24.2.11

تنبيه: اللي جاي رغي شخصي للغاية لمجرد الشعور بأي حاجة والتصالح مع الواقع
ولهذا البوست مغلق للاصلاحات...وشكرا

.................

"هناك حماقات لا يجب ارتكابها..كأن تعلق حياتك كلها بشخص واحد اذا لم تثق به 100%
وفكرة الثقة بالاشخاص تخضع لقوانين الاحتمالات لايمكن الجزم بها أو ثباتها
تغير الاشخاص الدائم يجعل من تلك النسبة متغيرة...وفي الثقة لا مجال للمجازفة"

......

كنت بحلم بقالي 6 أيام اني انام بس 4 ساعات متواصلين..
حلم بسيط
ولما لقيت طريقة بالفعل نمت بعد صراع عنيف مع الأرق.
صحيت الساعة 7 الصبح وفضلت لمكدة 3 ساعات بدور على سبب...
سبب واحد بس يخليني أقوم من على السرير
وملقتش
مسكت الموبايل وكلمت اللي كنت محتاجاهم في ساعتها
الحقيقة اني مكنتش عاوزة أحكي
بس كنت عاوزة اسمعكوا

صوتكوا كان هيقويني عشان اقوم وامارس حياتي
عملت العكس..قلقتكوا عليا وقفلت الموبايل..أنا فعلاً مقصدتش

حاولت لمرة واحدة ف حياتي
اني في لحظة من لحظات ضعفي اكون وسط الناس..بس معرفتش
فيه ناس كده..بيزيد احساسهم سوء لما حد يهتم بيهم اوي ويقلقوه عليهم
.....

تعرف بجد..وصلت لدرجة من البلادة إني مش قادرة اتكلم
معدش حاجة فارقة معايا..حاسة اني ببص على العالم من فوق من بعيد
تفتكر أحسن اني احس بألم أو بوجع؟ احسن من مفيش أظن..

انت متخيل ان دموعي مش قادرة تنزل..لأن مفيش سبب واقعي تنزل بسببه

أنا بسببك مش عارفة أنام ولا عارفة أفرح..مش عارفة اركز ولا افهم ومش حاسة بطعم الخروج
مكنتش عاوزة أحس إن المكان الوحيد اللي حطيت فيه ثقتي
والحد اللي عمره ما خذلني...عملها جامد أوي..واللي خلاني اكتشف ده..مجرد حلم

وعشان أنا مرضتش اقتنع.. حطيت السبب ده في صندوق أسود
وخبيته في اللا شعور عندي ومرضتش اصارح حد ولا اصارح نفسي بيه

انت عارف اني هشة اوي..بس رد الفعل النابع من اللاشعور ده جديد عليا

لما آلاء يوم عيد ميلاد رغدة كلمتني بالليل..مكنتش قادرة اتكلم بس رديت
ولما لاقتها بتقولي على حاجات انا اصلا استنتجتها من غير ما حد يقولها
اتصدمت..مع اننا صحاب من زمان يعني معرفش ازاي مشفتش ديه فيا

انا مش سوسة ولا ذكية انا بحب التفاصيل وبالذات المرتبطة بالبشر

تعرف يوميها كرهت اني بعرف اكتر م اللي المفروض اعرفه
كرهت الذكاء اللي خلاني في الحالة ديه
اقتنعت فعليا ان الجهل..نعمة

وانت دلوقتي بقيت جوايا صورة مكسرة ومدشدشة وكل ما آجي اشيل ازازها اتعور
عشان كانت أول مرة اثق في حد كده..وأول مرة حد يخذلني جامد اوي كده

.......

أنا بعترف اني شخصية انطوائية عصابية..ديه حاجة مبهربش منها
بس اني مش قادرة اتكلم ولا عاوزة انزل الشارع ده ملوش علاقة بحاجة
يمكن من قلة النوم فحاسة باستسلام وان الجاذبية بتشدني لتحت للأرض
يمكن دلوقتي بقيت احسن
..


آخر حاجة فيه ناس كتير اوي في حياتي بيحبوني وانا مقدرة ده
مستر أسامة لما قمت في نص الدرس واعتذرت اني مش هقدر اكمل الحصة
مستر محمود نوار لما محضرتش الحصة ومستر عماد لما قابلني
وسمية لما اتصلت بيا..وصحابي المقربين اوي سارة ولولو وجهاد ومروة وسما وكتيير تاني
وبابا عشان كان واحشني اوي وقرر يعملي مفاجأة( اكيد عارفاها)

........
اه كمان كنت هنسى
اكتشفت اني بحب التدوين أوي وبحب ازور الناس واحط انطباعات عنهم في دماغي
برغم اني مبتكلمش ولا بتعامل مباشرة مع كتير منهم
لكن حتى التفاصيل ديه مبفوتهاش

تنهييييييييييييييدة
خلاص خلصت
سلامُ عليكوا بقى