14.2.11

حاجات أحلى بكتير من إننا نكتب عنها


السعادة..الشيء الوحيد اللي عمري ما بحسني بارعة في الكتابة عنه
يمكن عشان مبتلهمنيش قد الحزن

او مبحبش اطلعها عشان تفضل جوايا تدفيني لأكبر فترة ممكنة
يعني بجمعها في كوبايات ملونة

..
لما رحت ميدان التحرير ورجعت بالليل ميتة من التعب مسكتيني وفضلتي تسأليني هكتب عن اللي شوفته هناك بالتفصيل ولا لأ..

ساعتها قلتلك مش عارفة..
فيه حاجات بتبقى أحلى كتير أننا نكتب عنها..وحاجات برضه بتبقى مخيفة كتير لو فكرنا نعلن عنها

فيه حاجات في حياتنا كده..متعتها انها تحتفظ برونقها جوانا زي ما هيا..
لأننا مهما جبنا كلام مش هيوفيه حقها..

..

بس المرة ديه قررت انها تبقى مختلفة مختلفة تماماً عن كل مبادئي
لأنها كانت حلم من أحلام حسيت انها بعيدة في يوم

مكنتش متخيلة ان حدسي هيبقى بالقوة ديه..او ان ممكن في يوم يكون القدر مرتب نفسه بالشكل التاريخي الفظيع ده
انا مقصدش بس الثورة اللي غيرت العااااالم ومعالمه وغيرتنا وغيرتني انا بالذات 180 درجة

انا اقصد الاحداث للي جاية وهتيجي..

....

كنت مؤمنة ان كل حاجة بتحصل لسبب..وان كل حاجة ليها توقيتها المناسب

والتوقيت ده بييجي لما يكون اللي هيحصل على نفس المستوى اللي حلمنا بيه

وفي الوقت المناسب ده بس الواقع بيكون أحلى من الحلم



.........
دلوقتي بس أقدر أحلم من غير خوف
الحمد لله يارب..بردك دايماً على قد الغطا
الحمد لله
انت كبير اوووووووي

.....

نداء إلى جميع المدونين:

وحشتوني جدا :)

هناك 8 تعليقات:

Silver Eyes يقول...

أنا دايما باجى هنا عشان حاجات كتير ....
بس بستمتع وبمشى
مش بسيب كومنت او يمكن مبعرفش ..

..
بس وحشنى وجودك هنا :)
(f)

Ramy يقول...

أنتِ كمان وحشتينا

البلوج كله وحشنى بجد
..............................
صحيح قبل ما أنسى انا قريت البوست من التعليقات
البوست فى حاجة غلط
.............
ممكن تكون وجهة نظرك حقيقية

يمكن انا روحت كذا يوم بس كُنت حزين فعلاً انى مروحتش أول خمس أيام
بس مش عارف ليه انى حاسس بالذنب

مش عارف ليه

يمكن انى مكنتش مع الناس اللى ماتت و اللى اتعورت و حتى لوكنت قدرت أعمل حاجة اكبر

مش عارف ليه محسس نفسى بذنب كبير قوى

بس بصلى بقى ان اللى جى يكون ربنا معانا فيه علشان هيكون أصعب من اللى فات

.............

مبسوط انى قريت تدوينة عندك
علشان اقول كل فالنتين و انتى طيبة

و كل سنة و انتى طيبة بمناسبة مولد النبى

ELMOSTAFZ يقول...

السعادة..الشيء الوحيد اللي عمري ما بحسني بارعة في الكتابة عنه
يمكن عشان مبتلهمنيش قد الحزن
او مبحبش اطلعها عشان تفضل جوايا تدفيني لأكبر فترة ممكنةيعني بجمعها في كوبايات ملونة
..
__________________________________
الجزء ده عجبني أوي ، فعلا كتير بحس ان الحزن أعمق بكتير من السعادة...
و بالنسبة لفرحتي وقت اعلان التنحي ، فعلا مكنتش عارف اعبر عنها ازاي ، جايز لإنها فرحة من نوع جديد عليا ، فرحة اليوم ده تتحس بس متتوصفش بالكلام...

ريحانة الاسلام يقول...

مش عارفة اكتب ولا اقول ايه
..
زى ما قلتى فى حاجات بتفتضل جوانا محتفظة برونقها
..
وانا هحوش كل الكلام عشان اقولهولك مرة واحدة
رغم انك عارفة كل حاجة ..^___^
...
يااااااااااااااااارب

طالبة مقهورة ..درجة أولى يقول...

سارة

:)
انا عارفة انك بتيجي كتير
وده بيسعدني جدا
مش مهم انك تعلقي المهم انك تنبسطي

ربنا يعزك يارب

طالبة مقهورة ..درجة أولى يقول...

رامي..

وانا كمان جدااااااااا:)


ما انا عارفة ان فيه مشكلة في كل بلوجاتي
بس مش عند كل الناس المشكلة ديه
وانا مش عارفة ايه السبب
وواحد قالي انه عيب في الموقع نفسه مش ف البلوج!!

عموما شكرا انك حاولت وقريت برضه

تعرف اني حسيت نفس الاحساس
عشان كده عاندت وحاربت كل لالي ف البيت ونزلت غصب عنهم وهما رافضين ده
بس لما رجعت عرفوا اني كان عندي حق
ربنا يرحم جميع الشهدا يارب

وانت طيب يا رامي ميرسي اوي :)

طالبة مقهورة ..درجة أولى يقول...

المستفز

بالفعل الحزن بيسحب مننا الطاقة
فمش بنلاقي غير حاجات بسيطة نعبر بيها زي الكتابة

كل الناس حست بالفرحة ديه..ده معناه نجاحنا اخيرا
شكرا لمرورك

طالبة مقهورة ..درجة أولى يقول...

سيررررروز
بطلة البوست :)

يارب يا سارة يارب