19.3.11

أنا محسوبة ع الدولة مواطنة


النهارده 19 مارس 2011
أول يوم في حياتي أدخل فيه لجنة انتخابية
وأول مرة صوابعي تلمس الحبر الفوشيا اللي بحبه من قبل ما اشوفه

احساس جديد اني ليا اهمية في المكان ده
اني اقدر اقول آه أو لأ واغير قدر بلدي
شمس الحرية طلعت وكانت بتلسع اوي النهارده :D
كان يوم دافي اوي.والناس واقفة في الطابور مبسوطة

سمعت واحد من اللي كانوا في اللجنة مشرفين
بيتكلم مع واحد تاني وبيقوله ان العدد الصبح كان وصل ل 3 الاف
واحتمال يمدوا الوقت للساعة 9

عدد الناس اللي كانوا بيروحوا الاستفتاء من الصبح كبير اوي ماشاء الله
فعلا حسيت انه يوم كبير.
حاجة (عظيمة)
كل دول حسوا بالثورة فعلا عانوا من ألمها وفرحوا بفرحها .
كان نفسي الناس كلها تقول لأ
وده معناه ان افكاري لسه بيشوبها دكتاتورية

بس مش مع كل الناس
يعني صحابي اللي بيقولوا اوافق

وهما قاريين وفاهمين الابعاد كلها دول حقهم
انما الناس الغلابة اللي مش فاهمين ورايحيين يصوتوا

عشان الشيخ في المسجد يوم الجمعة قال صوتوا قولوا نعم

وعشان القسيس في الكنيسة قالهم قولوا لأ

ده اللي انا مش قادرة اتقبله
زي ما رحت التحرير وحسيت اني جزء م الكيان الشبابي هناك
حاسة دلوقتي اني جزء م الكيان المصري

كان لازم اسجل اليوم ده عشان ده اول يوم ديمقراطي حقيقي في حياتي

انا فعلا فعلا..كبرت :)

هناك 16 تعليقًا:

R-H-S يقول...

هقولك هنا تاني برضو ....معتقدش انك تميتي ال 18 سنه

ههههههههههههههههههههه
:-p

أقدم عاصمه فى الحب يقول...

السلام عليكم

تصدقى بجد .. أول يوم نمارس فيه الحريه بجد .. ولا حد بيدفع لحد رشاوى ولا حتى عسكرى واحد واقف على باب لجنه حريه حريه يعنى
ربنا إنشاء الله هيكرمنا وهيعوضنا السنين اللى فاتت دى خير بإذن الله..
ودى وإحترامى :)

ريحانة الاسلام يقول...

حمدالله على السلااااااااااامة
كان لازم ييجى اليوم اللى العالم يتغير فيه يا رضوى
الاحلام بدأت تتحقق اهى
وادينا فى بداية الطريق
... وكمان شوفتى ازاى اللون الفشية جميل
^_^
....
انا رحت اتفرج على الناس لقيت كم مهول فعلا
وكنت ماشية بضحك والناس تبصلى وتضحك
^___________^
...
الحرية ريحتها حلوة اوى

لـــولا وزهـــراء يقول...

عشان الشيخ في المسجد يوم الجمعة قال صوتوا قولوا نعم

وعشان القسيس في الكنيسة قالهم قولوا لأ


" انا مسلمة وقلت لأااااااااااااااااااااا ..ز الناس التانية اللي بتفنت الناس بقولهم هما كمان لاااااااا

"
لولا

دعاء العطار يقول...

مساء الحريه يارووودى

انا كمان فرحانه برغم التجاوزات اللى حصلت

بس بجد لاول مره احس اننا لينا قيمه

وان " انا مالى " ميقتش موجوده

مبروك عليكى الرقم القومى

انتى كبيره من زمان ع فكره بس انتى اللى مش واخده بالك

(:

طالبة مقهورة ..درجة أولى يقول...

مستر مونبه

ههههههههههه معايا بطاقة يا جهاد وخلاص عديها يعني

طالبة مقهورة ..درجة أولى يقول...

احمد

وعليكم السلام

اها مكنتش متخيلة..كنت فاكرة حبة شباب اللي هينزلوا بس متخيلتش ان العدد هيوصل للرقم القياسي ده
الحمد لله ربنا يتممها على خير

طالبة مقهورة ..درجة أولى يقول...

سارة
كنت هكلمك بس تلاقيكي نمتي
بكرة بجى ان شاء الله

:)

بس عندك حق الفوشيا جامد اوووووووي :D

طالبة مقهورة ..درجة أولى يقول...

لولا وزهراء

انا قلت لأ على فكرة كمان
مجرد وجهات نظر بس المهم مناخدهاش على محمل بالغلط
ربنا يسهل بقى ويقدم اللي فيه الخير

طالبة مقهورة ..درجة أولى يقول...

دعاء :))))))))
كومينتك فرحني اوي

ربنا يسعدك يا دودو

واخيرا هنبدأ حياه صح فعليا

شمس النهار يقول...

عارفة مبسوطة انس شوفت في اللجنة شباب كان لسه تامم ال18 امبارح

مصر اليوم في عيد الله

حَـبآيـۃْ.بـטּـدۉڷ يقول...

يَـآ بختِيكِي يارضوى ..

كَـآنْ نِفسِي بِجدْ أشهد اليُوم دَه .. :(

مَعتقدش إن حاجه زي كِده ممكن تتعوض تانِي
:(((

ايثار يقول...

يعني بتصروا تخلوني أحسدكم وأنا قلبي أبيض وبسيب الناس في حالها لكن كدة كتير اشمعنا أنا يعني هو مش أنا كمان مواطنة ولا إيه؟؟
المفروض يبقى من حق كل شخص عدا ال5 سنين يشارك
......
عمومًا يعني مع كل احساسي بالقهر دلوقتي
لكن هاجي على نفسي واقولك مبروك
وأيا كانت النتيجة المهم إن الناس شاركت وصورة الصباع الفوشيا حلوة قوي أنا بحب اللون ده:))

WINNER يقول...




" انا فعلا فعلا..كبرت :) "

طب الحمد لله
:)


جايدا العزيزي يقول...

طبعا رضوى

اجمل مافى الثورة ان بقالنا صوت

نقدر نقول نعم او لا بعلو الصوت

الحمد الله

اشكرك غاليتى على سؤالك

تحياتى

طالبة مقهورة ..درجة أولى يقول...

لكل التعليقات..
شكرا على المرور

واكيد كان يوم عيد لينا
برغم التجاوزات وبرغم كله كله

مساءكوا شوكولا