3.8.11

قلبك بيشوف من غير نضارة


لازم تفهمي وتشوفي بوضوح..
لازم تشيلي السواد من على قلبك

متخافيش من اللي مبتشوفيهوش..
شوفيه الأول وبعدين خافي..

خافي اوي لحد ما النوم يطير من عينيكي بالليل
وهتحضني ساعتها كل الدباديب اللي عندك وبرضه مش هتطمني..
حضنهم مش هيدفيكي

أصلك مش فاهمة إن الخوف ده أكبر من أي خوف عرفتيه
أعملي نضارات جديدة وعدسات..يمكن...
لثانية واحدة عنيكي توصل للنور

وخدي بالك: عمرك ما هتشوفي غير اللي لازم تشوفيه
مش اللي المفروض تشوفيه
افهمي الفرق
وساعتها مش هتحتاجي أي حاجة تانية
لما قلبك هو اللي يشوف.


...

ملحوظة: كل سنة والأخوة المتابعون للبلوج طيوبين وأمورين
متأخرة وانا عارفة لكن حوار التنسيق كان شاغلني
بالمناسبة اتقبلت أول رغبة ليا وحصلت على هندسة كايرو
كنت فرحانة أوي أوي أوي بالخبر ده

وبغض النظر عن كل شيء أنا متفائلة
ومستمتعة ان الجامعة أول سنة في 6 أكتوبر..حيث الهدوء
لاب توبي ف شنطتي واليو اس مودم معايا ..بس مفيش سندوتشات للأسف :(
واعيش بقى
ملحوظة هامة تتبع الملحوظة السابقة: الرجاء من الباشمهندسين ميحاولوش يهددوني بالاصفار اللي هاخدها والصعوبة اللي هتقابلني..سيبوني اتصدم لوحدي واجي اغرق البلوج بدموع الندم..معنديش مشاكل أنا :D

صحيح كان المفروض إني مشتركة في حملة التدوين لشهر 8 بس مبدأتش من أول يوم
هكتب زي ما هقدر بقى
واضح إني مبعرفش ألتزم بأي حملات تدوينية وهذا إقرار مني بذلك

ملحوظة 2 : مبقتش عارفة هفتح أنهي بوستات وهقفل أنهي المهم عندي إني بكتب..بكتب لرضوى فقط

كل سنة وانتم طيوبين وعسولين مرة كمان
يمكن تشفعلي تقصيري

سلامُ عليكُ

هناك 8 تعليقات:

Ramy يقول...

مبرووووك يا بشمهندزة (:

عقبال الشهادة الكبيرة (:

ملحوظة

1- ملاحيظك اكبر من البوست على فكرة (:

2- أنتى عامله زى بالظبط مش عارف انتظم فى اى حامة تدوين

3- أكتبى فى المدونتين انا فهمت ان انتى محتارة تكتبى فى اى مدونة
لأنك زى ما قلتى بتكتبى لرضوى (:
و بعد كده ممكن تعملى بوست فى المدونة التانية تنوهى ان انتى كبرتى (:(:(:

.........

البوست بقى

عارفه نفسى هى تشوف البوست ده

مش علشان هى جواها سواد لأ بس عارفه الخوف من الحياه لوحده يكفى ان يكون سبب لضلمة الحياة حوالينا

مش مديه قلبها فرصة أنه يشوف

ده سر

(:

طالبة مقهورة ..درجة أولى يقول...

رامي..الله يبارك فيك وينورلك طريقك قادر ياكريم :)

بنشكح اوي اوي اوي لما بشوف صورتك قبل الاسم حتى

بالنسبة للملاحيظ ما انا اخدت بالي برضه بس اعمل ايه دول مش اساس البوست ده مجرد هوامش
وواضح ان الظرةف بتكون اقوى مننا في تلك النقطة :)

تصدق انا كنت ناوية اقفل البلوج التاني اصلا
مبقتش اروق لكتابة أدب ساخر
مبقتش اعرف اضحك ع الهموم
هوا انا من امتى بعرف اساسا!!
هسيبها لحين ميسرة يمكن ارجع اكتب فيها ف يوم :)

تعرف يمكن كتير زيها كده بيخافوا المجازفة بيخافوا كتير اوي ومبيفكروش صح..بيحتاجوا حد يطمنهم الاشخاص دول كل شوية..يمكن ف يوم يبقى عندها القوة الكافية وتتحرر وتشوف اللي لازم تشوفه..

:)
منورني يابو قلب طيب

sara adel draz يقول...

افهمي الفرق وساعتها مش هتحتاجي أي حاجة تانيةلما قلبك هو اللي يشوف
..
وهو دا معنى البصيرة اللى بدور عليها من زمان
..
نسيتى خبببببببر ياهانم
انك فزتى فى مشروع الكتاب بتاع ال 100 تدوينة
^___________^
انا بحقققققققد عليكى لانى طلعت الاخيرة بجدارة ومفزتش الحمدلله ههههههههههههههه
بركة دعاكى يا بنتى
..
وبالموناسبة اوعى تبقى تحولى على دريم بارك وانتى فى الطريق
انا عارفااااااااااااااااكى شقية
..
ودمتِ مش ملتزمة بحملات التدوين..^_^

طالبة مقهورة ..درجة أولى يقول...

سارة

اتصوري عمالة انسى الخبر ..مش عارفة اعمل فيا ايه بصراحة ^_^

هحاول افتكره البوست الجاي بقى

وبالمناسبة..اشوفك ف دريم بارك هع ;)

دعاء العطار يقول...

رضوتى كبرت كده رسميااااا هو انتى صحيح كبيره دايما بس دلوقتى محسوبه ع الدوله كبيييره (: (:

نيجى للبوست بقى

فيه ناس بتفضل انها ماتشوفش الحقيقه عشان بتوجعهاا

بتحاول توهم نفسها وتشوف اللى هى عايزه تشوفه بس مش اللى لازم تشوفه

وللاسف

عاجلا او اجلا بيضطروا يشوفوا اللى لازم يشوفوه ومن هنا بتكون الصدمه

عشان كده الصح اننا نحاول نشوف بمزاجنا احسن مانشوف غصب عننا

احلى حاجه انك تكتبى لرضوى وبسسسس (:

طالبة مقهورة ..درجة أولى يقول...

دودو..انا بقول كده برضه :)

منورة يا عسليتي

I'm The CraZy One يقول...

ana aret el post dah dishelion marah !!

3abkareyah ya roudy :)

Miss LoZa يقول...

حلو اوى البوست ده اولا
ثانيا مبروك يا ستى على الكلية كبرتى اهو بقه هههههههههه وكمان هندسة القاهرة
كده بقيتى فوش جامعتى ولازم اشوفك بقه ها
مستنياكى :)