21.2.12

S.O.S


رُحت لك علشان أفرحك، وسبت كل اللي ورايا، مقابلتكش ، رجعت ومعايا الدنيا كلها في جيبي إلا أنت

كلاكيت تاني مرة:

جيت لك سلمت عليك وفرحتك ،بس سبتني أروح لوحدي، شايلة الوحدة والبرد والأسى ويأس السنين على كتف واحد ،طبيعي..كان لازم يجيلي كرامب من تُقل الحمل عليا..

....

تصدق...كنت محتاجة أجيب شنطة أغلى شوية..يمكن تخليني اتماسك لمدة أطول
بس السعادة مش بنشتريها ..مهما الراجل الأجنبي قال لك إننا بنشتري لحاجات نفسية.

....

تعرف كمان، ديه مش مشكلة أي حاجة ،ولا أي حد ،
ديه روح العالم الشريرة مهنش عليها تسيبني مبسوطة...اليوم كان باين من أوله
بس أنا صمدت بقدر الإمكان، حاولت والله بس اتكسرت اوي على آخره.معلشي

...

بجد ظلم...إنك تختار تستنى وتستنى وتستنى كل الناس....ولما تحتاجهم يستنوك مش بتلاقيهم
وتقف تسأل نفسك...هو أنت ساذج اوي كده، ولا مجرد كومبارس كويس في حياتهم اللعينة وهم مش شايفينك أصلاً.

....

ملعون ده مجتمع اللي يخليك تُحبط كل ما تفكر في عاداته وعادات ناسُه اللي بتمثل قمة الغلط
ملعون ده مجتمع عنصري خلاني أكره إني بنت بدل المرة ألف مرة...كأني إنسانة درجة تانية

جواه حاجات كتير تستحق اللعنات مش هقدر أجمعها دلوقتي.

...

دكتور مدحت المسيري <3
أحترمك للمرة المليون
أنت الأعظم

....

وصلت للــ Maximum stress
استهلكت نفسياً وجسدياً ، عاوزة أبقى لوحدي فقط

....

رضوى يا رضوى...تواضعي تواضعي اوعي تبصي للناس من فوق حتى لو كنتِ أعلى منهم

....

ربنا..أنا طلبت منك إشارات تدلني ع الصح كتير، ولما الإشارات جت عملت نفسي مش شايفة وفضلت أبرر حاجات مبتتبررش ،أخطاء مش عارفة أحسنها ،ودلوقتي مش عارفة مفروض إيه اللي يحصل نيكست؟ ممكن مساعدة؟ 

...

إقرار: أقر أنا اللي كتبت البوست ده ،أثناء معاناتي من الصداع والبرد والرعشة وانخفاض الضغط والآلام الجسدية وأنا مش واثقة هو أنا في كامل قواي العقلية ولا ايه،
إني مش بندم ع الحاجات الكويسة اللي عملتها النهارده ،وإني هفضل عبيطة زي ما انا كده!!!ده جزء من طبيعتي ككائن فضائي

...

أخيراً رسالة لسارة دراز : أختيتي العزيزة ياريتك بجد كنتِ هنا دلوقتي
عشان أنا محتاجة حضن تفعيص يمكن التلج اللي جوايا ده يسيح وأبقى كويسة تاني

تصبحي على خير

هناك 8 تعليقات:

نيللى يقول...

بجد ظلم...إنك تختار تستنى وتستنى وتستنى كل الناس....ولما تحتاجهم يستنوك مش بتلاقيهم
وتقف تسأل نفسك...هو أنت ساذج اوي كده، ولا مجرد كومبارس كويس في حياتهم اللعينة وهم مش شايفينك أصلاً

كل البوست عجبني جدا ودي أكثر حاجة عجبتني:)

ربنا يفرح قلبك يارضوي

وأنا كمان بكره العادات وام التقاليد

دعاء العطار يقول...

:( :(

" إني مش بندم ع الحاجات الكويسة اللي عملتها النهارده ،وإني هفضل عبيطة زي ما انا كده!!!ده جزء من طبيعتي ككائن فضائي "

صح يارودى ... حتى لو مش بنلاقى رد الفعل اللى توقعناه .. كفايه انك عملتى اللى يرتاحلك قلبه

" أخيراً رسالة لسارة دراز : أختيتي العزيزة ياريتك بجد كنتِ هنا دلوقتي
عشان أنا محتاجة حضن تفعيص يمكن التلج اللي جوايا ده يسيح وأبقى كويسة تاني "

ربنا يخليكوا لبعض .. لما بنضعف او بنتعب من الدنيا بنحتاج اكتر حد فاهمنا وبيحبنا .. بس مهما بعدت المسافات بينكم قلوبكم بتجمعكم :)

ربنا يسعدك يااحلى رودى ف الدنيا كلها :)

بنت مهيسة اخر حاجة يقول...

" وصلت للــ Maximum stress
استهلكت نفسياً وجسدياً ، عاوزة أبقى لوحدي فقط "

" ربنا..أنا طلبت منك إشارات تدلني ع الصح كتير، ولما الإشارات جت عملت نفسي مش شايفة وفضلت أبرر حاجات مبتتبررش ،أخطاء مش عارفة أحسنها ،ودلوقتي مش عارفة مفروض إيه اللي يحصل نيكست؟ ممكن مساعدة؟ "

" عشان أنا محتاجة حضن تفعيص يمكن التلج اللي جوايا ده يسيح وأبقى كويسة تاني"

حلو البوست اوي
والجمل اللي اقتبستها دي حسيتها ف حياتي اوي
بس انتي احلى يا رضوى :)

sara adel draz يقول...

............ يا الله
كل ده جواكى وشايلاه لوحدك يا اختيتى
.. بس بردو هرجع وافكرك يا اختيتى .. ربنا عمره ما هيضعنا ابدا .. ابدا
:) خليكى كده انا بحبك كده
..
مستنياكى ..

لـــولا وزهـــراء يقول...

رُحت لك علشان أفرحك، وسبت كل اللي ورايا، مقابلتكش ، رجعت ومعايا الدنيا كلها في جيبي إلا أنت

كلاكيت تاني مرة:

جيت لك سلمت عليك وفرحتك ،بس سبتني أروح لوحدي، شايلة الوحدة والبرد والأسى ويأس السنين على كتف واحد ،طبيعي..كان لازم يجيلي كرامب من تُقل الحمل عليا..
................................
كرامب ..ه جميلة وخفيفة كخفة روحك وجمال ظلك..زعلانة منك

لولا

~ISLAM~ يقول...

glh hg]kdh ,الظروف والبشر كلهم يكونوا مجتمعين على خنقتك وزهقك وضغطك اكتر مانتى مضغوطه ومخنوقه

مالكيش غير حل واحد انك تاخدى حقنة تفاؤل ولو فاضيه ولو كنتى بتكدبى على نفسك مش مهم دى بداية بس وربنا بيكرم بعد كده

لكن تستمرى كده الواقع هيفضل يحبطك اكتر

وانتى مشكلتك انك مش من اهل الواقع زيى وزى كتير من الناس اللى بتفكر وتشغل دماغها

للأسف اغلبية البلد دى متعلموش واللى اتعلم مشفش تعليم عدل

احمدى ربنا انك محظوظه و ليكى فكر فى حياتك وابدأى تفائلى عشان متموتيش هباءا على الاقل يكتبوا على قبرك كنتى بتحاولى

RoMa يقول...

احسن حاجة فى التعب انة بيطلع المبدع اللى جوانا
بعيدا عن انى مش بحب المسيرى بحسة خنيق بزيادة بس بردو البوست عجبنى اوى
والف مليون و واحد وخمسين سلامة عليكى (:

ايثار يقول...

رضوى يا رضوى، خليكي كويسة عشان في ناس بتحبك هنا، حتى لو هما نفسهم مش مقدرين الحب ده أو مش بيراعوه وبيطنشوا كتير بس هما في الآخر بيحبوكي