تعب..

عادي لما تزهق من كُتر الانتظار ، وعادي لما برضه مفيش حاجة تيجي

عادي لما تكتشف إنك صُغير وهتفضل طول عمرك كده

ولما تقرر تكبر لمدة يوم ، تعمل حاجات لناس ومتقولهمش إنك أنت اللي عملتها ، عشان مش عاوز رد ، عاوزهم يدعولك وهما فاكرين إنك مش موجود .

وعشان أنت كبير فاشتغلت بجهد كبير لحد ما تعبت وفي النهاية خلص اليوم و كنت لوحدك..

بتسأل نفسك ليه المفروض الشمع يحترق لأجل الآخرين ، عشان ينور لهم السكة ، وليه الآخرين مقدرهوش كفايا.. 

 

ففجأة تكتشف إنك مفتقد حاجات كتير اوي في حياتك ، 

زي إن حد يسأل عليك وقت ما اليوم يخلص أو حد يفتكرك وسط زحمة يومه ، 

أو حتى يدعيلك بظهر الغيب..

وفجأة  تكتشف إنك تعبت..فتنام ، وتختفي من العالم وتقرر إنك مش ضروري تهتم النهارده بحد غيرك

مش هتجري على صحابك وتشوف أخبارهم وتحل مشاكلهم النهارده ، عشان أنت مُرهق..

ولحد ما التعب يخلص و لحد ما شرخ الروح يلتأم ..مش هتفكر تستنى أي حاجة ولا أي شخص ، 

مش هتاخد بالك من آخرين في حين إن محدش بياخد باله منك .

أنتَ أولى بيك دلوقتي ، وده الوقت عشان تفتكر أمجاد إنك تكون مع نفسك وبس وتنسلخ من الآخرين...

..............

ثم تفتكر سارة وهي بتقولك يوم البُكا العالمي  

-رضوى ربنا كبير اوي ومش بيسيبنا..

فارد عليها قبل استكمال وصلة البكا اللا إرادي وأقولها :

-اوي اوي... 

ونسكت..

.............

هند مُسلم ، سارة دراز.. وحشتوني اوي

شيماء علي...شكراً جداً