بوست خاص للغاية ،، ملوش لزمة في التاريخ للأشخاص العامة
(هي الفضفضة لما بتزن على دماغك وتحس إن رغبة الرغي تتسلل بين ثنايا عقلك ، وإنك مفتقد التفاعلات البشرية فبتكتب كده
، بتكتب وبتقفل التعليقات عشان معرفة ان فيه ناس هتقرا الكلام ومش هتعرف تعلق ومش هتفهم أغلبه...بصراحة مريحة نفسياً)
ريتا خوري كانت بتكتب في كذا مدونة وهي مخبية هويتها الحقيقية بعيد عن أضواء الشهرة ودوشة الشغل والناس ،لحد ما تم اكتشاف هويتها وسقطت رات وظهرت ريتا، فقفلت المدونة وعملت مدونة تانية سرية وهكذا، وأخيراً طلعت كتاب فيه تدوينات من المدونات السرية ديه ، كذلك نرمين نزار ، ولما صحابها عرفوها وكشفوا هويتها وحرموها من حرية البوح قالت جملتها الشهيرة المختومة بــ يلعن أبوكو بجد !
ساعات بحس إني بعمل زيهم ، بخبيني من كل الدوشة من العالم الواقعي ومن حياتي بجد عشان أهرب هنا ، هنا مش ببقى راء اللي مفروض تكون راء ، مش ببقى الحد اللي لازم يبقى قوي طول الوقت عشان بطبعه عنيد وعشان استحالة يبين ضعفه أو مشاكله أو يفتح أسراره على العالم الفسيح وبيختص الحكي لأشخاص قليلين ممكن يفهموه
في العالم الواقعي أنا حتى مبقولش نص الكومينتات اللي بتدور جوا عقلي بصوت عالي !
هنا ببقى أنا أنا ، مش اللي المفروض تبقى أنا.
عشان كده شيلت لينك المدونة من الفيسبوك من زمان ، لمنع المتطفلين اللي بيحاولوا يرضوا فضولهم ويفضلوا يسألوك عنك،وبيحاولوا بيعرفوا توو ماتش من هنا دون وضع اعتبار لخطوطي الحمراء والبنفسجي، وشيلتها عشان خاصة إني شخص قليل الثقة في الناس، بالإضافة لأن ديه مساحة البوح بتاعتي اللي بفرغ فيها لما مبلاقيش صحاب ومبلاقيش حد ، لما بلاقي رغي كتير بيحاول يطلع بأي شكل وتعليقات جوا دماغي، هنا مش بكتب عن الهم العام ،مش بكتب في السياسة ولا الدين ولا الحرب ولا الدم ، ديه مش لا مبالاة ، لكن فيه أماكن كتير مختصة بالموضوعات ديه ،هنا بكتبني علشان متوهش مني في وسط زحمة الدنيا ،
ولو حصل لاقدر الله أرجع أقراني فالاقيني ..
.......................................
بما إني أنا (الكبيرة) و(كدابة جدا) ووعدت (في لحظة جنون) بمفاجأة (متأخرة حبة ) :P
مش هتكلم عن الناس التانيين ولا عن اللي بتعمله ليهم ، ورغم إنك بتبث روح مختلفة بمجرد وجودك في المكان ، فانا مش هتكلم عن الأماكن، ولا عن إخلاصك أو جديتك أو تميزك واختلافك و (فُضولك) ودماغك اللي لسه مطلعتش اللي جواها كله (أنا أصلاً مش فضولية) ،أنا هنا بتكلم عني وبس .
رغم إن بداياتنا لم تكن موفقة تماماً ( أنا فاكره انها من المرات القليلة اللي حكمت على ناس من غير ما اعرفها فعلياً) بس بعد ما اشتغلت واتعاملت معاك مباشرة غيرت وجهة نظري ، وبقيت من الشخصيات اللي بتبعت لي إشارات إيجابية في أسوأ الظروف كأنها نازلة من السما، وأصبحت كائن مثير (للـ وَنَس) بالنسبالي ومن اللي بييجوا في بالي مباشرة بعد أي موقف مُحبط وأبدأ أفكر (يا ترى كان هيقول لي ايه؟ )
مش هطول في الكلام ، ولا هقول أد ايه ممتنة إني عرفتك ،ولا هعترف بكلام أكيد كتير بيقولوهولك .
عزيزي ميم..
كل سنة وأنت رائع،
كل سنة وأنت بتفكرني آخد نية قبل كل خطوة مهمة في حياتي،
كل سنة وأنت بتسأل عليا لما بتحس بأي مشكلة عندي،وبتدخل البلوج من ورايا (وأنا مكنتش عارفة :P )
كل سنة وأنت بتنور طريق ناس كتير،
كل سنة وأنت بتحيي أُمتك في كل خطوة على طريقك،
باختصار بالمعنى الضمني والحرفي والمعنوي ، الـ لامنطقي والمنطقي
"كل سنة وأنت عظيم "
..........................
