متضحكش

أنا مبحبش أوضتي
مبحبش البينك اللي فيها ولا الأبيض البهتان ده
حتى التقليمة محسساني إن الأوضة ضيقة عليا .
بكره إن مفيهاش نجوم في السقف ،
وإني مش عارفة أمسك ألواني الخشب وأشخبط عليها
وبكره إن رف اللعب بقى فاضي ومبقاش عندي دباديب..

إنتَ متخيل يعني ايه أوضة من غير دباديب كبيرة تحضنها وإنتَ نايم! ديه كارثة
هكلم مين أنا دلوقتي ومين يتفرج معايا على الأفلام الرومانسية العبيطة ويعيط جمبي..!

أنا عارفة إنك هتقولي حاولي تخليها بتاعتك وتحبيها
حاولت والله

مسكت الشاكوش ومعرفتش أدُق مسمار في الحيطة عشان طلعت ناشفة اوي عليا
وجبت بالونات كتير
وبوسترات اكتر
وطلعت الكتب اللي بحبها وهدايا صحابي بتاعت آخير عيد ميلاد ليا ..وطبعت الصور بتاعتنا
بس لسه مقدرتش اخليها بتاعتي
أنا محبطة اوي...ومش عارفة أدق مسمار..ومبقاش عندي دباديب..
ومعنديش اوضة ليا بتاعتي:(
وحاسة اني سخيفة اوي عشان لو حد قالي انا مكتئب بسبب اوضة كنت هضحك عليه
اوعى بقى تضحك عليا
ممكن ؟

..