يوم...

القهوة كانت سادة ومرة أوي..بس الجو كان حلو ومظبوط.. لا هو شتا اوي ولا حر اوي..

الشمس كانت طالعة صافية ورايقة ..والهوا كان يرد الروح..

الناس كانوا ماشيين من غير هدف رايحيين لأماكن كتير في كل ناحية ..

ناس راكبين عربيات ملونة بألوان قوس قزح...وناس ماشين على وشوشهم ابتسامات صغيرة..

وكان فيه ورد كتير في بلكونات الجيران برغم الشتا..والشجر اللي قدام البيت ورقه مغسول من المطرة..

كل حاجة كانت بيرفكت..وصوت منير كان بيطاردني من كل مكان 

الغنوة من قلبنا من قلب قلب الروح

نصبر على جرحنا كل الجروح هتروح

الموسيقى كانت ملت الدنيا

وصوت العصافير كان فرحان..فرحان اوي..

ممكن تقولي ازاي بعد ده كله

 عاوزني استوعب انك مت زي النهارده من سنة؟؟