26.4.11

خبيني..


عارفة أنا نفسي في إيه
نفسي استخبى اوي..نفسي ألعب استغماية لوحدي
أكون انا اللي فيها وانا اللي بدور عليا..
عاوزة أنام ومصحاش تاني..

زي سنو وايت لما أكلت من التفاحة المسحورة

.........

نفسي اقول للناس اللي اعرفهم وبحبهم
كل اللي أنا حساه بس مش عارفة ..مبعرفش اقول حاجة
مبعرفش اعبر عن سعادتي وحبي
بعرف بس اقول اني مجروحة..

طاقة الألم والحزن هيا اللي بتحركني

........

ما تيجي نغني بصوت عالي ونضحك اووووي بهستيريا
نضحك لحد البكا ..بهستيريا لم تُشهد من قبل..
محدش هياخد باله كبيرهم هيقولوا مجانين..

واحنا اتعودنا على كده

........

هما ليه حسسوني اني صغيرة اوي كده..
في يوم هكبر اوي اوي..وهروح ادامهم واقولهم انا كبيرة
بس عمري ما هبقى وحشة
واستغل قدرتي وانتقم..مش شبهي

ممكن بس أقولك كلمة واحدة..
انتي وحشة على فكرة و شبه الساحرة الشريرة :(

.......

بص ياربنا انا مش عارفة طاقتي ع التسامح هتقدر تنسى الظلم ده ولا لأ
انا كان في ايدي قوة ومرضتش اضر حد..
اكتبهالي عندك حاجة كبيرة
عشان انت عارف انا متضايقة اد ايه

ومتكلمتش..

......

أنا عاوزة تعويذة باتروناس
هاري بوتر بالتعويذة ديه بالتحديد..
كان دايماً بيحارب الديمنتور _وده مخلوق سحري بيتغذى على الخوف والحزن _
كل اللي بيتطلبه الأمر
انه يمسك عصايته ويفكر في ذكرى سعيدة
سعيدة اوي..ويقول الكلمات السحرية..ويسيطر ع الديمنتور في ثانية

هوا أنا ليه معنديش عصاية سحرية لحد دلوقتي؟؟

.....

مستنية نجمتي..بقالها كتير غايبة راحت تجيبلي أي حاجة تفرحني
وهترجع الساعة 2 الصبح
مدياني ميعاد وبقالي كام يوم بستناها مبتجيش
مستنياها برضه مش هيأس

خد بالك منها يا قمر..ونورلها طريقها زي ما بنتورلي طريقي

......

مبسوطة عشان انت مبسوط
وعارفة انك متشوق للسفر هناك
بس انا مش عاوزة اسافر واسيب بيتنا واوضتي ولعبي وكتبي
مش هرتاح مهما كان المكان عندك حلو..بس ليه لأ
مش أنا نفسي أهرب..وكمان انت هيبقى عندك بحر.
هجرب كدهون..

......

الدنيا بقت مكركبة من كل ناحية..وكل ما اعدل حاجة
حاجتين يميلوا بدالها
نفسي انسحب من كل حاجة واهرب
بس مش هعرف المرة ديه
مضطرة أقف بكل شجاعة امتلكها وصمود

زي ما أليس واجهت الوحش في الآخر وقتلته..
لازم اقتل كل الوحوش اللي حواليا

........

أنا مش غبية وبصدق إحساسي و ديه مشكلة أحياناً
وبعرف كويس جدااااااا لما حد بيكدب عليا بس مبقولش
بسيبه فاكر نفسه ذكي

الخلاصة إني مبحبش أكون في مكان مش مكاني
عشان كده بنسحب...مينفعش ابقى مجرد (سد خانة)
يا إما أكون قد المكان اللي فيه وأبقى أحسن من أي حد
يا إما دورلك على أي كومبارس مع مرتبة الشرف

أنا مباخدش أدوار أقل من البطولة المطلقة
بس كدهون

.....


و صحيح : قبل ما انسى
فيه مكان بحبه اوي بحس فيه بنشوة غريبة كل ما اقرا حرف
بسبب بنوتة بموت فيها
وكاتبة صغنتوتة هيصدر ليها أول كتاب قريب جداً
إيثار أحمد..مبروك يا قطتي

بلوج إيثار هنا..


..

تصبحوا على خير

ليست هناك تعليقات: