3.10.12

ذات مومينت



بيحصل..إن تيجي عليك لحظة تقرر تبطل تفكير في المشاكل وتنهمك في الشغل ،فـ الصوت جوا عقلك يشجعك ويقول لك : 
"ده اللي الكبار بيعملوه..!" ،
بيرهقوا نفسهم بمليون حاجة عشان ينسوا مشاكلهم الأساسية .

ولما تفتكر شكل ساعي البريد مكنش مبسوط إزاي وهو بيسلمك المرسال الصبح ، وبياعة الجرايد كانت مهمومة فوق الوصف وأنت بتشتري منها المجلة ، كأنهم زومبي شغالين بس من غير حياة ..
فجأة نفس الصوت جوا عقلك يقول لك :
"مش كل اللي بيعملوه الكبار صح.."

عارف مش سهل أبداً تقنع نفسك إنك تنسى حد لمس روحك من جوا أوي ، هتيجي عليك تلك اللحظة اللي هتقف فيها وأنت في نص الشغل ومتعرفش تكمل!!

من الآخر مش هتقدر تقتنع بمشيتك في الكوربة وأنت شايف كم الضحكات بتاعتكوا المدلوقة على الرصيف والناس ماشية تدوس عليها، مش هتعرف تركب المترو من غير ما تلاقي روايح لناس غايبين بتتعمد مطاردتك وسط الزحمة ، مش هتقدر تستوعب فكرة إن بعد كده هتمشي في وسط البلد في الشتا وتاكل بطاطا مشوية من تاني لوحدك ، أو تاكل حمص الشام في الساقية وأنت بتتأمل في الشمس وهي بتغيب وأنت مؤمن إنها هتيجي بكرة بس الغايبين مش هييجوا لو بعد 100 سنة ...

مليون تفصيلة معادش ينفع تتكرر..هتظهر أدامك وتطلع لك لسانها وتقولك مش هتكمل اللي بتعمله عشان احنا لسه في بالك مهما حبستنا جوا دهاليز الذاكرة..

هتاخد وقت...شوية وقت وشوية كلام حلو من حد قريب من قلبك عشان تقتنع إن في البعد والمسافات حكمة..حكمة ميفهمهاش غير اللي مجرب القرب ، في البعد والمسافات حكمة ميفهمهاش غير ربنا اللي قربنا وبعدنا ، وفَرَّح قلوبنا بمرسال أو إشارة كونية أو حتى شخص يحس بيك في المترو فيناولك منديل تمسح دموعك..

ومن تاني هيرجع الصوت جوا عقلك يقول لك:
"
يا عبيط..
الناس بتعيش بقلوب مكسرة
وأرواح متاكلة
ونص حلم..
كله بيعدي..طول ما فيه أمل..وفيه ربنا
"


....

P.S. I think I'm just trying to come back home .. I'm trying to be fine whatever it takes  =)