21.11.12

من القلب



فاكر وانت صغير؟
مش هعرف أحكيلك عنك وأنت صغير عشان زي ما أنت عارف أنا الصغيرة !
بس أنا فاكرة كويس اوي
أول مرة قررنا نعمل فيها كيكة من ورا ماما ، كنا لوحدنا في الشقة ،عملنا عجينة فظيعة واتخانقنا عشان أنا بحبها  بالشوكولا وأنت بتحبها بالفانيليا ، لحد ما اقنعتني إننا لو حطينا كاكاو هتبقى بني زي ما بحبها ، وفاكرة اننا في الآخر حطينا العجينة في شنطة لونها أزرق ورميناها في سلة الزبالة اللي على أول الشارع عشان محدش يكتشف الجريمة ديه.

فاكر طيب أول مرة في حياتي أنضرب فيها بسببك بالقلم عشان أنت كدبت ؟ ساعتها أخدت قلمين محترمين من سحر
بغض النظر عن إني كنت صغيرة اووووي بس فاكراها كويس لأني متضربتش بالقلم في حياتي ومتظلمتش زي المرة ديه ، المهم إنك اعترفت- لما صعب عليك شكلي- إنك أنت السبب وماما فضلت تصالح فيا وحطيت مرهم ساعتها وأنت طبطبت عليا !! (مش فاكراك طبطبت عليا بعدها بحنان كده)

طيب فاكر لما أخدت الميدالية البرونزية بتاعت السباحة بتاعتي وضيعتها ،وادتني اللعبة بتاعتك بدالها ، على فكرة كنت عارفة إن اللعبة مكسورة بس مرضتش أزعلك..ومش ناسية الفوانيس وبنك الحظ والكورة الشراب عند جدو ، والمسجد اللي بنحفظ فيه قرآن ،وشرايط التسجيل اللي كنا بنسجل عليها اغانينا المفضلة ، والخناقات على الكمبيوتر في كل مرة بتدوس على الزرار ومبتعملش شت داون زي الناس .

فاكر أول مرة أخدتني من إيدي وودتني المدرسة في أولى ابتدائي ودخلتني الفصل ،وكل مرة كنت بستناك تخلص علشان نروح مع بعض عشان بخاف أعدي الشارع الكبير ، طيب فاكر وأنا في كي جي لما الولد حاول يمسك ايدي وأنا جريت منه وحدفته بطوبة صغيرة فراح قال لأخوه وأخوه كان صاحبك فاشتكالك مني وفضلت الاشاعة حتى الآن اني كائن شرس ومفتري بسبب تسييحك ليا على النطاق العائلي :))

فاكر لما ماما أخدتنا في مرة واشتريت لنا دبادبيب علشان نحطهم على الرف بتاع اللعب ، انت اخترت الاصفر عشان كان بيفكرك بنور وانا اخترت الدبدوب الاخضر ، على فكرة مسبتش ماما توديهم في حتة وشايلاهم عندي لحد دلوقتي..

فاكر لما دخلت الكلية ، ولما غبت اول 45 يوم ورحنالك ، كنت غلبان اوي وحضنتني وقلتلي اني وحشتك..
وفاكر من 3 سنين كده لما جيت وقلتلك ان فيه واحد معجب بيا اسمه كذا...وقلت لي أنتِ لسه صغيرة وياما ناس هيُعجبوا بيكي..

فاكر لما جيتلك السنة اللي فاتت وزعقتلك وقلتلك أحمد...لو بتحب دعاء لازم تحارب علشانها وأنا هساعدك ، هنحط خطة وهنضغط على بابا وماما ، فاكر كمان إنك مسبتنيش أساعدك...وقضيت سنة بتدوس على قلبك أدامنا ومش مديني فرصة أعمل لك حاجة.
كنت دايماً شايفني رضوى الصغيرة ، مع إني كنت بحسني اللي مسئولة عنك وواخدة بالي منك اكتر ، لحد دلوقتي حاسة إن أنا الكبيرة وأنا اللي شايلة المسئولية .عارف مع إننا عمرنا ما كنا قريبين من بعض كفايا ، أنا بس اللي كنت فاهمة إننا ملناش غير بعض وأنت وقعتني من حساباتك ، مبصتش للحظة إن الجو العام والمشاكل اللي بتمر بيها فيه واحدة جمبك بتمر بيها معاك ، نفس اللي افتقدناه ونفس اللي محتاجينه .

عارف ، جايز مكنش أتعلمت منك حاجات كتير ومقضيناش مع بعض وقت كفايا لما كبرنا ، ومقلتليش لما قررت تخطب دعاء أول واحدة ، بس هعمل إيه ما أنا الكبيرة بتاعتك واللي هفضل أحبك غصب عني وعنك ، ومش هتضايق منك عشان نظرياً كلها كام سنة وأبقى عمتو إن شاء الله وده السبب الوحيد اللي هيخليني مخنقكش وأنا بربطلك الكرافات بتاعتك.


تنهيييييييدة
مع إنك مش هتقرا الكلام ده ، مبروك يا أحمد ويا دعاء..بارك الله لكما :)

.......

تنبيهات بخصوص الخطوبة:

مبحبش حد يقولي عقبالك ولا أخت العريس ولا كبرتي وبقيتي عروسة.
أو حد يقول لي تعالي أتعرفي على فلان ابن بنت عمة خال ماما ،مبحبش الحركات ديه ومعندناش بنات للجواز ، معندناش بنات أصلاً :D
مش بحب الأغاني الشعبي ومش برقص غير على أغنية Rumor has it اللي أكيد مش هيشغلوها وده شيء كويس لأني مش برقص أدام حد.