21.3.12

حالة


حاولت أكتب بوست طويل في مرة ومعرفتش...حاولت تاني امبارح...ومفيش فايدة الكلام بيقف عند سطر معين ومبيزدش..الأفكار كلها بتتحجر لوحدها..فبسكت وأحط نقطة..نقطتين..تلاتة..ومبدأش سطر جديد

بيتهيألي الناس اللي بتكتب البوستات الطويلة بتحس زي ما انا حاسة دلوقتي
بتسكت تسكت تسكت ومتتكلمش مع اي بشر متقولش اللي بتحسه ولا خايفة تحسه ولا حسته...وبعدين تتكلم في الآخر...انا بحس كده برضه بس مش بتكلم في الآخر ده.

الناس لما بيحسوا إنهم مش فاهمين ايه بالظبط بيحصل..معندهمش أدنى رغبة في وجود بشر حواليهم..مش عاوزين يكشروا ولا يعيطوا ولا يبتسموا...بيكونوا هاديين اوي و محتاجين يهدوا اوي...ومحدش بيفهم ده غالباً 

عن نفسي لما بحس بده بصحى بدري من غير الـمنبه..بقفل الموبايل..بلبس الجينز الأزرق والبلوفر البترولي والطرحة اللي مليانة دواير ومبفكرش ابص في المراية كتير ..بصلي وبدعي ربنا اوي من قلبي..
والفكرة المُلحة اللي بتيجي على دماغي هوا أنا فاضية امتى النهارده عشان انزل الكوافير اقص شعري ؟

بفكر في الناس اللي هيقلقوا عليا لما يلاقوا الموبايل مقفول او إني مش مهتمة بالرد ع الرسايل 
وبتمنى انهم يتفهموا الموقف بعد كده لوحدهم...مش عاوزة أشرح وأقول واكرر..بتعب من التفسير وإعادة التفسير...

النهارده كنت نفسي ابقى لوحدي...بس مبقتش لوحدي
أنا...متشكرة عشان اول مرة حد يخرجني من الحالة ديه حتى لو لسه انا مش تمام..
ولسه مُصرة إني أكتب بوست طويل..هيكون مميز أوي..ومن قلبي اوي..بس لما أكون مستعدة أقول فعلياً كل اللي حاساه.



هناك 6 تعليقات:

غير معرف يقول...

حجز أول كومنت :P
:)

ماسى :)

غير معرف يقول...

ربنا معاكى وهتكتبى وتعملى كل اللى نفسك فيه قولى يارب زيى بس وكل حاجة هتبقى تمام :)
ربي يحفظك
:)
:)
:)

sara adel draz يقول...

حالة ........
..
ماشى ..كابيتو كابيتو

بنت مهيسة اخر حاجة يقول...

رضوى
طبعا مش محتاجة اقولك اني زيك في حاجات كتير ف البوست
لانك اكيد عارفة ده :)
انا برده مش بحب اتكلم وبسكت واسكت واسكت
وسرقنا من بعض شوية النقط اللي بيتحطوا ف الاخر كناية عن كلام كتير محتاج يتقال بس مش عارف يطلع

بس حاولت مرات معدودة اكتب بوست طويل برده
اعتقد عملتها مرتين ولا حاجة
اكتبي اي كلام حتى لو مش بيعبر بجد عن اللي عازة تقوليه .. ممكن يطلع مختلف تماما عن اللي كنتي عايزة تكتبيه بس ع الاقل هيكون في حاجة طلعت .. حتى لو مفيش حد هيفهمه

مش عارفة منطقي ولا لا بس بجد بتعب لما بحس ان مودك مش مظبوط
مش عارفة اشمعنى انتي بالذات يعني
بس بحبك في الله :)

بلييييييز بقى اكتبي اي حاجة فيها تفاؤل وتكوني طايرة من الفرح كده علشان تفرحيني انا كمان :)

rona ali يقول...

نتغاضي عن الكلام
علشان انتوا هتخلونى ادخل في الحاله المناسبه للي حاصل معايا بكلامكم دة هههههههههههه اشتاتآ شلوت

المهم انا مستنيه بقي
البوست الطويل علشان ساعتها
هغلس تغليس ان شاء الله وارخم بقي
^_^

faroukfahmy58 يقول...

ربنا معاكى حبيبتى وما المانع ان تكتبى كل ماتريديه وسيكون الله معك ما دمت انت تناديه