21.12.12

كل شي عم يخلص


تخيل إنك صحيت في يوم ، مفيش صداع
مفيش دوشة جوا دماغك ، مفيش براكين مستعدة تنفجر وتدمرك أو تدمر اللي حواليك .

تخيل إن اللي بتحبهم موجودين حواليك بجد ، مش مجرد ريحتهم اللي مخلياك تحلم بيهم طول اليوم.

تخيل إن الحلم بتاع أول امبارح حقيقة
الحلم اللي محكتهوش لحد.

تخيل إنك مش مكشوف وبردان ،
وإن عندك مساحتك الخاصة محفوظة في أمان 
منتاش محتاج تخبيها تحت الهدوم في أعماق أعماق الدواليب عشان محدش يشوفها..تاني !

تخيل إن اللي بتحبه هنا ، هنا لوحده ، والناس التانيين كلهم مجرد هلاوس أو ثقوب سودا.

إنه هنا رغم إن كل حاجة مش كويسة 
وهياخد باله منك كويس اوووي .. 
يعني هيدفيك ، هيسيبك تنهار 
هيسمحلك ترمي رداء القوة اللي موقفك على رجليك لحد اللحظة ديه ، وتقول كل الكلام اللي كاتمه و الحقايق اللي بتزلزلك ،
هيسيبك تعيط لحد ما تخلص دموع 5 سنين أدام ،
وهيقومك في الوقت المناسب عشان متخسرش مستقبلك وحياتك وترجع تندم.

هيقولك إن كل حاجة كويسة وهيعمل لك كل حاجة بتطمن فهتصدقه لأنه ببساطة مبيكدبش عليك،
هيسألك أنت سقعان اوي كده ليه وهيمسك ايديك يحطها في جيبه وأنت مستسلم تماماً.
هيقرالك بصوته كتاب أحلام الجديد أو شوية من كلام درويش،
عقلك مش هيبقى فاهم الكلام اللي بيقوله فعلياً ومع ذلك هتوقفه في نص قرايته.
هيفتكرك وقفته عشان تفكر في جملة ، بس الحقيقة انت وقفته عشان تخزن صوته أكتر في مساحة جوا ذاكرتك.

ولما يسألك نفسك في ايه دلوقتي ؟ تقوله..

نفسي في يوم خارج نطاق الزمن، الدنيا بتمطر، والبرد مالي المكان، ووسط البلد  تبقى موجودة في اسكندرية وكمان على البحر،
مفيش بشر، أنا وأنت بعيداً عن الغباء البشري ،زي فيلم صامت ملون ألوان قديمة مش بكاميرات HD وألوان صارخة ، مش هنتكلم خالص ، بس هنقول كل حاجة ، وهنفهم إن الشتا عمره ما بيكون ساقعة وأنتَ مع اللي بتحبهم ..

بس توصل إزاي للي بتحبهم دول ، هو ده السؤال.

................

*العنوان أغنية ماجدة الرومي

هناك 15 تعليقًا:

sara adel draz يقول...

هييجى اليوم اللى هيتحقق فيه كل دا

زى ما جه اليوم اللى شوفتى نفسك فيه بشموهندزة قد الدنيا

وجه اليوم اللى شوفتى فيه نرمين نزار

وجه اليوم اللى قابلتى فيه د. عبد المنعم أبو الفتوح

وجه اليوم اللى اتكلمتى فيه قدام بتوع اليونسكو فى مدرستك الاعدادية

وجه اليوم اللى اتقابلنا فيه

..

ربنا كريم اوى وبيحبنا اوى متقلقيش :)

راء يقول...

الحمد لله يا سارة

طب هو مش نظرياً النهارده نهاية العالم ، يعني انا عاوزاه ييجي النهارده؟ كتير كده صح؟ ما انا عارفة :) بس يمكن محتاجاه النهارده

Mohammed Keblawy يقول...

جميلة حتة اسكندرية الابيض واسود دى ...


مدونتك رائعة ..

Nour يقول...

ويبقى للحلم طعم اخر :))

راء يقول...

Mohammed Keblawy

متشكرة جداً يافندم ، نورت :)

راء يقول...

Nour

واحنا لينا ايه غير شوية أحلام :)

انبسطت بمرورك

باسنت خطاب يقول...

إنه هنا رغم إن كل حاجة مش كويسة
وهياخد باله منك كويس اوووي ..
يعني هيدفيك ، هيسيبك تنهار
هيسمحلك ترمي رداء القوة اللي موقفك على رجليك لحد اللحظة ديه ، وتقول كل الكلام اللي كاتمه و الحقايق اللي بتزلزلك ،
هيسيبك تعيط لحد ما تخلص دموع 5 سنين أدام ،
وهيقومك في الوقت المناسب عشان متخسرش مستقبلك وحياتك وترجع تندم.



وجعتيلى قلبى يا رضوى !!
اوى :(

راء يقول...

باسنت...

مقصدتش ، بس واضح انه مطلب جماهيري :)
ربنا يطبطب على قلبك

حبات التوت يقول...

الكلام كلة طالع من القلب ومليان احاسيس
بس صدمنى فى اخر جملة ((بس توصل إزاي للي بتحبهم دول ، هو ده السؤال. ))
اللى مهتم بحد وبيحبة يروح يقولة اللى فى قلبة سواء عتاب او حب او حتى شتيمة اما انك تعقد ايدك على خد وتقول ازاى يبقى خليك قاعد

(انه هنا رغم إن كل حاجة مش كويسة
وهياخد باله منك كويس اوووي ..
يعني هيدفيك ، هيسيبك تنهار هيسمحلك ترمي رداء القوة اللي موقفك على رجليك لحد اللحظة ديه ، وتقول كل الكلام اللي كاتمه و الحقايق اللي بتزلزلك ، هيسيبك تعيط لحد ما تخلص دموع 5 سنين أدام ، وهيقومك في الوقت المناسب عشان متخسرش مستقبلك وحياتك وترجع تندم.) رائعة بجد

ويلا

راء يقول...

حبات التوت ، أنتِ صح يافندم :)

نورتِ

Lobna Ahmed يقول...

مفيش حاجة بتخلص يا راء

راء يقول...

للأسف يا لُبنى...

إبـراهيم ... معـايــا يقول...

أنا قلت أعدي لي تدوينتين تلاتة أربعة .. عشرة ...


وأقف كده عند واحدة بعينها :)
.
يعني أنا دلوقتي لو اعتبرت إن دي كتابة عادية .. أو مجرد عبث :)


يبقى مش عاوز إلا ده بالضبط


يسلم إحساسك يا رضوى

إبـراهيم ... معـايــا يقول...

أنا قلت أعدي لي تدوينتين تلاتة أربعة .. عشرة ...


وأقف كده عند واحدة بعينها :)
.
يعني أنا دلوقتي لو اعتبرت إن دي كتابة عادية .. أو مجرد عبث :)


يبقى مش عاوز إلا ده بالضبط


يسلم إحساسك يا رضوى

راء يقول...

ابراهيم...


لا تزال بتحرجني :)