9.2.12

وجهان لعملة فراق



هي

عارف لما تبقى مغلوب على أمرك
لما كل ما أبص في عينك وأفتكر سعادتنا وضحكنا
عيوني تدمع..عشان بفتكر كم الألم اللي هيطولنا دلوقتي
الأرق الدائم..واللمعة اللي بتنطفي من عيوننا
والضحكة القلقانة المتوترة لما ألمحك من جديد


عارف إن الكون كله كان بيتآمر حوالينا
يمكن كانت ديه إشارات بتدلنا على النهاية من قبل ما نبدأ
عمرك ما كنت مؤمن بالحاجات ديه بس أنا كنت مؤمنة جداً بيها


يا عزيزي..خطط الكون وحدها هي اللي بتكسب
أنت حطيت خطتك..وهو خطته قديمة أزلية فيها خبرة أكتر
عشان كده متستغربش لما خطتك تفشل
وأول ما تبقى مستعد تحط خطة تكسب الكون ده كله..
هتلاحقك اللعنات الكونية وهتموت قبل ما تغلبه..
هيهزمك حتى قبل ما تحاول


ولهذا أنا استسلمت للقدر
وقررت أسيب أسلحتي وأخضع لقوانين الكون


.......
هو


كل يوم قبل ما تنامي فكري كويس
إيه اللي خلانا نوصل للمرحلة دي؟
فكري نفسك كل يوم إن انتِ السبب
وفي كل لحظة في حياتك..
خليكي فاكرة.
علشان بعد ما تقل مقابلتنا
لحد ما تنقطع ..
وبعد ما أقابلك صدفة بعد 100 سنة
متبقيش تسأليني ..احنا ليه بقينا كده؟


علشان ساعتها متقلبيش عليا
المواجع ..
وأقولك بكل برود
إيه أخبارك؟
..تقوليلي: تمام
أقولك :طيب كويس ..سلام


أشوفك
بعد 100 سنة كمان


............


(A very very old post)
written by:

Hend Ayman as "He"
&
Radwa Tarek as "She"


.