25.7.12

أنا الجديدة


Fresh starts thanks to the calendar they happen every year
just set your watch to January, our reward for surviving the
holiday season is a new year.

Bringing on the great tradition of new years resolutions,
put your past behind you and start over.

It’s hard to resist the chance of a new beginning,
a chance to put the problems of last year to bed.
-Grey's Anatomy-
...........


ده كل اللي كنت محتاجاه عشان أبدأ من جديد
بقوة وبثقة وبحرية وبحب وبأهداف جديدة
بدون أي ندم على أي ماضي ، على أي غلط ، على أي حماقة ارتكبتها

رجعت من السفر وأنا متقبلة تماماً فكرة إني بشر...بغلط
رجعت وأنا متعمدة أغلط...عشان أتعلم أصحح

 
ساعات الدنيا بتبقى أبسط لما بتقف من الناحية الصح

في الرسم الهندسي مش محتاج دايماً تعمل اسقاط لو الايزوميترك باين أدامك واضح

الحياة طلعت أبسط..أبسط من إني أفضل متحاصرة في الماضي
وأنا ربنا مديني قدرة على التحكم في الذاكرة
بس أنا ممسحتش ذكريات..عشان مسح الذكريات كان هينسيني نفسي
(مع إني حاولت ده في البداية)

اتعاملت مع الذكريات ، في الأول بتوجع ، احساس الفقد بيبقى غير طبيعي
بس لما بتواجه نفس الذكرى مرة تانية بتلاقي انها عادي...

جردت ذكرياتي من الأشخاص
من احساسهم ورؤيتهم ووجهات نظرهم ، جردت كل حاجة جوايا من كل حد...إلا نفسي

وهنا حسيت إنه توقيت لبداية جديدة وتصحيح مسارات قديمة
 
.........

 الناس غالباً مش بتتغير ، الناس بتكبر أو بترجع لأصلها ، أنا كبرت
شوفت العالم من حتة تانية خالص محدش كان قال لي إنها موجودة

بقيت أسأل في الشارع الناس...مع إني عارفة الطريق
ببتسم وأنا بجمع فلوس المواصلات من الناس وببوظ الحسابات وبصلحها 
بقيت أملا حياتي بكل حاجة حلوة...وبخلق ذكريات جديدة لما بتعدي عليا ببتسم
 ببعت للكُتاب اللي بحبهم عشان نفس اشوفهم
وبجهز هدايا لصحابي قبل أعياد ميلادهم بشهور
مبتعصبش زي الأول...وبصلح علاقاتي مع القريبين مني

أنا كِبِرت مصغرتش 

وحاسة إني أحسن...نفسياً وعقلياً ...وبتحسن
هو ده الهدف من الحياة أصلاً..إنك تحس إنك بتمشي..مش واقف
الوقوف هيخليك تبص على امبارح 
بس المشي هيخليك تبص على بكرة وبس

.....


 #النسخة_الجديدة_المتفائلة_من_رضوى_طارق


هناك 11 تعليقًا:

غير معرف يقول...

مبروك
وشكرا
وبجد ...
مفيش كلام يتقال غير سؤال واحد
لما تنسي أصلك ونفسك هتبقى مين ؟؟؟
هتبقى واحد تاني
هتقدر تعيش حياتك كواحد تاني ؟؟؟
ساعتها متبقاش حياتك
ولا تبقى إختياراتك إنته

مبروك عالكلام دا

اللى بيضحك على نفسه مبيروحش لحته
أتمني ميكونش ضحك عالنفس وكلام بجد
بالتوفيق

Doha Adel يقول...

أنا مبسوطة أوي .. عشانك :))
ربنا يسعدك دايماً .. :))

غير معرف يقول...

ربنا يوفقك وتبقي احسن واحدة ف الدنيا كلها
كل سنه وانت طيبه saso :)

I'm The CraZy One يقول...

النسخة الجديده من رضوتي دي رقيقه و جميله او و قويه ..انا بتفائل بيكي و نفسي قريب اكتب النسخه الجديده مني انا كمان و نبقي حلوين و مش زعلنين :))
عايزة اشوفك بقي بجد وحشاني

بنت مهيسة اخر حاجة يقول...

اخيرا فتحتي التعليقات :)
فرحانة بجد بتفاؤلك
نسيتيني الكآبة اللي انا عايشة فيها حاليا :)

مش مهم جرعة التفاؤل دي
المهم فعلا انها تستمر
يارب يا رضوى دايما متفائلة وجديدة :)

تحياتي ليكي
<3

Radwa Tarek.. يقول...

استاذ غير معرف..

مبروك وشكرا على ايه مش فاهمة؟

وبالنسبة للسؤال...مين قال اني هنسى نفسي وأصلي..ليه منعتبرش ان اصل الانسان انه يبقى مبسوط ويبص على بكرة دايماً..

وعلى فكرة هو اختيار...هو اختياري وبدون اي ضحك على نفسي

وبعدين الأساس واحد مهما اختلف الاختيار وطول ما الاختيار مش بيتناقض مع الفعل..فلا بأس

الموضوع فعلاً أبسط مما يبدو
واللي بيعوز حاجة بيعملها

Radwa Tarek.. يقول...

Doha

دوري...ربنا يعزك ويسعدك يارب :)

انا كمان مبسوطة اوي الحمد لله

Radwa Tarek.. يقول...

غير معرف
ساسو... :)

وأنت طيب ورمضان كريم عليكوا كلكوا

متشكرة اوي ع الدعوة الحلوة ديه..ربنا يسعدك اينما كنت

Radwa Tarek.. يقول...

Hanouuda

:)
النسخة الجديدة واثقة من نفسها أكتر وده مقويها فعلاً جداً

هتنبسطي وهتفرحي أوي...فصبراً جميلاً
وهستنى انا البوست

وأنا كمان نفسي اشوفك جداً...هكلمك انتي وروني بعد ما دوشة اول رمضان تنتهي

Radwa Tarek.. يقول...

بنت مهيسة آخر حاجة...

انا مش عارفة انتي مسحتي كومينتك الطوييييييل بتاع اخر بوست كنت فاتحة فيه التعليقات ليه؟؟ :)

عموماً انا قريته

ملحوظة: مفيش داعي للكآبة...أنا شبه متابعاكي وشبه مخمنة الأسباب..وشوية وهتحسي إن كل حاجة أصغر مما انتي شايفاها...ولو عاوزانا نتكلم ف اي وقت هكون موجودة :)

تحياتي برضه <3

raef ayman يقول...

ما اجمل ان تجدد نفسك كل فترة من وقت لاخر