2.6.11

كل الطرق تؤدي إلى..رضوى


أقولك سر..أنا لما بخاف
بفضل أبص على كف إيدي وأقعد أعد الخطوط اللي فيها..
لما بعمل كده بفتكر الست العرافة اللي لما مسكت كفي..قالتلي:
-انتِ هتموتي صغيرة..

وأنتَ ضحكت ساعتها عليها وكمان عليا وقلتلي أنا عرافك للحظة ديه ومسكت كفي ودققت فيه بنظرتك المتأملة وقلتلي بكل جدية:..
-قدامك يا شابة طريقين طريق مسدود وألف طريق مفتوح..
وجميع الطرق بتؤدي إلى رضوى..هتاخديها مشي يا بنت الحلال أو بتوك توك..
المهم إنك هتوصلي لنفسك في الآخر طول ما أنتِ بعيدة عن الطريق المقفول..


.....

كل ما بفتكر البنت اللي كانت في المترو قد إيه كانت رقيقة وجميلة وقد إيه لما بصيتلها عرفت أقرا الحزن الرمادي جوا عنيها
كانت مجروحة أوي..فهمتها عشان ساعات ببقى مجروحة زيها
أنتَ عارف مش لازم حد بعينه يجرحك عشان تحس كده..

بس ساعات الدنيا بتعملها معاك وتديلك قلم مفاجيء من حاجات كتير مخدتش بالك منها..
لحظتها الشوكولاته اللي دايما معايا ف الشنطة كان ليها مفعول سحري..
وأنا واثقة إن الدفا بتاعها إتنقلها أول ما فتحتها وداقت أول قطمة..

..

أنا مش مجنونة..مش للدرجة يعني !!
فيها إيه لما أصحيك الساعة 4 الفجر عشان أسألك على بطلة الفيلم بتاع السهرة كان اسمها إيه عشان بنسى الأسامي بسرعة؟

أو أكلمك في عز ما أنت مشغول عشان أطلب منك تعملي سي دي عليه أغاني نيللي القديمة بتاعت الأطفال..؟

مش فاهمة أنا إيه الجنان إني آخدك ونمشي 7 محطات مترو على رجلينا لحد ما نروح ورجلي تتكسر من الكعب اللي لابساه..؟

ولا لما أقولك أنا نفسي أطير طيارة فوق البرج..ولما مسكنا ورق المذاكرة وعملناه مراكب ورميناه في النيل وفضلنا نمشي جمبه على الشط..ونشوف مين مركبته هتغرق قبل التاني ..

تصدق ممكن شوية أكون مجنونة..نصيبك كده

..

أقولك سر تاني..نفسي محسش بالحاجات جامد أوي كده..ساعتها هبطل مبالغة وهبطل أقلق بزيادة
وبالتالي مش هقلقك معايا..مبحبش اقلقك على فكرة ..


..................
على الهامش: الصورة لسوزان عليوان
والعنوان بتصرف لديوانها " كل الطرق تؤدي إلى صلاح سالم"