31.10.12

Je ne regrette rien ..


، عزيزتي المدونة ..أما بعد
  لأن صدور البشر ضاقت بي ، ولم يعد يسعني في الحياة بعد الله سواكِ
فأرجو ألّا تمليني وترهاتي الحمقاء التي لا تعني للآخرين شيئاً  ،
فقط تعني أنني لست وحدي وأن هناك أشخاص _خياليين ربما_ ما يزالوا هنا لأجلي
في أي وقت للمرور والاستماع لحكايا وآلام وحماقات جديدة..

...


"! بدّك تفل فل , بس إمشي على جنب ما تشغلّي فكري"
-زياد رحباني-


...


من غير أي إحساس بالندم على اللي فات لو عاوز تبدأ من جديد أعمل حاجتين : سامح وابتسم.

عاوز تبقى مبسوط : متتوقعش ومتطلبش حاجة من اللي بتحبهم.

عاوز تبقى مش لوحدك : أشتغل بي آر هتنزل من بيتك 7 الصبح وترجع 8 بالليل يدوب تتفرج على فيلم أو مسلسل وتنام لحد الفجر تاني يوم.

عاوز إيمان أكتر بربنا : سيبها تضيق وهتلاقيه بيفُكها من عنده من حيث لا تحتسب.

عاوز تحس بالقوة : أصحى كل يوم عافر لحد ما حيلك يتهد بس أوعى تقهر نفسك علشان متتكسرش على آخر اليوم.

عاوز تحس بالانبساط : متشربش كافيين لمدة كام يوم وبعدين أعزم نفسك على نسكافيه او كابتشينو في كافيه هادي بتحبه وقول لميدو يشغل لك فيروز عشان تعمل دماغ صح.

عاوز تتخلص من الأرق : خلي حد يحكيلك حدوتة ،ويمسك إيديك ،ويلعب في شعرك المرمي وراك على المخدة ، لحد ما تطمن وتدفا فتنام وتصبح على ملايكة .

عاوز تقوم مبسوط من النوم : قول لحد يبعتلك مسج وأنت نايم فتصحى على صوتها تبتسم وتكمل نوم.

.......


تفتكر إحساسه ايه عود الدرة لما صحي لقي نفسه طارح في قلب جنينة برسيم !


 .......


نفسي اوي في الشتا ..
والمنتوهات الطويلة،
والكوفيات.

نفسي أصحى في يوم أروح أصلي في القدس،
وأشوف جدتي اللي هناك.

نفسي أعمل نسكافيه بوش كبيييير :)
نفسي في مج
ووردة ..(واحدة بس)

نفسي في هدية تفاجئني (مش غالية بس شبهي)

نفسي في شجرة فُل بتاعتي لوحدي،
وبلكونة أحط فيها شجرة الفُل..

نفسي أتصلح بسرعة،
والثقب اللي بيستهلك طاقتي يلتئم ..

نفسي أقعد على البحر ساندة 
على كتف حد من الشروق للغروب..

نفسي أبطل أطلب الحاجات اللي محتاجاها..

نفسي في رقصة سلو مع حد بحبه ،
وأنا لابسة فستان صارخ نبيذي اللون..
 
نفسي في وَنَس يملا روحي ،
وحضن...آه نفسي ف حضن تفعيص من بتوع سارة ورنيم دول..

............

مبحبش اللي بيشربوا سجاير /مبكرهمش أنت عارف / ولا بيبسي مبحبش البيبسي بس ساعات بيوحشني. سيبك منهم دول ناس عندهم شيزوفرينيا

............

الصحاب رزق
الحب رزق
الشغل رزق
الابتسامة والاطمئنان رزق
العيلة رزق
حب الناس رزق

الحمد لله يارب على رزقي...الحمد لله

..........

الكعب العالي وحش اوي ، مقصدش للي بيلبسوه بس ، ده كمان بيوجع الأرض أوي ، أنت دارس استركتشر وفاهمني أكيد!
  ساعدني نقنع سحر بالحقيقة اللولبية دي ،وأقولها في وشها أنا بكره الكعب العالي .

............




كان شكلي حلو وأنا لابسة فورمال وعنيا كانت منورة شبه مامتي بالظبط...
معرفش ازاي مع إن عينيها أفتح من لون عينيا!

وهو قال لي "عنيكي حلوة أوي " وهو ميعرفنيش حتى ، إذن أنا مكنش بيتهيألي..

............

"أحبب من شئت فإنك مفارقه".

:/
....... 

وقد قررنا نحن عود  الدُرة اللي في المدونة توفير طاقة العياط لغسيل المواعين ومذاكرة الالكترونكس ومعالجة الوضع المأساوي اللي لاقينا نفسنا فيه.

.......

اه ومتنسيش الحمد لله...بجد الحمد لله


هناك 12 تعليقًا:

د/دودى يقول...

يا عندليب ما تخافش من غنوتك

قول شكوتك و احكي علي بلوتك
الغنوه مش ح تموتك إنمــــــــــا
كتم الغنا هو اللي ح يموتــــــــك. عجبي !

Ramy يقول...

مش عارف ازاى البوست دة فات منى ؟؟؟!!!!
(:

....................

تعتقدى أننا خياليين

):

تعتقدى ان صدورنا ضاقت بيكى

):

.....................
أنا مش ندمان و مسامح و مبتسم

بس للأسف مش عارف ابدأ من جديد

(:

و صدقينى مش بطالبهم بأى شيىء خااااالص

خااالص

متخلصتش من الأرق ال3 أيام اللى كنت فيهم فى اسكندرية

لكن نمت و انا مطمن و متدفى و فرحان (:
..........

نفسي أصحى في يوم أروح أصلي في القدس، وأشوف جدتي اللي هناك.
أن شاء الله ....(:

كل اللى نفسك فيه

هدعيلك أنه يتحققلك بحذافيرة

أه بحذافيرة

ليه لأ

(:

........

أأأأأأأأأأه انا بكره السجاير و بتجنن من اللى بيشربوها بالرغم ان اخويا اللى أصغر منى بيدخن و دة سبب كتير من خناقاتنا ((:

أيوة بتخانق هههههه

..............

ربنا يرزقك كمان و كمان وكمان

قولى امين

(:

........

لأ مش بيتهيألك

علشان كدة انا عرفتك فى الندوة ((:

............

الحمد لله

بجد

الحمد لله

عارفه ليه علشان ربنا واقف مع اللى بحبهم

و انا مرتاح شوية اليومين دول

يارب دايماً واقف جنبهم

ما هو واقف جنبك برضه

ربنا معاكى دايماً

((:

Ramy يقول...

أنا اسف التعليق طلع طويل قوى

(((:

حسيت انى عاوز اتكلم و بس

((:

راء يقول...

د. دودي
ميرسي اوي ع الحتة الجاهينية الحلوة ديه :)

راء يقول...

Ramy

عشان أنا بقيت أنشر كتير لأني مليش مكان أرغي فيه تاني !

فعادي بقى ولا يهمك :)

.....

لا هو أنت مش خيالي ، بس أنا متهيألي فيه ناس خياليين

وآه أعتقد إن فيه ناس كتير اتخنقوا مني وبقيت حمل تقيل على قلوبهم...


....

مش عارفة أنا بدأت كل حاجة من جديد ، حاسة إني بعمل كده كل يوم بصحة الصبح ، معدش فيه ثوابت غير ربنا والكلية والشغل بس :)

بس أعتقد إنك لو مش بطالبهم بحاجة خالص مكنتش هتضايق كده إنهم مش سامعين أو موجودين أو أياً كان

وأنا بقيت أنام بالعافية بالأدوية اللي تقريباً هتبطل تشتغل ..

.....

يارب يتحقق يا رامي بحذافيره :)
لأن من أمنياتي إني تاني مرة أشوفك تبقى أسعد واحد في الدنيا


....

هههههههه كويس إنك أكدت على بتخانق لأني مكنتش مصدقة لما قريتها


......

آمين يارب :) :) ولك بالمثل يا رامي

....

أكيد مش علشان كده عرفتني في الندوة :P

....


آه ربنا واقف معايا أوي وساندني ومديني قوة خارقة...وأكيد واقف معاك

....


رامي أنا مش عارفة ممكن أقولك ايه غير ربنا يسعدك اوووووووووووي

الكومينتات الطويلة حلوة عشان بتخليني أرغي وأنا أصلاً محتاجة الرغي ده...بيريح



أشكرك بحدود السما :)

Sara يقول...

راء يقول...

sara

مش تقولي إن أنتِ يا شيخة لخبطتيني :D
السارات اللي في حياتي كتير

Doha Adel يقول...

بس كفاية إنك عاوزة هدية تفاجئك وده نفس الإحساس اللي بيلح عليا بقاله كام يوم ..
وده كفاية عشان تعرفي إنك سايبة ف كل قلب علامة :)

وبالمناسبة حل المعضلة دي إنك تعملي هدايا غير متوقعة وتستني الفرحة المفاجئة لما تقدميها ..
وانا بعمل هدايا كتير دلوقتي :)
عارفة لو كنت بشوفك؟ كنت هعملك عقد مليان فراشات ووشوش بتضحك .. وبس :))

راء يقول...

Do7a

متهيألي عندك حق :)

بس انا كان نفسي تجيلي من قبل ما أقدم أنا حاجة !!
احساس اناني نوعاً ما..بس اللي حاصل بقى :)

شكراً على العُقد BTW

نيللى عادل يقول...

إنتِ إزاي كدة ؟
بحبك ! D:

راء يقول...

نيللي

أنا عادي كده :)
بحبك أكتر أصلاً <3

Sara يقول...

سايباكِ تكتشفيني لوحدك :)