P.S. the post is all about me, just me talking to myselfخلينا واقعيين..أنتِ بترضي بكل حاجة ربنا يكتبهالك..
بس المرة ديه مش هترضي
عشان كده لو ربنا خذلك متزعليش..أصلك تستاهلي
أخطائك كترت اوي..وذنوبك بقت لا تحصى..
.
.
نفسي افهم
امتى آخر مرة عملتي حاجة تسعد غيرك!!
أنا......مش فاكرة
.
.
أنتِ بقيتي وحشة اوي على فكرة
للدرجادي...يمكن عندك حق!!
.
.
متصدقيش نفسك..أنتِ لبستي روح غير روحك..وده نهايته الهلاك
يبقى محدش هينجو من الهلاك كده
مين قال؟؟
.
.
مش كل الناس زيك..بالأحرى محدش زيك
.
.
ممكن يا كل حاجاتي متمشيش
يا كل اللي باقي مني متضيعش
أصل أنا من غيركوا تايهة ومش عارفة أرجع
.
.
متعيطيش ومتخليش حاجة توجعك
أنتِ عارفة إنك قوية..قوليها ورايا
أنا قوية كفايا..
أنا................مش قادرة أقولها
.
.
ليه بطلتي تكتبي.؟
ليه بطلتي تقري؟
ليه بتخافي تتكلمي؟
ليه بتهربي من نفسك؟
ليه بقيتي مش طايقة تفكري؟
مبترديش ليه فين صوتك؟
.
.
فاكر أغنية Avril
When you're gone
سؤالي ليك بقى: هوا انت فعلا gone؟
.
.
ما احتمالية إني اسيب الدنيا واختفي مع حد ..حد واحد بس؟
0%
.
.
ممكن بس افتكر أنا امتى بطلت أكلم ربنا ؟وليه؟
أمتى الصلاة مبقاش ليها طعم زي زمان
وليه مبقتش من قلبي..زي زمان برضه
.
.
يارب أغسلني من جوا
نيمني وأنا مطمنة
يارب دخلني الجنة مع اللي بحبهم
يارب أموت شهيدة وأنت راضي عني
يارب...هوا أنت لسه بتسمعني؟ :(
.
.
صحيح أنا قلبي واجعني أوي حالياً..بسببك
بس ده مش معناه إني مش كويسة
.
.
أنا موقعتش منك عشان بهوى الوقوع
إفتكر إنك أنت اللي معرفتش تمسك إيدي كويس
.
.
الكتابة بقت توجعني..اوي..ولسه بكتب
.
.
أغبيا اللي بيكدبوا الكدبة وبيصدقوها..
وساذجين اللي بيتألموا من كدبة أخترعوها
.
.
روحك طلعت هَشَّة أوي وبتتكسر بسرعة..زي أحلامك بالظبط
.
.
أنتِ بجد مش ممكن تكوني بتفكري بطريقة طبيعية
أنتِ مبيعجبكيش حاجة أبداً..!!
.
.
كل الطرق بتؤدي إلى نفسك..ماعدا طريق واحد
شكلك دخلتي الطريق ده..
وناوية على ايه؟هتهربي ولا هتكملي وتشوفي هتوصلي فين
أنا عارفة جوابك...للأسف عارفاه
.
.
ولا مليون قصة شعر جديدة هتخرجك من حالتك ديه..
شوفيلك حلول تانية
فكري للحظة إن لسه فيه أمل..والوقت بيمسح أي حاجة وحشة
.
.
أشـــوفك على خير
أصل المجانين بس اللي بيفضلوا ماسكين بالأمل باديهم وسنانهم
أصل المجانين بس اللي بيفضلوا ماسكين بالأمل باديهم وسنانهم
وأنا مجنونة بجدارة..
أحب أحييني على سذاجتي...
.
.
يا علي..بصدقك أوي وأنت بتقول بكرة جاي أخضر
أوعى تكون بتكدب عليا ده كله..هزعل منك أوي
.
.
بعاقبني ..أوي أوي
استاهل :/
.
.
متزعلوش لو مكتبتش عنكوا
مش هعرف أكتب عنكوا غير لما نضيع من بعض
عرفتوا ليه أنا أعتزلت الكتابة؟
عشان أنا ضعت مني
بس مضيعتكوش..
.
.
قلتيلي: متخافيش ربنا مش هيضيعك...
وصدقتك اوي..عشان عمرك ما كدبتي عليا
.
.
لو كنت بكلمك..كنت هقولك تصبحي على خير
بس أنا زعلانة منك اوي..
أقصد..مني :(
