الأسبوع خلص !! تنهيدة.
لأ لأ لأ مش بتتقال كده..قوليها زي سارة
..............تنهيييييييييييييييييدة
*
ويك ايند طويل يتكون من يوم الجمعة والسبت بحالهم !! ربنا يزيد يارب
*
محتاجة حفلة لعلي الحجار..وعاوزة آكل بطاطا مشوية...وحمص الشام على الكورنيش..وألبس شوز بكعب وميعورنيش المرة ديه...
محتاجة اتعلم السواقة وابقى بيرفكت عشان اعمل رخصة..نفسي في قصب..
*
عاوزة اشوف كل اللي بحبهم..وعاوزة اكتب واكتب واكتب واكتب...
انا مبحبش الفرانكو بس ببكسل أحول الكيبورد! غباء هه !
*
اه وكمان انا عندي فوبيا...وموسوسة...وزهقت من السجاير..وبكره الشاي...ووحشني النسكافيه بتاعي...ووحشني جهاد والاء ومروة وبسكوتة واسراء واسراء وعمرو ورغدة ومحمد سلطان ومستر عماد وحاجات كتير اوي وناس اكتر واكتررررر والتدوين مفتقداه بشدة...
*
الدكاترة في هندسة حلوين..أغلبهم..
*
قال لي إن الكلاب كلها بتعُض..مهما كانت أليفة .صدقتك بس كل ما بفتكر التعبير ده بضحك
*
بشوف الناس صغيرين اوي ساعات..وساعات تانية بشوفهم كبار
وفي الحالتين بيطلعوا... فشنك
أعواد كبريت مش بتدفي ولا بتنور شمعة..عشان واخده رطوبة عالية
*
دايماً بنسى السطر اللي على مراية التاكسي وأنا بتعامل مع الناس..شكل لازم اشتري تاكسي عشان افتكر
"objects in the mirror are closer than they appear"
*
مش لذيذة خالص الفلوتشارت ديه..!مبحبهاش
وانتي مالك ومال الفلوتشارت؟
أصلها عندي ف المنهج..باين كده !!
*
أنا بنسى...بنسى كتير...بنسى جامد أوي
بنسى تفاصيل اللحظات الحلوة..بنسى الأشكال والصور...
مبنساش الأماكن ..بس الأشخاص صورهم بتتسرسب من دماغي
*
باين إني كده أُغرمت بالكلية في الشيخ زايد..بس معنديش استعداد اروحها سنة كمان كفاية :)
*
على فكرة أنا مش ببص لحد في عينه غير لما بكلمه..
وده بيخيليني مبشوفش ناس كتير حواليا!
*
حالياً أنا في مرحلة المراقبة..
observing like a hawk
مبفوتش تنتوفة
ولم استعرض مواهبي وقدراتي
yet..
*
لما الحلم والواقع يتلامسوا في نقطة واحدة
بيبقى الواقع أحلى بكتير اوي اوي اوي من الأحلام
*
للمرة الأولى في تاريخي الروديهي الطويييييل احس باستقرار نفسي كده وسعادة ورضا
ولكن...تواضعي يا رضوى تواضعي تواضعي
الحمد لله يارب
*
طاقات النور كترت اوي
بس انا مقصرة مع ربنا اوي!!
*
هوا ليه بيديني حاجات كتير حلوة مع اني مقصرة معاه؟؟
انا اسفة يا ربنا نفتح صفحة جديدة بقى..وهبقى كويسة خلاص :)
*
بالموووناسبة
وحشتيني يا أختيتي :)
*
بطلت سياسة من مدة..بطلت اقرا اخبار حتى..بس البلد مش كويسة..مش اوي يعني !
*
عندي كويزات..يا ترى هلحق أحل حاجة ؟؟
*
انا اسفة ليكِ على فكرة...عشان وعدتك اني هبقى هنا ومعرفتش اوفي بوعدي بعد ما ظروفي اتغيرت
مش عارفة استوعب المزيد حالياً
ومتفهمنيش غلط..أنتِ مش مزيد بالنسبالي..أنتِ أنا بس من نوع آخر
أنا بحبك أوي على فكرة ومتزعليش مني عشان مبقصدش
*
بحب أخبي الحاجات الحلوة أوي..عشان متتحسدش
وعشان الوقت المناسب لما ييجي..يبقى في جيبي مفاجآت لم تُكشف من قبل
*
كانت معكم
The happy, talkative, reasonable, crazy Version of Me ;)
