نصيحة أخوية كعادتي: البوست عك شخصي له علاقة وثيقة بالواقع وضار بالصحة جداً
ثانكي ع المرور ومفيش كومينتس :)
عندي مليون حاجة متأجلة...قائمة مهام غير منتهية
شوبنج وكشف نظر وتغيير لوك المدونة وتقديم الكلية وترتيب الأوضة بشكل مريح بالإضافة لكنس بعض المشاعر والذكريات البائسة..
ملحوظة: المشاعر مش بتتكنس..بتتحس بس !!
..
عندي سبب جديد إني أكره الدكاترة..انهم مبيفهمونيش
قلتله اني حاسة الأرض بتشدني...ضحك عليا!!!!
ملحوظة: أنا آسفة يافندم بس أنا فاشلة في تعبيري عن المشاعر واللي بحسه مش جديد يعني.
..
ممكن طلب:....محدش يتوقع مني أي حاجة..يمكن علشان لما تشوفوا مني أي حاجة حلوة تبسطكوا اوي
ولو عملت حركة مش قد توقعاتكوا متزعلوش ! الموضوع بسيط خالص اهو
..
أنا قلتلك إن الحقيقة بتوجع وانت أصريت تعرفها..يبقى متلومنيش إنها جرحتك أوي
بس لعلمك أنا أرتحت ...أو مرتحتش مش متأكدة..بس اللي اتعلمته إن حتى الحقايق بنعتذر عنها
يعني مش هقولك الشمس بتطلع من الشرق وأُتبِعها بــ أنا آسفة لأنك نفسك تطلعها من الشَمال.!
..
بقيت مؤمنة تماماً إنها لما بتقفل..بتقفل من كله..وكأن الخسارة بتتجمع للحظة واحدة وتطلع بكل قوتها
عاوزة أبقى لوحدي جداً..بعُك الدنيا مع ناس كتير..
أنا متقلبة لكن عمري ما بغير أماكن الناس
ماداموا يستحقوا الأماكن ديه..
تعقيب: ياريت نفهم ده كويس..اللي بحبه مبفرطش فيه إلا لو هو السبب
........
ملحوظات نهاية البوست 1: بحب ميريدث وكرستينا اللي في الصورة..وحسيتها اوي النهارده على الأقل..
كنت محتاجة حد أو حاجة معرفتهاش..بس تعاملت مع الموقف بدون أي خساير تُذكر..
لازم أختار كريستينا ليا ولو إني عارفة هي مين أساساً ;)
ملحوظة 2 : لسه مخلصتش البوست بس مضطرة أقوم
ملحوظة 3: ويلكم باك يا روضا :)
......
انتهى البوست أو بدأ مقررتش بالظبط
سلامُ عليكو
