيشوفني بيه ومش هطلع بيه برا الأوضة بتاعتي..
وعاوزة بيجاما ، عليها مهرجين صغيرين ، شبه البيجاما اللبني اللي كان عليها قُطط ،
 ماما مش فاكرة البيجاما ديه خالص مع إنها هي اللي كانت جايباهالي ، حاولت أفكرها كان شعري قصير جارسو وكنا في العيد الكبير..يمكن كان عندي 9 سنين..ازاي يعني مش فاكرة يا ماما ده اسمه كلام؟
 مروة بتخاف من المهرجين وده سبب أقوى للتمسك برغبتي
عاوزة أغسل شعري لما السخان يتصلح
وعاوزة اوي ابطل عياط ، بالذات لما سارة بتقول لي خليكي قوية ..
يمكن كان لازم اروح لها النهارده ونتنح
بس لأ مش هروح هتكسف ،هكلم الرقم اللي هي بعتتهولي واروح له بعد امتحان اللوجيك
بجد هتكلميه ؟؟
مش عارفة ، خايفة..
خايفة تطلعي كويسة ولا مش كويسة
....

لكني بحتاجلك ساعات..لما الشتا يدق البيبان...آه يا علي :(
بعد نوبة جديدة من البتاع ده اللي مش عارفة ابطله
ماما بتسألني أنتِ وشك أصفر ليه ، هو أنتِ عيانة ؟
تصدقي مش عارفة انا عيانة ولا ايه !!

مش عاوزة أكتب هنا ومفيش وقت أعمل مدونة جديدة ،
هنا معادش أمان زي زمان ، ولا هناك ولا في اي حتة
عاوزة عيلة كبيرة اوي وحد يحارب علشان يسعدني...وبيت وتلاجة فيها شوكولاته تويكس
مفروض أتخن صح؟ انا نزلت تحت الرينج الطبيعي كده ، اكيد الميزان بيستعبط حتى لو كان سليم من اسبوعين
سعاد ماسي....متتوصفش بكلام، محتاجة بوست لوحدها ، وانا بحل امتحان الفيزيا امبارح سمعتها بتغني في دماغي وسط صداع الحل ، بعز اوي الاغاني اللي بتظهرلي من اللامكان ديه..

أنا بحب الشتا متفهمنيش غلط هو مبيجبش اكتئاب في حد ذاته ، 
بس بكره الليل بتاع الشتا عشان طويل ومُتعب، وبكرهه لما بيخلي رجلي متجمدة، وإيدي في الامتحان بتزرق من كتر البرد ..

-احنا ناس مهندسين وعارفين إن السعادة Function of time وعمرك ما هتعيشي سعيدة للأبد..
-عارفة.. بس فيه اختيارات ساعات بناخدها ، بتحدد لنا مصيرنا في إن نكون مبسوطين أغلب الوقت،أو على الأقل أمان لما بنروح لها بنحس باستقرار وثبات لأن المشاكل جاية جاية حتى في أكتر الحاجات اللي مبنتمناش إنها تيجي فيها ، بس أقصد تبقى مبسوط بقراراتك فتعيش سعادة أبدية..

هو قال لي إنه مش هيساعدني أعمل اللي في دماغي عشان أنا كويسة ،
طب لو حكيتله إن المشكلة مش في اليوم ، المشكلة في الليل ،
لما كُل الأصوات بتسكت ومبيبقاش غير الأصوات الموسوسة اللي بتخوفك في كل ركن حواليك ، حتى في أفكارك...
طب لو حكيتله إن الوحدة معششة جوايا ممكن مثلاً وإني كل ما بقاوم مبعرفش أبطل عياط غصب عني وبالتالي مبعرفش أنام ،هيفتكرني بتدلع صح؟
طب لو قلت له إن هنا مبقاش أمان ، و مفيش حتت أمان في الكون أصلاً ...ممكن يقول لي طب وأنا ؟ لا هو مش هيسأل أصلاً


عاوزة أكلمك عن الولد اللطيف ، اللي شاف بنت قاعدة في الأوبرا على الرصيف وسط العربيات المركونة ،كانت مستخبية وبتعيط ، أو لأ مش مهم ...راح قعد جمبها واتكلم معاها ، عارف حد زي ده ممكن يحسسها ايه؟ ان الدنيا كويسة... انها تستحق...وانها مفروض تبتسم دلوقتي..
الولد اللطيف قام واختفى بعديها وهو سايب علامة حلوة ، الولد اللطيف هيفضل في ذاكرتها للأبد على إنه الوحيد اللي مخذلهاش ، عشان شافته مرة واحدة بس في حياتها في وقت أكيد مكنش يعرف إن روحها مشروخة فيه ..

وعاوزة اكلمك عن البنت اللطيفة اللي مبتعرفش تقول اللي هي عاوزاه بالظبط ، واللي نفسها تصدق ان فيه ناس مش بتخذلها لسه ، حتى الولد اللطيف ..ونفسها تسيب كل حاجة وتهرب ، بس مش لاقية مكان تهرب فيه ..نفسها تعرف تقرا قرآن فترتاح وتنام كويس ، ونفسها الحلم بتاع امبارح يتحقق...اه وعاوزة بيجاما وفستان قصير نُص نُص..