13.9.11

بحبك..وانطلق عصفور




أحياناً بحلم إني أطير...دايماً بحلم إني أطير
أسيب كل حاجة مقيداني وماسكاني
أسيب الناس والدنيا والمشاكل..وكل حاجة ممكن 
تمنعني من الطيران لشباكك في نص الليل
وأول ما أوصل عندك أقولك :أنا جيت...أتخضيت مش 
كده؟

كنت هتعمل إيه ساعتها من المفاجأة؟...أكيد هتضحك  بشكل هستيري الضحكة اللي بحبها اللي من القلب  ديه وهتضحكني معاك والناس تسمعنا
ويتقال علينا اتنين مجانين...
مجانين آه بس ملهمش غير بعض

كان نفسي أتحرر حتى مني.....أيوة مني عشان ساعات كنت بمنع نفسي عنك

...

لما بصحى الصبح لوحدي مش على صوتك..
بحس إني مش قادرة أتحرك
ولما بفكر إنك مش هتتصل أصلاً..
بحس إني غرقانة بدموعي من جوايا
ولما الموبايل أمسكه ومقدرش أكتبلك حرف واحد في رسالة..
بيبقى فاض بيا
  ببقى عارفة إن اليوم بدأ وهقاوم..هحارب إني مش  أتفتت مليون حتة..وهفضل مع كل نفس
أدعي: يارب لصمني لآخر اليوم لحد ما أنام من كتر التعب ...والملل من الوجع
وبصحى تاني يوم..أسوأ من اللي قبليه
مبقتش أقدر أقاوم الجاذبية وهي بتشدني..متلازمة اليأس بتسيطر عليا كلياً
ومفيش سبب أقوم علشانه  الصبح
مفيش أنتَ !!!

...

عندي شوية صداع هما كتير مش شوية 
بصراحة..ومبيأثرش معاهم الأدوية نهائي.

وحبة أرق كتير.. مبيروحوش غير بحواديت خيالية من  أنواع سندريللا وسنو وايت وأنت عارف الباقي

عندي أزمات تنفسية لما ببقى زعلانة من الدنيا
وبحتاج حد يتنفس جمبي عشان يعلمني كنت بعمل كده !إزاي من الأول

عندي حبة دموع كتير محبوسين بيطلعوا في الخباثة كل ما بعمل نفسي بضحك..
.وكام ضحكة بتطلع في عز بكايا

عندي شوكليت كيك ومزيكا جامدة ونسكافيه ..وعندي شوكولا كتير من اللي قلبك بيحبها
وفيه كام فيلم مشفتهمش..عشان مينفعش أشوفهم لوحدي
عندي أحلام كتير خايفة متكتملش..وأحلام تانية لسه مظهرتش

والفراشات اللي بتنور في الضلمة..عاوزين حد يعلقهم تاني في السقف عشان يساعدوني أطير أول ما .أغمض عينيا

عندي زرعة فل مش بتاعتي بسقيها وباخد بالي منها
وشرابين بيكملوا بعض عشان يدفونا في عز الشتا

عندي مساحة كبيرة في قلبي..
محدش يسعها غيرك


...


البوست ده رقم 300 في البلوج..يستحق الشرف ده من رأيي :)
*العنوان أغنية لعلي الحجار