9.1.12

عني وعنك


لما بفرح ببقى عيِّلة..............جداً
أما بقى لما بنبسط
وبكون طايرة من السعادة
...!! ببقى تافهة

(مش عارفة هي حاجة حلوة اني ابقى مبسوطة ولا وحشة اني ابقى تافهة)

أنت بقى بتخليني أسعد مخلوقة على وجه الأرض
وبتطمني..إني عمري ما هبقى لوحدي
،حتى لو أنا فعلياً لوحدي دلوقتي

بس ده ميمنعش إنك موجود في كل حاجة ، في فرحتي وخوفي وضحكتي ووحدتي ، وفي المزيكا اللي بسمعها والأفلام والشِعر والسياسة والهوتشوكليت والصور 
وفي كتبي ونضارتي والكلية والمذاكرة والأحلام  والأفكار الجنونية والخيالية ، وفي الموبايل اللي كل ما يرن أجري عليه أو تجيلي مسج أتوقع إنه أنت (حتى لو الفكرة مستحيلة أصلا
(

عارف أنتَ لما كل حاجة تبقى بتفكرك بحد كده ؟ لدرجة إن مفيش ولا حاجة قادرة تطلعه من دماغك 


وأنت مش بتحاول تفكر تطلعه من قلبك ، (ولو أنه حد أجمل بكتير من إنه يتحبس جواك) ، بس قلبك المكان الأمان ليه من وجهة نظرك  عشان هنا محدش هيقدر يضره قبل ما يموتك الأول.


متستغربش م الفكرة مهو أنت لازم تاخد بالك من اللي بتحبه برضه زي ما بتحاول تاخد بالك من نفسك.
وبتحاول تحميه بطريقتك ولو حتى غلط ،هتسأل وليه ده كله تعمله علشان حد؟ 
لأنه صعب اوي (أقصد مستحيل جداً)ا
!تلاقي حد مقاسك كده في الدنيا



..........

الصورة من فيلمي المفضل
Just Like Heaven