13.9.11

بحبك..وانطلق عصفور




أحياناً بحلم إني أطير...دايماً بحلم إني أطير
أسيب كل حاجة مقيداني وماسكاني
أسيب الناس والدنيا والمشاكل..وكل حاجة ممكن 
تمنعني من الطيران لشباكك في نص الليل
وأول ما أوصل عندك أقولك :أنا جيت...أتخضيت مش 
كده؟

كنت هتعمل إيه ساعتها من المفاجأة؟...أكيد هتضحك  بشكل هستيري الضحكة اللي بحبها اللي من القلب  ديه وهتضحكني معاك والناس تسمعنا
ويتقال علينا اتنين مجانين...
مجانين آه بس ملهمش غير بعض

كان نفسي أتحرر حتى مني.....أيوة مني عشان ساعات كنت بمنع نفسي عنك

...

لما بصحى الصبح لوحدي مش على صوتك..
بحس إني مش قادرة أتحرك
ولما بفكر إنك مش هتتصل أصلاً..
بحس إني غرقانة بدموعي من جوايا
ولما الموبايل أمسكه ومقدرش أكتبلك حرف واحد في رسالة..
بيبقى فاض بيا
  ببقى عارفة إن اليوم بدأ وهقاوم..هحارب إني مش  أتفتت مليون حتة..وهفضل مع كل نفس
أدعي: يارب لصمني لآخر اليوم لحد ما أنام من كتر التعب ...والملل من الوجع
وبصحى تاني يوم..أسوأ من اللي قبليه
مبقتش أقدر أقاوم الجاذبية وهي بتشدني..متلازمة اليأس بتسيطر عليا كلياً
ومفيش سبب أقوم علشانه  الصبح
مفيش أنتَ !!!

...

عندي شوية صداع هما كتير مش شوية 
بصراحة..ومبيأثرش معاهم الأدوية نهائي.

وحبة أرق كتير.. مبيروحوش غير بحواديت خيالية من  أنواع سندريللا وسنو وايت وأنت عارف الباقي

عندي أزمات تنفسية لما ببقى زعلانة من الدنيا
وبحتاج حد يتنفس جمبي عشان يعلمني كنت بعمل كده !إزاي من الأول

عندي حبة دموع كتير محبوسين بيطلعوا في الخباثة كل ما بعمل نفسي بضحك..
.وكام ضحكة بتطلع في عز بكايا

عندي شوكليت كيك ومزيكا جامدة ونسكافيه ..وعندي شوكولا كتير من اللي قلبك بيحبها
وفيه كام فيلم مشفتهمش..عشان مينفعش أشوفهم لوحدي
عندي أحلام كتير خايفة متكتملش..وأحلام تانية لسه مظهرتش

والفراشات اللي بتنور في الضلمة..عاوزين حد يعلقهم تاني في السقف عشان يساعدوني أطير أول ما .أغمض عينيا

عندي زرعة فل مش بتاعتي بسقيها وباخد بالي منها
وشرابين بيكملوا بعض عشان يدفونا في عز الشتا

عندي مساحة كبيرة في قلبي..
محدش يسعها غيرك


...


البوست ده رقم 300 في البلوج..يستحق الشرف ده من رأيي :)
*العنوان أغنية لعلي الحجار

هناك 27 تعليقًا:

Miss LoZa يقول...

لالالالالالالالالالالالا
حرام عليكو بجد
كل شوية واحدة تكتب بوست رومانسى
وانا انهار بقه
يا حلاوتكم
يا جماعة مش هينفع كده
هو انا هفضل كده كتير ولا ايه
اتصرفوا بقه هه
هههههههههههههههههه
تحفة تحفة تحفة بجد يعنى
استمرى استمرى

لبنى أحمد نور يقول...

رضوى.. انتي جميلة :)

مبروك البوست الـ300 وعقبال الـ30000
:D

خواطري مع الحياة يقول...

احساس جميل جدا
بوست يحسس حتى الي يقراءة بالحب والرومنسية

مبروك عليك البوست 300

تقبلي مروري ياقمر ^_^

The illusionist يقول...

انا عندى صداع

ومش بقيت اعيط زيك على فكره

هههههههههههههههه

جيبت شاى بالفراوله والخوخ على فكره

ومبروك البوست التلتمياوى يا مقهوره

واخيرا اخيرا

بطلى عياط بقى

Ramy يقول...

(:

مش عارف حاسس البوست قوى (:


و ايه ده 300 بوست طيب (:

مبروووووووك عقبال 3000 ان شاء الله

(:

_________________________
I have added cool emoticons to this message.
To see them go to http://x.exps.me?9964217694904afa96c69c5a7dcdc95e

لبنى أحمد نور يقول...
أزال المؤلف هذا التعليق.
طالبة مقهورة ..درجة أولى يقول...

Miss Loza

معلش يا ميهو حقك عليا انا
ان شاء الله بكرة تتجوزي
وتلاقي حد ترخمي عليه للأبد
:)
منورة يا عسلية

Heidenröslein يقول...

و أنا كمان



بحبك :)

Miss LoZa يقول...

يسمع منك ربنا
قادر يا كريم
هههههههههههههههههه

طالبة مقهورة ..درجة أولى يقول...

لبني

أنتِ كده بتحرجيني جامد بجد ..:)
انتِ عسولة أوي اوي

ربنا يسعدك يارب
الله يبارك فيكي

طالبة مقهورة ..درجة أولى يقول...

خواطري مع الحياة

رشا الجميلة..ربنا يخليكي

وعقبال ما تكملي انتي المليون بوست

طالبة مقهورة ..درجة أولى يقول...

The illusionist


هيه كتبت الاسم صح لوحدي..طول عمر الكلمة ديه معقداني

انا مش بعيط انا حلوة اهو..مش بعيط :)

انا بحب الفراولة بس مبحبش الشاي..اظن ممكن اجرب الشاي بالفراولة ابعتلي مج حلو ..:)

محدش هيعيط كلنا حلوين

طالبة مقهورة ..درجة أولى يقول...

راميييييي

اخي العزيز جدا

الحمد لله انك حسيته..وشوفت بقوا 300 !! مش كتير اوي
بس كتير برضه :)

ربنا يخليك يارب

طالبة مقهورة ..درجة أولى يقول...

ضحى..


:) :)

حبيكي اكتر على فكرة

طالبة مقهورة ..درجة أولى يقول...

مها..

حاسة اني بشحت عليكي والله D:
تكونيش بنتي وانا مش عارفة

Miss LoZa يقول...

هههههههههههههههههه
بنتك ؟؟
ليه هو مين فينا اكبر
هههههههههههههههه
مش مهم مين اكبر طالما هتجبيلى عريس كميل ::$
ههههههههههههههههههههه

كلمات من نبع احساسي يقول...

هو دة القهر من الرومانسيه هههههههههههههههه مبروك عليكى التلتوميت بوست :):)

بس بجد بوست توحفه لدرجه تذهل بجد مازالت مندهشه وحواجبي مرفوعه من جماله :):)

طالبة مقهورة ..درجة أولى يقول...

مها..

نسيت اقولك ان عنده عربيييية :D

طالبة مقهورة ..درجة أولى يقول...

كلمات من نبع احساسي

طيب الحمد لله انه عجبك :)
وانبسطت اوي لما جيت عندك وشوفت البوست بتاع العيد ولاقتني هناك..

Miss LoZa يقول...

اوباااااااااا
تفتكرى انك كده هتغرينى ؟؟
لا لا
ولا بيفرق معايا الكلام ده نوهائى
اهم حاجة لاموووووووغ
حححححح
ههههههههههههههه

mena يقول...

البوست رائع جدا قد ما انتى رائعه وجميله حستو اوى والله

مبروك على 300بوست وعقبال ما اقدر احصلك تعالى بقى اقرصك ف ركبة يمكن احصلك بوستاتك ولا ده ف الجواز بس ههههههههه اشتقتلك

ranim يقول...
أزال المؤلف هذا التعليق.
I'm The CraZy One يقول...

أدعي: يارب لصمني لآخر اليوم لحد ما أنام من كتر التعب ...والملل من الوجع

مش عارفة المفروض ازعل و لا انبسط ..احساس هولامي لولبي بعد ماقرات البوست :)

مبروك البوست ال300 يا صديقتي العزيزة :)

sara adel draz يقول...

تحفة
تحفة
تحفة
تحفة
.....
ولا كلمة هتتقال بعد كلامك الكبير دهوت
^_^

فتاة من عالم آخر يقول...

بعد كلامك دا بجد بجد مش هعرف أتكلم ولا أعلق بس مش هقدر أقول غير إن كلامك مؤثر أوى أوى أوى

غير معرف يقول...

الموضوع جميل مشكوين

ana يقول...

كل كلمه قولتيها لمستني اوى وقولتى كلام يمكن انا بحسه ومبقدرش اصرح بيه ولو لنفسى حتى تسلم ايديكي بجد واحساســــــــــــــــك