17.5.11

فيلم رومانسي عبيط


كل يوم أول ما بصحى بقعد مع نفسي وبحاول أفهمها واحدة واحدة ..
زي ما تيجي تعلم العيال الصغيرين حاجة جديدة عليهم
ومش سهل عقلهم الصغنتوت يستوعبها عادي زينا

بفهمها إننا خلاص كده كبرنا
مينفعش لما نتغاظ ندبدب على الأرض
ولا نجري في الشارع لمجرد إن نسمة هوا خلتنا نبتسم
ولا إنها تخاف من خسارة حد لدرجة انها تخسره إكلينيكياً.
ولا لما الضغوطات تزيد نتهرب من كل حاجة
ونجري نستخبى ونآكل شوكولا تحت السرير..

كان ممكن جداً أعملها واسيب الشغل والدراسة والبيت..
بس افتكرتك لما قلتلي إن جزء من كوننا راشدين ..هو تحمل عواقب ومسئوليات قراراتنا الخاصة
على فكرة هي اقتنعت بفكرتك بس الحاجة الوحيدة اللي مش قادرة تستوعبها
الفراق بكل صوره..وخسارة اللي بتحبهم
بقت تكره كل كلمة حد يقولها غصب عنه بتلمح للفراق
كرهت انها تشوف القطط لما كبروا وسابوا البيت من غير دوشة ونونوه مزعجة بالليل!
بتكره حتى اي اغنية تسمعها بالصدفة فيها بعاد واشتياق وخوف.
بتكره الحقايق المفزعة ديه...
معلش لسه صغيرة مسيرها هتفهم بس واحدة واحدة عليها كده.

................

تعرف نفسي ف ايه دلوقتي؟؟

نفسي أطفي كل النور اللي ف البيت..
وأتفرج على أي فيلم بس لازم يتوفر فيه 3 شروط :
إنه يكون عبيط أوي ومفيهوش فكرة (فهمت ايه فايدة الافلام العبيطة دلوقتي)
ياريت يكون رومانسي
ولازم لازم يبقى تراجيدي م اللي بيخلوا ذوي الاحساس المرهف
من أمثال سوما العاشق يموتوا من العياط..

هقعد قدام التلفزيون ع الكنبة وأتغطى وأحضن دبدوبي
وأقعد أعيط معاه..معرفش هعيط ليه يمكن الفيلم أثر فيا !
أو يمكن عشان انت مش بتتفرج عليه معايا
ولا حتى بتتريق عليا وانا مغرقة الصالة بالكلينكس وعاملالك جنينة مناديل
تفتكر كنت هبطل عياط لما أشوفك!
لو مبطلتش يبقى اكيد كنت بعيط بسبب الفيلم .

.........

ع الهامش..

-مش عاوزة أنام وأنا زعلانة وعندي حسابات كتير أصفيها مع نفسي

-مش عاوزة دوشة ولا عاوزة ضيوف تاني ولا ناس متطفلين ودائمي السؤال..وكفايا بقى تليفونات

-مكنتش عاوزة اتصل بميرو العصر عشان تيجي تقعد معايا ونذاكر اي حاجة
بس مكنش من مصلحتي ابقى لوحدي ..
(مروة..انتي زنانة اكتر من الناموس بس شكراً عشان جيتي ومأخرتيليش طلب ونزلتي معايا الجامع البعييييد صلينا المغرب وونستيني شويات..اليوم كان بايظ وانتي كنتي اول لمحة ضيّ فيه..)

-سارة ودعاء..وحشتوني اوي وبس :(

- و أخييراً شكراً اوي.. عشان من غيرك الكتابة كانت هتكسرني.. ;)