عن الذين أفتقدهم وأفقدني

أنا مش ناسياكم...أنا ناسية نفسي بس!!
كل الموضوع إن كل حاجة كتير من جديد
حتى الكتابة بقى ليها مواعيد..أو بتيجي عليا بشكل أو بآخر
يعني مثلاً بكتب دلوقتي وأنا سهرانة بعد ما خلصت رسم...ومش هنام كويس لأني كتبت ومنمتش كويس عشان الكويز بتاع امبارح..وأول محاضرة بكرة رسم كمان...فالحياة فُل..ومش هعرف أشرحلكوا كتير..لأن فيه توقيت للكتابة

 
الكلية مرهقة حد الموت...سكاشن ومحاضرات ولابات( تخيلوا صعوبة إنكوا تقفوا على رجليكوا 3 ساعات في يوم لمجرد إنكوا عندكوا لاب فيزيكس ووراه لاب ميكانيكا) ..

الباصات يومياً مش بتروح قبل التالتة ورخامة الطريق يوم الاتنين والخميس واحنا مروحين على المحور وعند كوبري 15 مايو..سخافة الدكاترة أحياناً ..واحساسي بالمسئولية ناحية إنج بريك(برغم إني مش من اللي أسسوا الفريق ده)...

أنتوا مش متخيلين إني نفسي أعمل حاجة لنفسي..أي حاجة علشان خاطري...بس مفيش وقت !! آه والله زي ما بقولكوا كده

فيه أيام كنت بنام فيها بالــ 7 ساعات..أكتر من المعدل الطبيعي عشان أهرب من كم المذاكرة اللي ورايا...والفيس مبقتش أدخله زي الأول..وناس كتير نفسي اشوفهم وأشقر عليهم مبقتش قادرة حتى الاقي وقت ليهم...غصب عني

فكرت آخد رست من كل حاجة بس مستحيل الحوار ده..هستنى يوم حفلة توقيع كتاب أبجدية وهتمشى في وسط البلد وهجيب كتب جديدة...وهمشي كتييييير (ده لو رجليا بطلت توجعني يوميها يعني)

من اسبوع كده رحنا النادي احتفالا بنتيجتي اللي هي كويسة الحمد لله (باعتبار اني كنت واثقة اني هشيل الكهربية !! ) ،لاقيت ناس بيلعبوا تنس ..وأفتكرت إني نسيت آخر مرة مسكت مضرب كان أمتى!!بجد مش فاكرة غير آخر ماتش لعبتوا ادام جيوفاني وكسبته...
(قبل ما نظري يبدأ يضعف ويجيلي استيجماتيزم)

بالمناسبة لما النتيجة جت...مفرحتش...مكنش فيه وقت أفرح ، كان لازم أذاكر عشان كويز الميكانيكا ،
بصوا أقولكم اللي في قلبي ما أنتم كمان ناسيني اوي ومش بتسألوا عني زي الأول..وبتسيبوني أقع من غير ما تمسكوا إيدي...تصدقوا بقى الحقيقة المرة ديه،أنا بقيت أنسى التواريخ كمان(مش كفايا عليا الأسماء)وبتلخبط في أعياد ميلاد الناس اللي بحبهم اوي ، و بقولهم كل سنة وانتوا طيبين قبل الميعاد!!

والحقيقة المرة رقم اتنين في الموضوع إني بقيت خايفة أقرب من حد تاني عشان مش هلاقي وقت أهتم كفاية بالحد ده...بالكاد عارفة آخد بالي من نفسي ومن الأكل والدوا اللي بقى ضروري ،لو مش عاوزة ضغطي يوطى وإيدي تتهز ومعرفش أرسم زي الأسبوع اللي فات.
أنا بجد محتاجة اجازة...وبجد محتاجة أحس انكوا لسه هنا....
بست

.

.

.

بست

.

.

.

بست

انتوا لسه هنا مش كده؟
.
.
.
.