2.1.12

وبتاخدني المراكب وأنت...مش راكب


ما تفتكرش إني باتعب لما بتسافر

أنا بس بانساك .. واعافر
.
.

الغضب..
غضبي كله راح النهارده..عنادي وكِبري 
معادش ليهم مكان جوايا ناحيتك
كل اللي باقي
شوية زعل..مستخبيين ورا عيون دبلانين

ما تفتكرش إني نعش

أو كبايات فاضية

أنا كبايات عصير قصب مليانة ع الآخر

والخلق ما بتشربش
.
.

عاوز الحق...هم شوية زعل كتير..آد الدنيا كلها
زعلانة منك على الحاجات اللي عملتها ..
وزعلانة على الحاجات اللي معملتهاش
زعلانة على اللي بيحصلك واللي هيحصلي



كل العيون طالعة في الصورة ..

ولا بتلمعش
.
.

زعلانة على كل حاجة ليك علاقة بيها حتى الحاجات اللي مش متعلقة بيك
زعلانة عشان بشرب لبن دلوقتي
وبعيط بحرقة
وزعلانة عشان اللي بكتبه.. وهموت بحسرتي لو مكتبتوش

زعلانة عشان مش هعرف أقولك لما توحشني..أو أكلمك لما احس إني بحبك
وكمان عشان مش عارفة أبطل تفكير
وعشان كل ما بحلم بيك..مبتجيش لوحدك
بتجيب ناس توجعني معاك.



أنا مش باحبك .. بس باتبخر

وأقدر أعيش .. أقدر

لما تاخدني المراكب

وانت مش راكب ..
.
.

زعلانة عشان حاسة إني معملتش حاجة في حياتك..
مسبتش ورد وفراشات ملونة ورايا.
.يعني مكنتش موجودة..!!
أنا كنت خيال ملوش لازمة

.زعلانة زعل السنين..
اللي متقدرش مليون آسف تمسحه بكل بساطة.

 عشان أنت بإيدك..عملت كل حاجة تدعو للفراق..وأنا كملت
وأنا مصدقة إن قضبان القطر بتتقابل في نقطة في الأفق
بس لما القطر وصل بعيييييييييد...ملقتش إنهم اتقابلوا !
ولا عمرهم هيتقابلوا..

ما تشدنيش من شعري يا عصفور

أنا مش ح أطير والحبيب من كل نور غايب

الأرض زُهرية فاضية واللبن رايب

والليل معبِّي ف زكايب في انتظار النور.

...........



الارض زهرية فاضية - لبهاء جاهين *

هناك 13 تعليقًا:

هاني النجار يقول...

الكلام كتير .. لكن حتى القلم زعلان

شمس النهار يقول...

ايه الفضفضة دي كلها

كل سنة وانتي طيبة

وكويس انك اخيرا سبتي التعليقات
علشان اسلم عليكي

:)

Miss LoZa يقول...

زعلانة عشان حاسة إني معملتش حاجة في حياتك..
مسبتش ورد وفراشات ملونة ورايا.
.يعني مكنتش موجودة..!!
أنا كنت خيال ملوش لازمة

انا عيطت وانا بقرأ البوست :((

sara adel draz يقول...

تفتكرى لو كانت المراكب فيها مكان ليه كان سابها ومركبش؟
يمكن العيب فى المراكب .. يمكن كانت زحمة وعشان كده معرفش يقرب ..
يمكن خاف احسن يغرق لو المراكب طردته
يمكن خاف ..
مين عارف..
..
بوست اكثر من رائع يا رودى بجد
أحييكى

faroukfahmy58 يقول...

رودى
وقفت طويلا عند عبارة
وبتاخدنى المراكب وانت مش راكب
سبحان الله نحن نركب ونعانى معنة الركوب وهوه ولا هنا ولا فى المركب طب هوه فين ؟؟؟؟؟؟؟؟؟

mohamed amer يقول...

اختيار جميل

تحياتي
محمد عامر

لـــولا وزهـــراء يقول...

.زعلانة زعل السنين..
اللي متقدرش مليون آسف تمسحه بكل بساطة.

عشان أنت بإيدك..عملت كل حاجة تدعو للفراق..وأنا كملت
وأنا مصدقة إن قضبان القطر بتتقابل في نقطة في الأفق
بس لما القطر وصل بعيييييييييد...ملقتش إنهم اتقابلوا !
ولا عمرهم هيتقابلوا..

......................

الصورة صعبة والكلام اصعب

لولا

♥نبع الغرام♥♪≈ يقول...

وحشتينى اوى

ياحبيبتى اخبارك ايه

بجد كنت مفتقداكى اوى

كل سنه وانتى طيبه

I'm The CraZy One يقول...

هو ده بالضبط اللي انا عايزة اقوله =((( انا زعلانه اوووي

نهر الحب يقول...

آآآآآآآآآآآآآآآآآآآآآه
آآآآآآآآآآآآه
وجعتني كلماتك اووووي اوووي

RoMa يقول...

جامدة هبل بجد
بس كأيبة سيكا
صباحو يا رفيقة , استمرى

NaDa يقول...

وأنا زعلانة عشان زعلك .

نادي حواء يقول...

شجن كتير واضح