14.1.12

It doesn't make sense

القادم مجرد هلاوس ناتجة من صداع عنيف وحالة اكتئاب واستيعاب متأخر للواقع
تجنبوا الاقتراب وأنا مش مسئولة عن اللي هكتبه أو اللي هتحسوه 
....



Drawn by me On 13-1-2012

.رسمت ليه؟ معرفش بجد
،أنت عارف إني مبعرفش أرسم أصلاً
أو مبحبش ، مليش ف التفاصيل الدقيقة ولا الخطوط الحادة
ومبعرفش أظلل ولا ألون كويس

تعرف ايه السخيف ف الموضوع؟

إني مش فاهمة اللي رسمته ده بيعبر عن ايه أساساً
أنا عارفة بس إني علشانك رسمت القمر والنجمات اللي حواليه والمزيكا 
والراجل شبه عقلة الصباع اللي بيحط سكر في الكوباية
آه بالمناسبة، جربت الشاي من غير سكر(مش وحش اوي كده)ا

بيتهيألي الرسمة ديه ناقصة..بس مش عارفة هي ناقصة إيه؟
مرضتش أرجع أبص فيها بعد ما خلصتها امبارح

*
تعرف إني عشت طول حياتي_على حد ما أذكر منها يعني_بلوم نفسي على حاجات ، حتى لو مكانتش بإيدي وأنا واثقة إني مش السبب فيها

بلوم نفسي كتير على الكلام اللي بقوله ، وبندم أحياناً إني بسكت
بس ندمي لما بسكت بيبقى أقل بكتيييييير من ندمي لما بغلط ف الكلام، أو أقول الحقايق
من غير ما أختار ليها إطار لطيف زي ما بيقولوا

يمكن كنت بتضايق عشان كده من سكوتي أوقات وأنا بفكر في حاجات كتير
.تعرف بقى أنا بلوم نفسي دلوقتي عشان سكتْ ساعتها

وبلومها برضه إني أتكلمت مع ناس مبيفهمونيش عشان أشرحلهم اللي محتاجاه ، وبرضه مفهموش حاجة وكله جيه على دماغي ذنب الكلام والسكوت.
:)

*

أنا كنت بحاول آخد بالي من نفسي أوي على قد ما بقدر
بس امبارح فكرت وقلت في عقل بالي (حلوة الكلمة ديه )ا
What's the point?
أنا زهقت وتعبت ومليت
والكتابة مبتريحش...وبكرة مش باين إنه أخضر
وأنا أصعب حاجة عليا إني آخد بالي من الحاجات بتاعتي: مواعيد الدوا ،ترتيب الأوضة ،الأكل ،ألبس تقيل عشان مبردش..وهكذا

ديه مش رسالة انتحار
لسه مكتبتش وصيتي عشان أنا:)
 بس بتكلم هنا لآخر مرة...قبل ما أسكت للأبد
ومجبش سيرة اللي محتاجاه لأي حد..ولا حتى اللي عاوزاه


*

محدش غيرك هيفهم..ويمكن أنت متفهمش
بس ولا يهمك أنا مقدرة الموقف كويس
وعارفة إني مليش أي حقوق، ولا فرص مش هقدر استغلها، ولا حتى حقي أحلم بيك عشان تطمني مرة كمان أخيرة

لأ وتصدق أنا حاسة بتغيير فظيع
برغم كل حاجة بتحصلي مشتكتش لربنا!ومقلتش إني استحق أكتر
بالعكس..أنا بدأت أساعد الدنيا تاخد حقها مني

الناس برضه هتقول ع الكلام ده عبيط
بس معلش
آخر مرة هيقولوا على حاجة ليا كده ..هبطل خلاص تمام كده
:)

.

هناك 12 تعليقًا:

نهر الحب يقول...

تقريبا انتي لسه كاتباها حالا
..
بصي عجبتني الصورة اللي انتي راسماها جدااااااا معبرة اوي

رسمك حلو جدا زي كلماتك
نفسك حد يحطلك حتة سكر في كوباية الشاي
اللي هي دنيتك
:))
الحد ده..
هو..
وهو وبس
عقلة صوبع عشان محدش شايفه..
غيرك...
ايه رأيك في التحليل ده..
القمر طالع بينورلك...شوية عشان ترقصي ع المزيكا براحتك...تحلمي

...
اتكلمي واكتبي اللي انتي حاباه وعايزاه..
بس اوعي تسكتي
اوعي تكون فيه في حياتك حاجة اسمها اخر حاجة
ماشي
:))

بنت مهيسة اخر حاجة يقول...

فعلا
ندمنا على الصمت بيكون اهون كتير من ندمنا ع الكلام

ومن كتر ان مفيش حد حواليا فاهمنا بنسكت
وبيكون هو الخيار الصح

بس تعرفي ؟؟
انا صحيح زيك ساكتة وشايفة انه صح طالما كل اللي حواليا مش فاهمني
بس كمان عندي يقين ان في حد هيفهمني
معرفش مين ولا فين ولا امتى
بس مدام انا موجودة يبقى هو موجود

مش سهل اننا نعيش حياتنا ساكتين لا حد فاهم صمتنا ولا حد فاهم حتى كلامنا

يمكن ناس كتير هتقولك اتكلمي وعبري عن اللي جواكي حتى لو محدش فهمه

بس لا .. متتكلميش غير لما تكوني متأكدة ان اللي قدامك هيفهمك كويس

ولغاية ما تلاقي الحد ده .. عبري عن اللي جواكي من خلال كلماتك اللي بتكتبيها .. رسمة ترسميها ....

حتى لو منشرتيش الكلام اللي هتكتبيه .. وحتى لو مفهمتيش الرسمة اللي رسمتيها
بس هيقولوا اللي جواكي
والى حد ما هيشاركوكي فيه

صحيح مش هيشيلوا عنك
وهتيجي فترة تحسي ان مبقتش الكتابة بتخفف عنك
بس حاولي تعبري عن اللي جواكي بأي حاجة حتى لو مش مفهومة
وف نفس الوقت متعبريش لحد مش هيفهم

ــــــــــــــــــــــــــــــــ

وعلى فكرة
الكلام مش عبيط ولا حاجة

طبيعي تمري بالمرحلة دي

وطبيعي تستسلمي كده وتبطلي حتى تدعي ربنا يخرجك من ده

ربنا ييسر حالك ويوفقك

ــــــــــــــــــــــــــــ

واسفة على لارغي الكتييييير ده

بس يمكن برده حسيت نفسي ف البوست :)

اييييييه الحكاية ؟!

RoMa يقول...

kobayt hot choclate
playlist "celine dion "
etl3y el balakona w ana arahnk kolo hayb2a tmam :)

دعاء العطار يقول...

رضوتى .. بتقولى ع نفسك مش بتعرفى ترسمى بس انا شايفاها حلوه .. انا صحيح مش بفهم ف الرسم بس رغم ان معناها مش واضح الا ان كل حاجه فيها تحسى ان ليها معنى .. وقفت قدام البنوته اللى ف القزازه .. رغم انها باين عليها سعيده وبترقص الا انى حسيت انها مخنوقه

بالنسبه للسكات اللى اهون من الكلام .. فانا كمان بفضل اسكت واندم احسن مااتكلم واندم ..

..

زى ماانتى عارفه يارضوتى .. بحب فضفضتك اوى .. :) :)

Zawag alnaddy زواج النادى يقول...

السلام عليكم ورحمة الله وبركاته جزاكم الله خيرا على هذا الموضوع الجميل ومن قلبي بدعى ان اى حد هنا ربنا يرزقه بزوج او زوجه ويبقي تعارف فى الحلال ** بجد موضوع جميل ومشوق... بارك الله فيكم يا شباب

sara adel draz يقول...

الرسمة أبهرتنى
مكنتش اعرف ان رسمك حلو اوى كده
..
البوست مُريع .. خضنى عليكى اوى
بس صدقينى يا رودى الدنيا ابسط من اننا نركز فيها اوى كده
..
عارفة إني مليش أي حقوق، ولا فرص مش هقدر استغلها، ولا حتى حقي أحلم بيك عشان تطمني مرة كمان أخيرة
.. اسمحيلى اقولك انك غلطانة .. لان من حقك انك تلوميه انه مجاش فى الحلم لانه حد يخصك ...
..
وازاى بعد كل ده نسيتى تشتكى لربنا
دا هو اللى فى ايده كل حاجة
وقلوبنا بين ايديه ..
..
بالمناسبة انا بحب رقم 13 اوى ..

iـــــــــــsــــــــــlــــــــــــaـــــــــm يقول...

الكلام مش عبيط ولا حاجة

ولو عبيط بالنسبة لأى حد قراه اكيد ليه معنى عندك

بس الفكرة دلوقتى فى الاكتئاب والاستيعاب المتأخر للواقع زى ما قلت قبل كده اكيد الحل عندك بس متخافيش وواجهى او اصبرى بس مع امل مش مع اكتئاب

وارسمى ومش مهم تفهمى عادى جدا
هيقولوا مجنونة ما كلنا مجانين

يمكن الحاجة الوحيدة اللى بلومك عليها زى مانتى ما بتلومى نفسك
انك تتكلمى مع ناس مبتفهمش ده يحسسك انك فى منتهى الغباء لأنهم اغبيا وعمرهم ما هيفهموكى

الكلام لسه مخلصش لأن اكيد بكره احلى
عشان احنا لسه عايشين

safa7_karmooz يقول...

ليه الاحباط طيب ؟؟؟

بكرة لسه احلى وانتى لسه فى الاول اضحكى الدنيا تضحكلك

:)

الصورة حلوة اوى

الرشاقة والرجيم يقول...

ليه التشائم ده

العناية بالجسم والبشرة يقول...

ما ضاقت الا اما فرجت

Rosa يقول...

حبيت الرسمه اوى
اكتبى اللى انتى عاوزاه وارسمى اللى انتى حاساه
وسيبك من اى حاجه تانى :)

غير معرف يقول...

raef: 3la fekra rsmk 7lwe gdn