28.10.12

وحدي ومش ونسان



المسألة مسألة وقت وأول ما الحاجات اللي كنا مشغولين فيها وواخدانا حتى من نفسنا بتهدى..وكل الحاجات الخفيفة تطفو للسطح من جديد...فيبدأ تاريخ المعاناة
بعد ما مرحلة الإنكار الذاتي اللي كنا فيها بتخلص ، وتبص على امبارح بعد ما قعدت تهرب منه كام سنة ضوئية ،
وتسمع فيروز بتغني
فتتنهد بشدة وعنيك تدمع وتبدأ تداري الوجع ، بس بتفشل 

"لكن كله ما عم يمنع اشتاقلك ،ما دام كل سنة في خريف"

 ديه علامات الافتقاد يا عزيزتي ، افتقاد في وقت غير ملائم بس وهو من امتى كان بيبقى ليه وقت..بفتقدك وبتبخر ثم أتماسك وأذاكر حبة وأرجع أفتقدك أكتر فبيأس ومعرفش أعمل حاجة !


........
 
عموماً..فكروني مقولكمش المرة الجاية لما أشوفكم أو أكلمكم
إني مجروحة اوي
وتعبانة اوي
ووحيدة اوي
ومش قادرة أطلب حاجة منكم من جديد.

.............


من امبارح وأنا بقاوم من امبارح وأنا لوحدي ومش ونسانة
خلصت الشغل اللي عليا وكلمت سارة ، عملت أكونت 
على لينكد إن وقلت فكرتين جداد للماركتينج هيتعرضوا على الناس الكبار بعد العيد
 وبشتغل وبذاكر بس تعبت 
فاهم أنت ! ...أنا فاضية من جوا.

مفروض أقول الحمد لله وهو الحمد لله على كل النعم اللي في حياتي طبعاً ، بس كل همي لما حد يسألني عليكم ..أو لما أنا يخطر في بالي أسألني على أحوالكم ، هرد عليا أقول لي ايه؟ اتبخروا ولا اتبخرنا ؟

.............

 عاوزة أحلامي ترجع تاني أو على الأقل أمشي من هنا
وعاوزة أقفل المدونة ديه
ويمكن أبطل كتابة
يعني ايه كتابة أصلاً
لو كان فيه شيء اسمه كتابة أنا ممكن أعمل رواية .


...........

هو قال لي آخر مرة اخد زمام القيادة وأمشي بيها حتى لو معرفتي قليلة ، قلتله مينفعش
هو فعلاً مينفعش ولا أنا خايفة ؟!

بس "ليه
كل اللي سألهولي هو "ليه
ليه عاوزة تعملي كده؟
لاقيته بيطلع الكلام من أعماق أعماقي ، كلام غطى عليه التراب لحد ما أختفى
أنا عندي حلم !
عندي طريق مرسوم..هو قال لي كده بس أنا مش عارفة,,,أنا خايفة 
الأحلام الواقعية بقت تقلب بكوابيس
ستب خلتني أرجع أحلم

واقعد في الانترفيوز اتفرج على الناس
أنا بحب أتفرج على البشر اوي

البشر كتير اوي ف العالم ده ومع ذلك مش قادر تتخيل إنك ممكن تعيش من غير اللي حواليك دلوقتي !

............

أنا بحب هاري بوتر اوي ،بحب الناس اللي بتفكرني بحاجات قديمة فيا
عمالة أوشوشني من الصبح وأقنعني بإننا هنطرد الأشباح بتعويذة باترونام
كل اللي محتاجينه زكرى واحدة بس...بس تبقى سعيدة اوي ..
وهنعرف نطردهم من خيالنا وننام

....