22.12.12

نسبية


حينما يسرق أحدهم فولدر التمبلر بتاعك
مش هنحتاس ومنلاقيش صور للبوست الجديد ، 
فشر ، ده احنا جامدين جداً :D
............

لو هقتل كل حد يعرف Too much عني
يبقى النهارده على أقل تقدير كان لازم أقتل شخصين ، اللي بعت الجواب وقرأ النوتبوك ، واللي قرأ الجواب المبعوت وكمان النوتبوك
المضحك في الأمر ، إن دول أكتر اتنين في الكون بيحبوني ، ولأني قررت أبقى شخص أحسن من مدة فأنا معنديش نوايا دموية لقتلهم ، فقررت أتصالح معاهم ،الأولاني أكبر بتاع 20 سنة كمان وأصاحبه ، وأنا بعرف كويس أوي اتعامل معاه (إلا لما بيستنصح) ، أما عن الآخر فده ليه حدوتة طويلة ... والديدلاين لكتابة البوست ده 10 دقايق فممكن نحكيها في بوستات قادمة :)

................

النهارده أكتشفت بطريقة ما لا تتضمن مواقف حصلت معايا انما خبرات تراكمية ، إن مفيش علاقة في الدنيا فاشلة ، الموضوع كله متعلق بالدماغ ، لو ماشية مع اللي ادامك ولا لأ ، وده مش معناه إن ممكن علاقة تبوظ عشان اتنين دماغهم مش واحدة ، تؤ تؤ نيفر ، اللي عاوز يصلح حاجة بيصلحها واللي عاوز يعمل حاجة مستحيلة لازم يشغل عقله شوية صغيرين ويبذل مجهود عشان دماغه توصل للحد التاني ، يدور على طريقة تواصل ملائمة ، زي الجوابات مثلاً ، ده شيء لطيف جداً ، باعث على البكاء كثيراً ، ويعتبر دليل مادي في أحياناً كثيرة ، بس....بينجح

عندي إحساس اني ممكن أنافس جون جراي في هذه اللحظة ،بس فيه حد سبقني وعمل كتاب النساء من بولاق والرجال من معرفش فين (لسه مقرتهوش) ... هبقى أحسن من جون جراي في يوم

...............

رسالة مهمة :
 بطل تفكر كتير ازاي ممكن تبقى عظيم ، أمشِ وهتلاقي طريقك بيدلك على هناك لأن بصراحة ، ملكش مكان مع الناس العادية.

.............

لو البوست هيبقى طويل يبقى كان لازم أتكلم عن ناس كتير ،عن باريس وأحلام والــدفا...(تنهييييييييييدة) ، بس مفيش وقت يبقى البوست طويل وأنا مش عاوزة أقول هري ملوش لازمة ، مع إن اللي فوق ده يعتبر كذلك :)

امبارح مكنتش بدور على السعادة ولا النهارده حتى ، كل همي كان الحصول على منطقة راحة منزوعة الألم ، عارف يعني ازاي ، يعني ترمي كل حاجة بتخوف لما حد يقعد يكررلك إنك مش هتخاف ، يعني تقضي ربع ساعة نايم على كتف حد وتولع في الموبايل لو حد رن عشان يدمر اللحظة وعاوز تمسك فيها بأي تمن منتاش عاوز تتحرك من هنا ، 
هناك كانت منطقة راحتي مع الناس ديه ، هناك كان ممكن أقعد مليون سنة ومزهقش ،هناك....مش هنساه ابداً وهيتكتب عنه مليون حاجة وحاجة.

..................

أقولك سر عن راء ، راء قوية اوي ، مع إن بيبان عليها لما بتكون مش تمام ، بتقدر تقف على رجلها لو بس حد أوحالها مجرد الإيحاء إن كل حاجة تمام ، راء ديه حلوة ..أنا مصالحاها ، ومش مشفقة عليها خالص ، مع إنها غالباً لما بتطلب المساعدة وبتكون صريحة وبتطلع كل اللي جواها لحد بتحس انها مثيرة للشفقة ، ده محصلش النهارده ، والنهارده ، جتلها هدية مفاجأة ، آخر ايشيو في آخر عدد من مجلة احنا ! النهارده فوتت محطتها عشان كانت بتتصفح المجلة وبتشتم في ولاد الايه بتوع الانترفيوز ، 
النهارده لأول مرة في حياتها كانت مرتاحة كما لم تكن ومبسوطة فعلياً ، ولو بإيديها كانت كملت حياتها في اليوم ده ، اللعنة على نسبية أينشتين اللي بتخلي اللحظات الحلوة تتبخر...

....................
تصبحوا على دفا ، دفاكم :)

هناك 5 تعليقات:

Nour يقول...

على ذكر النوتبوك لسه كنت هكتب حاجة عنها .. بسيتها يوم الجمعة في مكان ماينفعش تتنسي فيه ولا ينفع حد يقرا اللي فيها بس الحمد لله لحقت نفسي :D

اقولك سر عن نور .. نور زهقت من تمثيل القوية

تصبحي على امل :))

راء يقول...

نور ,,


ديه الحاجة الوحيدة اللي مينفعش حرفياً نزهق منها ، الحياة صعبة اوي ، والبنات اقوى مخلوقات خلقها ربنا على عكس الاعتقادات السائدة في المجتمع بتاعنا ، منتيش ضعيفة ، بس ليكي الحق في الانهيار ادام ناس معينين بتثقي فيهم احيانا وتبقي موقنة في اللحظة ديه انك برضه قوية :)

صباحك منور يا نور

raef ayman يقول...

Fantastic

راء يقول...

رائف ...

شكرا بس ع فكرة ديه مش بتاعت اينشتين :)

raef ayman يقول...

3arf ya fandam :D