3.10.12

ذات مومينت



بيحصل..إن تيجي عليك لحظة تقرر تبطل تفكير في المشاكل وتنهمك في الشغل ،فـ الصوت جوا عقلك يشجعك ويقول لك : 
"ده اللي الكبار بيعملوه..!" ،
بيرهقوا نفسهم بمليون حاجة عشان ينسوا مشاكلهم الأساسية .

ولما تفتكر شكل ساعي البريد مكنش مبسوط إزاي وهو بيسلمك المرسال الصبح ، وبياعة الجرايد كانت مهمومة فوق الوصف وأنت بتشتري منها المجلة ، كأنهم زومبي شغالين بس من غير حياة ..
فجأة نفس الصوت جوا عقلك يقول لك :
"مش كل اللي بيعملوه الكبار صح.."

عارف مش سهل أبداً تقنع نفسك إنك تنسى حد لمس روحك من جوا أوي ، هتيجي عليك تلك اللحظة اللي هتقف فيها وأنت في نص الشغل ومتعرفش تكمل!!

من الآخر مش هتقدر تقتنع بمشيتك في الكوربة وأنت شايف كم الضحكات بتاعتكوا المدلوقة على الرصيف والناس ماشية تدوس عليها، مش هتعرف تركب المترو من غير ما تلاقي روايح لناس غايبين بتتعمد مطاردتك وسط الزحمة ، مش هتقدر تستوعب فكرة إن بعد كده هتمشي في وسط البلد في الشتا وتاكل بطاطا مشوية من تاني لوحدك ، أو تاكل حمص الشام في الساقية وأنت بتتأمل في الشمس وهي بتغيب وأنت مؤمن إنها هتيجي بكرة بس الغايبين مش هييجوا لو بعد 100 سنة ...

مليون تفصيلة معادش ينفع تتكرر..هتظهر أدامك وتطلع لك لسانها وتقولك مش هتكمل اللي بتعمله عشان احنا لسه في بالك مهما حبستنا جوا دهاليز الذاكرة..

هتاخد وقت...شوية وقت وشوية كلام حلو من حد قريب من قلبك عشان تقتنع إن في البعد والمسافات حكمة..حكمة ميفهمهاش غير اللي مجرب القرب ، في البعد والمسافات حكمة ميفهمهاش غير ربنا اللي قربنا وبعدنا ، وفَرَّح قلوبنا بمرسال أو إشارة كونية أو حتى شخص يحس بيك في المترو فيناولك منديل تمسح دموعك..

ومن تاني هيرجع الصوت جوا عقلك يقول لك:
"
يا عبيط..
الناس بتعيش بقلوب مكسرة
وأرواح متاكلة
ونص حلم..
كله بيعدي..طول ما فيه أمل..وفيه ربنا
"


....

P.S. I think I'm just trying to come back home .. I'm trying to be fine whatever it takes  =)

هناك 7 تعليقات:

Ramy يقول...

(:

عارفه بقى انا معنديش كل التفاصيل دى علشان افتكرها

بجد

مش عارف اشرح

.
.
.

يمكن البوست كان المفروض يقلبها بحزن معايا لكن

حتى و انا بأكتب التعليق مبتسم (:

مش عارف ليه حقيقى

Ramy يقول...

صحيح تعالى هنا


ايه دة راء ((:

و كمان فتحتى الكومنتات

((:

طيب

((:

wella يقول...

على فكرة انا دمعت ماعرفش لية
يمكن عشان واحدة صحبتى كنت بكلمها فى التلفون وقالتلى كلام يشبة كلامك فحسيت كلامك اوى ولمسنى بجد دمعت وهز فية اوى حسيت الكلام طالع من جوة قلبك فعلا
العقل بيتعب القلب ..والقلب بردة بس وجع القلب بيكون اقوى
مافيش اصعب انك تكمل تعيش حياتك من غير احساس بالحياه هتحس انك جثة بتنفس

(عارف مش سهل أبداً تقنع نفسك إنك تنسى حد لمس روحك من جوا أوي ، هتيجي عليك تلك اللحظة اللي هتقف فيها وأنت في نص الشغل ومتعرفش تكمل!!)
لو تعرفى ترجعى الاحساس اللى لمس روحك دة رجعية قبل مالاشارات الكونية تخلص

sara adel draz يقول...

رضوى مبتتخانقش مع الكتابة وبتكتب اهى
:)

حسيت براحة وانا بقرالك لان المدونة فى شكلها الجديد مريح حقا

^_^

وكلامك مريح طبعا كالعادة ...

اوعى تفكرى بس مجرد التفكير انك تبطلى كتابة

... انتى بخير يا رضوى
وكل التفاصيل اللى عندك دى مش عند حد تانى كفيلة انها تحسسك انك لسة عندك قلب بيحب ويحس ويعيش ويفتكر

:* :*

راء يقول...

Ramy

:)
أنا بفرح لما بلاقيك مبتسم عشان متستاهلش اقل من كده اصلا

وايون راء... :)
راء بس

راء يقول...

wella

لحظات استيقاظ الذاكرة دايماً بتوجع..بتوجع كل ذرة فينا مش جديد عليها يعني

بس الفكرة اننا منستسلمش للوجع ده
نشتاق بحب..حتى لو الموضوع مأساوي

والبوست يمكن مكنش عني اوي فالاشارات الكونية ديه ممكن متكونش ليا :)

راء يقول...

سارة...

تغيير لابد منه

ورضوى بقت حلوة مش بتزعل ومش بتخاصم الكتابة حتى لو بتوجعها
اي خودعة

:)
بحبك في الله