تجاهُل

إنك تحاول تبني اللي اتهد..بيتطلب منك طاقة ومجهود ودوافع وغرايز 

ممكن متبقاش عندك وأنت بتحاول تكتسبها وبعد ده كله

تكتشف إنك أصلا مبتعملش حاجة...

 عشان اللي قدامك بيوقع كل طوبه بتحاول تحطها في المكان الصح 

...أو الغلط!

زي بالظبط فكرة انك تجيب هدية لحد...ومتعجبوش
فيبصلك بقرف ويسيبك ماسكها في إيدك ويمشي

ساعتها المقولات بتاعت "حاول ومش مهم تنجح"..بتصبح بهتانة 

وتحس إنها عاوزة تتجمع وتتحرق في ميدان عام
وتحرق معاهم محاولاتك الفاشلة..في بناء اللي كان في يوم زمان..

....

أكتر رسايل بيبقى نفسي أبعتها..هي الرسايل الطويلة اللي ملهاش حدود..مكتوبة لحد معين عمره ما
هيقراها...رسايل أتكتبت عشان متتقالش..ومتتشافش

وعشان بعد مرور لحظات العاصفة تتحرق في نفس الميدان

وتحرق قلوبنا معاها

......

يلعن أبو البرد والحساسية والبيروسول والسجاير والحر والزحمة والسطحية  والعشوائية والإهمال والسياسة والغباء.

......

أنا بمشي بس واقفة في نفس المكان...

بكتب وأنا متعصبة آخر 600 حاجة وبالتالي مش هنشر نص اللي عاوزة أنشره

 .....

سوزان كان عندك حق...

"لم يعد في القسوة ما يُدهش"

.....

هتجاهل كم الحقايق اللي ظهرت النهارده مرة واحدة

،

هتجاهل كم سوء التصرف اللي بييجي من الناس في اللحظات المماثلة

 ،

هتجاهل التفكير في اللي حاولوا يخلوني أحسن لما عرفوا مالي

 ،

وهتجاهل إني لازم أسافر لوحدي حتى لو رفضوا الفكرة

 ،

هتجاهل إني كلمت اللي محتاجة أكلمها وقفلت قبل ما أطلع الشحنة معاها على التليفون

هتجاهل كل ما يجب تجاهله..وهقوم أصلي الفجر..

 

.وأنام