28.1.12

مشاعر حمقاء



لما بواجه أي موقف أول مرة أواجهه 
شكلي بيبقى عامل كدهوه :|

مفيش أي رد فعل ،مش بعيط مش بتجنن مش بصرخ ،مش بضحك ولا بيجيلي هستريا...بقف بكل القوة اللي عندي (واللي معش عندي) بدون أي محاولة تعبير عن اللي جوايا، حتى لو بتغيير في ملامحي.

الأيام بتمر من غير ما أعمل أي حاجة..يعني ملل..بس مبحسوش الملل ده
أكنك بتتفرج على حياتك ،كفيلم بارد وأنت مش بطله ،ولا حتى كومبارس ليه دور فيه
سايب لجام كل حاجة.

قافل قلبك ومشاعرك ومتقوقع جوا شرنقة محدش شايفك جواها
مش مستني حد يخرجك من اللي أنت فيه
إن فاكت:مش مستني حتى تخرج من اللي أنت فيه
عشان مش وحش الاحساس ده...مش وحش خالص بالنسبالك

السيء بجد هو اللي دايماً بيحصل بعد الحالة ديه
لما بتحس بفراغ أبيض جواك على شوية الكركبة اللي مش عارف هتتنظم لوحدها ازاي ! 

وتبدأ تكتشف إن احاسيسك الفاضية العبيطة الحمقاء مش عاوزة تطلع على ورق ولا أنت عارف حاسس بايه
يعني انتقلت من مرحلة عدم الاحساس لمرحلة عدم معرفة الاحساس!!

أعتقد إنك تحس إحساس وحش وتعرف تعبر عنه بيبقى احسن كتير من إنك تحس إحساس مش عارف توصفه حتى لو مكنش وحش.

حالياً أنا مش فاضية ..بعيش أيام فراغي الأبيض العزيز
مش عاوزة إزعاج
مش عاوزة أدخل في المرحلة التالية قبل ما استمتع بلحظات اللاشعور ديه لأقصى درجة ممكنة
البرود مفيد أحياناً يا أعزائي
بس برودنا بيوجع اللي قدامنا عشان كده لابد من المواجهة ،عشان اللي بنحبهم مش عشاننا بالضرورة.

نفسي في ايه دلوقتي؟ نفسي اوي امسك مضرب التنس وأروح النادي ألعب مع أي حد
من غير ما اتكلم...من غير ما حد يطلب تفسيرات وإعادة تفسير للتفسيرات
ألعب وبس...في صمت
.
.
.

هناك 23 تعليقًا:

دعاء العطار يقول...

" لما بتحس بفراغ أبيض جواك على شوية الكركبة اللي مش عارف هتتنظم لوحدها ازاي !

وتبدأ تكتشف إن احاسيسك الفاضية العبيطة الحمقاء مش عاوزة تطلع على ورق ولا أنت عارف حاسس بايه
يعني انتقلت من مرحلة عدم الاحساس لمرحلة عدم معرفة الاحساس!! "

عبرتى عنى اوووووووووى يارودى .. ثانكس بجد :)

rona ali يقول...

بقالي كام بوست باجى اقرأ واتعميق اعمل لايك للبوست من غير كومنت وامشي

هكسر دة انهاردة واقولك دايما ورا كل فتره فراغ حاجه بتحصل ورا كل احساس مش عارفين نتكلم عنه ونعبر بي في سبب لده

احيانا اللى حواليكى مبيكونوش فاهمين ومستوعبين الحاله دى علشان كدة بيضروا
لو استعبوا وسابونا بنرجع تانى اسرع انما طول مافي كلمه مالك كتير وفي إيه كتير بنفضل نضيق الشرنقه علينا لحد ما احنا نفسنا بنتخنق

رودى <3

Nour يقول...

من غير ماحد يطلب مني تفسيرات او اعادة تفسير للتفسيرات ... اهو انا نفسي ابقى كده على طول :))

Miss LoZa يقول...

ساعات البرود بيضايق الى قدامنا
بس ساعات برده مش بيكون فايدينا نعمل غير كده اصلا
البرود مفيد فى معظم الاوقات اصلا بس احيانا بس كمان !
البوست كله حلو بس أنا حبيت اعلق على الجزء ده :)

Rosa يقول...

ساعات البوح بيبقى نعمه نرتاح بيها ونعيد ترتيب كل الكركبه اللى جوانا
وساعات بنبقى بس عاوزين نقعد جوه الشرنقه ...كده وبس من غير اى كلام ولا رد فعل
بيهيألى كلنا بنعيش الحالات دى
تحياتى ياسكره :)

RoMa يقول...

طب المفروض ااقول حاجة ؟ ولا اعمل نفسى ماخدتش بالى و امشى ؟؟
الكلام خليط عجيب من التفائل المؤذى و الاحباط اللى يعور
قولتلك قبل كدة وهاقولك تانى
فاااااااااكس لآى حاجة
كلو بيعدى
اسمعى انتى بس سيلين ديون و انتى هتابقى زى الفل , اة والنعمة
الست دى مفعولها سحرى (:

لـــولا وزهـــراء يقول...

لما بواجه أي موقف أول مرة أواجهه
شكلي بيبقى عامل كدهوه :|

مفيش أي رد فعل ،مش بعيط مش بتجنن مش بصرخ ،مش بضحك ولا بيجيلي هستريا...بقف بكل القوة اللي عندي (واللي معش عندي) بدون أي محاولة تعبير عن اللي جوايا، حتى لو بتغيير في ملامحي.
..........................
بصرة (:

لولا

~ISLAM~ يقول...

يا بنت الايه يا لذينه

ده انا بمر بالاعراض دى بردو

تكونش عدوة ولا ايه

بقولك ايه

انا حاسس انى متفرمط ولا شايف ولا سامع ولا حاسس ولا صاحى ولا نايم

حالة فناء من كل حاجة حتى نفسى

Baskouta يقول...

نفسي في ايه دلوقتي؟ نفسي اوي امسك مضرب التنس وأروح النادي ألعب مع أي حد
من غير ما اتكلم...من غير ما حد يطلب تفسيرات وإعادة تفسير للتفسيرات
ألعب وبس...في صمت



ينفع تاخديني معاكي ونلعب احنا الاتنين في صمت
ومع كل ضربة بمضرب التنس ننفض الزعل
وفي اخر الماتش نبتسم اوي من غير كلام
وكل واحدة فينا تروح وهي مبسوطة انها فضفضت من غير كلام

:)

طالبة مقهورة ..درجة أولى يقول...

دودو

ياااااه بجد؟
بحبك في الله يا دودتي العزيزة

طالبة مقهورة ..درجة أولى يقول...

رونا

اها انا معاكي جدا
مش لازم نعرف السبب بس بيكون فيه سبب

وانا متفقة معاكي ف كل حرف يا رونا

ربنا يخليكي ليا

طالبة مقهورة ..درجة أولى يقول...

نور

كلنا نفسنا ف كده..بيبقى صعب تلاقي سبب للاحساس ببساطة

طالبة مقهورة ..درجة أولى يقول...

Rosa

طب الفكرة امتى نعرف ان كده هنرتاح لو سكتنا وفضلنا لوحدنا..أو امتى هنحتاج نصرح ونتكلم؟

الحمد لله على كل حال

طالبة مقهورة ..درجة أولى يقول...

Roma

كومينتك ضحكني ضحك السنين :D

احباط يعور!!

مفيش احباطات ولا حاجة وسيلين شغالة متقلقش :)

طالبة مقهورة ..درجة أولى يقول...

لولا

:)

منورة

طالبة مقهورة ..درجة أولى يقول...

اسلام

إنها تلك الحالة...اللاشعور

معلش هتعدي

ربنا يكرمك وتعدي على خير

طالبة مقهورة ..درجة أولى يقول...

بسكوتة

:(

يللا بجد انا مش لاقية حد ييجي معايا بس هي ديه المشكلة الوحيدة عندي

بنت مهيسة اخر حاجة يقول...

ههههههههه

طيب ارد اقول ايه يعني ؟

انتي بتحكي عني ولا ايه ؟ :)

بصي هو انا من فترة قريبة كنت ف المود ده :|
بطريقة صعبة يعني
وكتبت عنه ف المدونة عندي كان اسمه ( اذبهلال )
بس منصحكيش تشوفيها لانها عاملة كده اوي :|
:)

المرحلة التانية دي بقى
هي اللي انا فيها دلوقتي
كنت من يومين بفكر اكتب بوست بعنوان ( فراغ ) لاني حاسة اني مفرغة
بس ملقيتش حاجة اكتبها علشان كل اللي جوايا فراغ
كنت هحط بوست فاضي والله
بس قولت بلاش احير الناس معايا :)

انا شايفة ان الحل الوحيد اننا نحاول نعمل حاجة جديدة او اي حاجة مش عارفة
بس ده كلام نظري بس
لكن ف الواقع هنفضل واقفين ف مكاننا لحد ما نفوق م الغيبوبة

في بقى رد فعل تاني غير ده :|
هو احمق اوي برده
ده بيحصل لي لما حد بيوجهلي كلام جارح بس بأسلوب غير مباشر وبكون مش متوقعة ده
بيكون رد فعلي كده :)
بعد ما الموقف بيعدي ببقى نفسي اقتل نفسي
الناس بتشتمني بس بالذوق وانا مبتسمة
مش عارفة ليه مش برد ولا حتى بنظرة
مع ان انا نظراتي حااادة جدا
يعني ممكن نظرة واحدة يموت اللي قدامي علطول :)
بس مش عارفة يمكن علشان بتبقى مفاجئة
بس حاجة تخنق بجد يعني

مش عارفة ليه كل ما ادخل مدونتك وافكر اعلق افضل ارغي كده
بس انا ماليش دعوة انتي اللي بتقري افكاري :)

تحياتي ليكي
ومعلش بعد كده ابقي امسحي تعليقاتي :)

طالبة مقهورة ..درجة أولى يقول...

بنت مهيسة

انا شوفت تعليقك واديت الرياكشن بتاع الصدمة :D

من أول بوست وانا قايلالك اننا شبه بعض
تقريبا من نفس الكوكب الفضائي

وحلوة فكرة نسيب البوست فاضي!!
وماله محدش ليه حاجة عندنا


رد الفعل التاني ده :)
انا مش بستخدمه غير مع الحد اللي ببقى عاوزه استفزه
وغالبا انا بتجنب التعامل مع الناس ديه
فانتي مختلفة عني ف حاجة اهوت

:)

لا بالعكس انا بحب الكومينتات الطويلة الرغاية ديه

انا اصلا رغاية

Heidenröslein يقول...

آآآآآي ..

أنا عارفة الإحساس ده

!! .. بس بتزيد عليهم إحساسك بالفرحة اللي من برا .. اللي بتحاولي تجاريها عشان تبقى مبسوطة مرة من نفسك .. مع إنك عارفة ومتكدة إنك لو سبتي نفسك شوية هتقعدي على جنب ومش هتبطلي عياط .. !

أنا كئيبة معلش :) .. بس انا تحاوزت المراحل دي وبقيت في اللي فوق :)

شكراً يا رضوى .. بتطلعي اللي جوانا دايماً

طالبة مقهورة ..درجة أولى يقول...

ضحى

لا انتي مش كئيبة
ولا انا كئيبة

بس ربنا يديم علينا نعمة الاحساس
:)

شكرا عشان انتوا اللي بتاخدوا بايدي

A. Ibrahim يقول...

بداية مدونتك أخراجها رائع - ما شاء الله - ربنا يوفقك ويزيدك كمان وكمان :))

سعات كتير بنحس بالاحساس ده مخنوقين من غير ما نعرف السبب
جوانا حجات مكبوتة عازين نطلعها بس مش عارفين
حاسين اننا مخنوقين بس مش عارفين ليه وازاي ومن امتا !!

جاتلي فترة كنت بعاني من اللي انت بتعاني منه بس اكتشفت حاجة عندي انني كنت محتاجة اصلح علاقتي بربنا مش اكتر !َ

بدات تاناي اروح الدار واحفظ قران واقرا كتب والحمد لله الحالة دي بدات تخف شويتين :))

NaDa يقول...

وزي ما أنتي قولتي
أكتر حاجة ممكن تخليكي تطلعي من الحالة دي
هي اللي حواليكي

ولا لما تبقي عايزة فعلاً تمسكي الورقة والقلم
وتكتبي اللي جواكي
أو حتى تحاولي تكتتبي عن أن جواكي فاضي
وما تعرفيش
بيبقى إحساس رخم بزياااااادة :(