6.10.11

أتذكَّرُ كيفَ كان العالم قبلَ أن يصطدمَ كطائرٍ بزجاج




أنا مبقتش مغرورة..أبداً والله
الناس بس اللي مبقوش فاهمين 
وبقيت بخسر كل اللي بحبهم
عشان هم السبب
هم اللي سابوا الحاجات الصغيرة تقع وتتفرتك مليون حتة
وأنا مبحبش اللي بيكسروا الكُبَايَات الإزاز....
عشان مش هيعرفوا بعد كده يشربوا وهيموتوا من العطش !ا 
أنت فاهمني صح؟

( بيوحشوني أوي..لدرجة بتفرفت الجزء الباقي المكسر من قلبي)


بص هو أنا مكنتش حاسة بحاجة..زيها بالظبط
هي زيي بتحس زيي وبيجيلها أرق زيي وبتحاول بكل طاقتها
عشان كده احساسنا مشترك..لما بنفرح بنفرح سوا
مش شرط نفس السبب يفرحنا بس في نفس التوقيت
عشان كده لما بزعل أوي وبحس بالوحدة زي دلوقتي بخاف عليها
وببعتلها أي مرسال يفرح قلبها الصغيور

(يمكن تقولي إنها فرحت...فاحس ان الفرج قريب )


مشكلة...مش بعرف أحس إني وسط الناس وأنا حاسة إني لوحدي
بيتفرض عليا أدور على كلام..وأقوله..وأرسم ابتسامة واسعة..واتفاعل..وأسمع اللي بيرد
لكن مبعملش ده...بحس إن الشخص اللي بيتكلم تافه..
 أيون تافه حتى لو كان نيوتن وهو بيكتشف قانون الجاذبية
ومبلاقيش كلام لأن عقلي بيبقى متجمد
ومش بعرف أسمع..عشان كده كنت بسرح والناس بتكلمني في الكلية
وعشان كده مكتسبتش صديق واحد طول الأسبوع

(أصلك مش هتحس بالناس طول ما بينكوا ألف حاجز وبوابة بقفل معهمش مفتاحها)



 النهارده بعد أسبوع تقريباً صحيت وأنا حاسة..إحساس بشري أيا كان نوعه 
حسيت بالغضب...مني
ومنه
ومنهم
وحسيت إني مش لوحدي..وإني ممكن مخسرش الناس
وإني هرجع كل حاجة كويسة 
أنا اتخلقت عشان أصلح الحاجات 
الناس تعمل اللي هي عاوزاه ومش بهتم مادمت مقتنعة باللي بعمله..
أنا بصلح الناس..وعشان كده لازم أبقى أحسن منهم

(على الأقل أعمل اللي يخليني راضية عن نفسي)


بالمناسبة برضه أنت الوحيد اللي ممكن تقلب حياتي رأساً على عَقِب...وأنت الوحيد اللي بترجعلها التوازن
وبسمعك وأنت بتقولي كل يوم...ده مش أنتِ ..وبفضل أدور عليا

(حتى لو أنت مش موجود ومش هتبقى موجود عمرك)

 هو فعلاً المشكلة.....إن الشخص اللي جوايا ده...مـــــــــــــــــ أنا ـــش
والمشكلة الأهم إني محتاجة كيكة بالشوكولا حالاً اهو :)


.......
العنوان لسوزان عليوان