واجب تحذيري: أنا معرفش ليه كتبت الرغي ده..بس ليا مزاج انشره..
نصيحة أخوية كالعادة متضيعوش وقتكوا في القراية ..مفيش كومينتس ..البوست شخصي:)
ساعات بييجي عليا أوقات مبقدرش أحارب فيها..بصحى الصبح مش بقدر أقوم من على سريري وأمارس هوايتي المفضلة وهي التحديق في السقف
مبقدرش أحارب ولا أقنع الناس بحاجات أنا محتاجاها فعلاً..ببقى عاوزة أهدى اوي وأمنيتي الوحيدة هي إيقاف زن الصداع والنوم ...للأبد أو بالأحرى لحد ما الحالة تخلص
ياريت ساعتها كل حاجة تقف..الزمن..الناس..والإحساس ده
بيبقى نفسي أوي في حد يرتب الأوضة ويشغلي أي فيلم ويشحنلي الموبايل اللي بقاله 3 ساعات بيعيط جمبي(تقريبا فصل!)
ولو أضطريت أخرج بنتظر حد يوقفلي تاكسي وميسبنيش لوحدي ويجبلي شوكولاته كتير لحد ما أفوق ويعملي أكل بحبه( يمكن نفسي تتفتح)
وياسلام لو حد يقوم بالحاجات اللي مأجلاها من مدة وينفذ قائمة المهام القديمة
يعني مثلا يعملي كشف نظر جديد ونضارة جديدة ولينسز
ويحجزلي في الكورس ويجبلي آيس كريم ويديني الدوا اللي بنساه اكتر ما بفتكره
أنا عارفة إن فيه ناس بتتعب أكتر..وبتستميت
في مجتمع صعب زي مجتمعنا وتاء التأنيث بالذات نزولهم في حد ذاته يعد مخاطرة وحرب كبيرة في بعض الأماكن..
بس لما الواحد كل يوم من حياته تبقى حرب وتحديات هيزهق وأنا لما بزهق بيحصلي كده..مبقدرش أحارب
..........
مِلَحْوَظَة :العنوان من أغنية لفريق 'وست لايف'
(واجب شكر:أحب اشكر الضغط المنخفض اللي أجبرني انام طول اليوم..واشكر صاحب الوايرليس اللي سايبه مفتوح عشان مقومش من السرير)
(واجب اعتذار: لكل صحابي اللي نتيجتهم ظهرت النهارده ومكنتش موجوده عشان افرح معاهم وملحقتش اقولهم مبروك ف الأول)
..
