ديزني لاند

تنويه بسيط : مش شرط كل حاجة بتتكتب هنا تكون عني..فيه اختراع اسمه خيال يجب وضعه في عين الاعتبار.

.....

منتاش برنس شارمنج ، وهي أميرة من القصص الخيالية وقعت غلط في طريقها من العالم الخيالي لمكانها اللي هي فيه دلوقتي برغم إن وجهتها الأساسية كانت ديزني لاند.
فــ فجأة لقت نفسها قاعدة أدامك..معهاش غير نوتة بتكتب فيها وقلم حبر أحمر خلصان (عشان كانت بتديه للناس يملوا الاستمارات الصبح في البوث) .. وحبة كلام واقفين جواها مش بيستجروا يطلعوا عشان معندهمش الجرأة يسيبوها ..
بتحاول تثق في نفسها وفيك بس مهياش قادرة تلاقي الطريق لوحدها (هي مش بتاعت علاقات عامة ، ومش بتعرف تزنجفك* ولا بتعرف تماركت لفكرتها صح ، باختصار هي ولا حد من اللي كانت بتتكلم عنهم الصبح ...طول ما أنت موجود أدامها )

منتاش برنس شارمينج..مش فائق الوسامة ولا عندك فلوس الكون كله ولا إبداع السنين ولا تَفَهُم كامل لشخصها الخيالي . بس أنت أصلاً جامد ، وهي أصلاً أميرة مؤمنة بالقصص الخيالية في الأول والآخر .. وإنك مش لازم تبقى برنس شارمينج عشان تقع في حبك يا منيل (على رأي مها ميهو )

____________

اوصدي الابواب
اسدلي الستائر
اغلقي النوافذ
أريد أن أبوح لكِ بسر خطير
.
.
.
.
إني أحبك.. :$

(الشاعر الفرنسي جاك بريفير)

ديه مش رومانسية...(إن أو) خالص 
ده كان بيحب واحدة مجنونة فحب يتأكد إنها مش هتنتحر قفزاً من النافذة ولا هتصرخ وتلم عليهم البيت .. ده كان ناقص بس يقولها غرقي عيدان الكبريت ميه او أرمي انبوبة البوتجاز من البلكونة قبل ما تقفليها...!!
قلتلك إني سمعت عن الشاعر ده قبل كده في المكتبة لما مسكت ديوانه..دلوقتي عرفت ايه المشترك ما بينكم . قدركوا تحبوا مجانين ، قدر لا فرار منه
قدر يستحق العناء ..

__________


بعد مرور ساعات على الــ 48 ثانية اللي كنت بستوعب فيهم اللي اتقال...اكتشفت إني لسه مستوعبتش!
كل اللي فاكراه لحظتها  إحساسي بإني محتاجة حضن كبييييير أستخبى فيه للأبد من كل حاجة وحشة ، ساعتها هشيل كل خرافات إني قوية وهعرف أطبطب على نفسي وآخد بالي منها ، هرمي ده كله ، هلجأ للاختيار التاني وأسيب صوت واحد يقول لي أنتِ كويسة ، متخافيش عشان أنا هنا ، وعشان مفيش حاجة وحشة هطولك طول ما أنتِ معايا. ساعتها هكَدِّب كل ذرة في الكون بتقول لي غير كده ، ساعتها مكنتش هبقى خايفة
!

___________


يا عزيزي الوجع أنواع..
كل اللي اتعلمته النهارده إن الطبطبة على الجرح مبتوجعش خالص!
حتى لو إيديك كانت بتترعش مش هتحس غير بحاجة واحدة بس...الحب

__________


حقايق بحتة مجردة عني =)

لسه هقول على الاستركتشر .. مدنية
وهتكلم عربي متأنجلش وسط الكلام..مش مهم مادام مفهومة
لسه هحس بالمسئولية كل ما هقصر مع التيم أو مع المذاكرة
لسه صحابي كللللهم هيفضلوا واحشني وهنفضل مش لاقيين وقت ولا مكان يلمنا
لسه هضحك كل ما اتفرج على فيديوهات الموبايل
وكل ما بفتكر كومينتاتك على أي حاجة تحصل لي
لسه هفكر أتبنى القطة جيجي عندنا بدل ما بسيبها ف الكلية وأنا مروحة
لسه بنبهر لما أقرأ حاجة وتكيفني
لسه هفضل أحسِّن من نفسي
وأفرَّح الناس
وأشيل كلينكس بزيادة
وأراقب البنات الصبح في عربية المترو اللي عنيهم مدمعة
وأناولهم مناديل ووايبس لو الكحل ساح من دموعهم..
لسه هستنى أشوف أفلام حلوة..وحلقات جرايز أناتومي الجديدة..والجوابات اللي بقيت استلمها مؤخراً..والكادو اللي مستنياها من حد غريب..
لسه مقصرة مع ربنا...وهو لسه كبير اوي وبيحبني اوي وبيفرحني اوي 
الحمد لله =)

______

الزنجفة هي تظبيط شخص بقضاء احتياجاته وجعله سعيدا ومرتاح البال. الفعل: زَنجَف*

لول السنين لقيتها في معجم اللهجات المصرية :D

#BRs will relate