26.8.12

جميلة أو ما شابه


بحس إني مزيفة جداً وأنا بمارس الشيء اللي اسمه 
shopping 

عشان كده مستغربتنيش لما نفضت للحوار كله..
ورحت جبت كتاب وطلبت نسكافيه وقعدت أقرأ وأكتب في وسط البلد
(حيث الناس المثقفين اللي بيشربوا سجاير ع القهاوي والكافيهات..كان واحشني اوي هناك !)

الشوبينج مش شبهي ومش بتاعي..والإكثار منه مضر بنفسيتي وبيعصبني وبيجيبلي حالة من
التلوث البصري عادة، ده بغض النظر عن إني كائن صعب الإرضاء وبرجع كتير محبطة

كنت بحاول أملا بيه وقتي مؤخراً لكن في الواقع
الشوبينج.. مش بيحسسني إني جميلة
لما بكون( أنا بجد )...ساعتها بحس إني جميلة

و النهارده كنت جميلة..عشان كده لما قولتوهالي صدقتكم اوي 
وفرحت اوي..مع إني كنت عادي أو أقل من العادي بشوية يعني..

:)


ملحوظة عامة : أي واحدة بتحب تحس إنها جميلة بطريقتها..بانها تقرر تعمل شعرها سيشوار أو كيرلي أو ترقص
في نص الليل على نغمات أي أغنية أجنبي وهي لابسة البيجاما اللي عليها فراشات وورد..أو لو حتى واحد
ابتسملها وهي بتعمل حركة مجنونة 
وقبل ده كله لما حد بتهتم بيه يقولها إنها جميلة فعلياً

.....


لما تقرر تتكلم عن أحلامك..وتقولها بصوت عالي
ممكن تطلع حلوة..أحلى بكتير مما كنت متصورها في سرك

ده اللي حصل لما اتكلمت عن حلم الكتاب
  وده اللي حسيته لما لقيت الفكرة واضحة أكتر من الشمس نفسها

سر خطير جداً...مؤمنة إني هوصل للي عاوزة أوصل له حتى لو كل الناس قالتلي إنه صعب
 مش هستسلم..هحارب أكتر..وهنوصل في الآخر، أنا مش لوحدي

وهلاقي المساعدة اللي محتاجاها هتجيلي لوحدها...عشان ربنا مش هيخذلني

.
.
للحظة اليوم كان عك السنين..وبعدين اتقلب ليوم من أسعد أيام حياتي
الحمد لله بجد يا ربنا..معنوياتي مرتفعة

 ..

ومستعدة لشد الرحال للشغل الجد بكرة :)

...

إلى رفيقتي العزيزة وأختي الصغيرة الكبيرة
صدقيني الحب مش بيدوب في كوبايات المية الساقعة
عقلك مسيره هيستوعب.. وهيكبر سِنة كمان :)


هناك 6 تعليقات:

faroukfahmy58 يقول...

رضوى طارق
الحب مش بيدوب فى الماء المثلج
تعبير جديد على العين حديث على الذهن
عظيم كصاحبته الرضوانية

safa7_karmooz يقول...

=)

sara adel draz يقول...

لى رفيقتي العزيزة وأختي الصغيرة الكبيرة صدقيني الحب مش بيدوب في كوبايات المية الساقعة عقلك مسيره هيستوعب.. وهيكبر سِنة كمان :)


الحب ... عقلك ؟!!

الحب والعقل لا يجتمعوا كثيرا ..

Ramy يقول...

ازيك (:

البوست دة ملحقتش أقراه حالتى مكنتش تسمح


التعليق دة علشان البوست الجديد

(:

أنا قعدت مبتسم و مبتسم و مبتسم طول البوست

بالرغم أن البوست اللى هيقراه هيحس أنه حزين لكن انا قريته بعين تانى

او يمكن انا فهمته صح

او ان البوست قالى حاجات انا محتاج انى افهمها

(:

تصبحى على خير

نهر الحب يقول...

ليه مش فاتحة التعليقات في البسوت الجديد
ع العموم انا اثر فيا اوي وبعد اذنك معلش انا شيرته علي الفيس في ستاتس وكتبت تحتيه اسمك لو ده ميضايقكيش

safaa abd يقول...

انا كمان ما بحب اروح ع السوق خالص وكمان صعب الاقي اشي يعجبني لهيك كتير برجع متل ما رحت فاضية من غير ما اشتري اي اشي ..السعادة احنا اللي بنصنعها ..وممكن شغلات صغيرة وبسيطة تولد النا سعادة كبيرة كتير ...عجبني البوست كتير