أهلاً ، أنا...راء
برج السرطان و برج الديك (لو ليك ف الابراج الصينية)
تقدر تقول عليا زيهم ذكية ، دقيقة ، متفتحة ،موسوسة ،عندي عقدة السعي للكمال وأكبر من اللي في سني تقريباً بعدة سنوات ضوئية.
الحقيقة مش عارفة هما بيقولوا ليه كده
عشان كده حبيت أعرفك بيا قبل ما تفهمني غلط أو حتى صح !
راء هادية / مجنونة / خوافة / بيبان عليها اوي / بتفكر كتير طول الوقت / عندها أرق مزمن / مش بتهتم بلفت الانتباه / بتقرأ وتكتب وترسم وتصور / مش بتغني بصوت عالي..أبداً / نفسها تتعلم رقص التانجو / نفسها تجيب قُطة صغيرة / عندها صحاب بائسين زيها / بتبالغ من غير قصد / بتحب فيروز وآديل وسيلين عشان بيخلوها تعيط / بتحب علي الحجار لأنه بيطبطب عليها / وأفريل لافين عشان بتغني الحالات اللي بتحسها / بتكون رغاية وهي مبسوطة / بتحس كتير ومبتعرفش تعبر / بتكتشف نفسها كل يوم من جديد / بتقلق وبتخاف كتير / لما بتحب بتبقى واسعة / حدسها قوي جداً بس مبتصدقوش / مش سهل يتضحك عليها / هتبقى ناجحة اوي لما تتخرج وتشتغل/ هتاخد لقب بيست ميمبر علاقات عامة السنادي / هتعمل مليون روبوت / عندها قائمة أمنيات / بتتكلم عن بكرة كتير / مش بتمسك في الأطلال / عمرها ما ندمت / بتحب المونتوهات في الشتاء / وبتحضن المجات وتستخبى فيها م البرد / بتدور على أسطورة اسمها وطن / مميزة في حاجات كتير أغلبها بطلت تعمله / مستنية من بكرة حاجة متعرفهاش / حاولت تعرف لك نفسها وهي مش مقتنعة باللي قالته ده نهائي..
فـ سيبك منها بقى
فـ سيبك منها بقى
وقول لي تاني كده
أنت مين ؟
.
