18.1.11

رغي مع كوباية لبن

هفتح الكومينتس بس اعذروني لو مردتش عليها..وارجو الابتعاد عن الكومينتات المثيرة للشلل..ولو معرفتش تقول حاجة أو كسلت تكمل قراية حط سمايل وامشي ...كدهون :) :) :)

آخر مرة كنت معاها في المستشفى..
عملت حاجات كنت بخاف منها وكنت فاكرة اني عمري ما هقدر اعملها
ولما هي لاقتني بسطانة بزيادة وانا بحكيلها عن اللي عملته


قالتلي: ربنا خلق البنات كده
فيهم قوة مش موجودة في الرجالة مجتمعين..
خلقهم بحواس داخلية وغرائز

خلقهم بيمسكوا في الحياة أول ما يتولدوا مهما كانت حالتهم صعبة

طول حياتنا بنسمع عن بنات لسه مولودة قبل ميعادهم 
والدكاترة بيرجحوا موتهم بس هما بيكافحوا ويعافروا
ويبقوا كويسين ويعيشوا حياة طبيعية

مصدقتهاش..كنت ببساطة متخيلة البنات
كائنات رقيقة وهشة للغاية
بتتظاهر بالقوة لاخفاء ضعف كامن جواها

دلوقتي بس صدقتك..في 3 أيام بس غيرت رأيي..
البنات أقوياء اوي
ربنا خلقنا كده..وانتِ ربتيني على كده
في المواقف الصعبة بيبان..
في اكتر وقت المفروض نقع فيه بنقف أحسن من أي راجل

...............

جدو على طول كان بيقولك ان ربنا بيدي البرد على أد الغطا
وانتي على طول بتقوليلي الجملة ديه

الحمد لله يارب انت مديني غطا كبير اوي
ممكن ديه تكون من أقوى التجارب اللي حطتني فيها
والحمد لله عشان خلتني آخد بالي من مشكلة كبيرة فيا..
مشكلة ظهرت مع احتياجي لناس حواليا

عشان كده بقولك بكل ثقة أنا آسفة يارب
آسفة...عشان عاملت الناس معاملتكش انت
عشان قلت (انا استحق اكتر من كده) لمخلوق بشري
انا مستحقش اكتر..
ولو استحق انت عادل هتديني حقي بالكامل  
كنت فاكراه حق مشروع ان الناس تعاملني
زي ما انا بتعامل معاهم 
تديني اللي محتاجاه من غير ما اطلبه..
تشغل ذكائها شوية

كنت فاكرة ان القريبين مني
لازم يبقوا معايا زي ما انا مبتأخرش عليهم
كده غلط...عمري ما قارنت نفسي بحد..
عشان كده أنا آسفة يارب


بس برضه تعرف ظهرلي اللي بيهتموا بجد..
واللي بيسمعوا بجد وبيفهموا صح
اللي واثقة جدا انهم مش هيخذلوني
لو صحيتهم في نص الليل أو في آخره
بسبب نوبة فزع أو حلم وحش
على اساس اني ممكن اعمل كده مثلا :)

...........

سارة كانت بتسألني ايه سبب التفاؤل
اللي جالي فجأة ده أول الأسبوع..ومكنتش عارفة ليه
بس دلوقتي فهمت..
هقولك يا سارة الحكمة اللي شوفتها الجزء البسيط اللي اقدر اشوفه
وفيه جزء تاني عجزي كانسانة هيمنعني افهمه

كان لازم ربنا يأهلني لباقي الأسبوع  للاختبارات ديه كلها
كان لازم يديني أمل..والأمل يديني قوة
الحمد لله ..مكنتش عارفة انها خطتك ليا
وانه قدري علشان اصبر
وعشان استقبل كل المواضيع بهدوء أقل من حدتي في العادة

..................

انا مش مضايقة اني لوحدي ..اني بنام وبقوم لوحدي في البيت..
انا بطبعي مستقلة ومبخفش من الوحدة المادية..مش هشيلكوا همي أبداً

انا بس  كنت متضايقة عشان السمك
مكنش راضي ياكل مني أول يوم..خفت يموت بسببي
ماما مش هنا تأكله ..وهم مش متعودين عليا

وكمان كنت متضايقة عشان محدش بيطمني
كل ما اتصل عشان الاقي معلومة تطمني بيجيلي نفس الرد..الحمد لله
هوا الحمد لله طبعا..بس انا عاوزة اطمن..

.......
حاسة احساس غريب..قلق وهدوء في نفس الوقت..لأ انا تقريبا مش حاسة
بقيت سفنجة..بمتص اي صدمة واعصرني في آخر اليوم

أنا بشرب لبن متلج..مش عشان انا مكتئبة..
بس عشان مش لاقية حاجة تانية اعملها

عشان لو ماما كانت هنا في البرد ده كانت هتعملي سحلب
وأنا مش بعرف السحلب ده بيعملوه ازاي
كده يا ماما نسيتي تعلميهولي
ينفع كده تشربيني لبن وانا مش مكتئبة؟ :(

...........
مفيش حاجة الحمد لله 
كله هيبقى تمام ..واللي وقفوا معايا مش ناسياهالهم بجد
واللي ببساطة (عارفين هما عملوا ايه)..شكرا انا مش زعلانة 
بس وعد مش هطلب منكوا اي حاجة في حياتي..ولا هتوقع حاجة
أنا عملت اللي عليا عشان خاطر ربنا..
بس انتوا معملتوش اي حاجة عليكوا
ومديتونيش اسباب عشان اسامح..

وبس كده ..هقوم انام واذاكر علم النفس الصبح..
اشك اني هلحق أخلصه على معاد الدرس بس لسه راجعة من بره ومرهقة جدا
بس عادي مش مهم لو ملحقتش..
كمان ناقصلي فيزيكس كتير ورياضة فوق مما اتخيل..
هتصرف كالعادة ان شاء الله

تصبحوا على خير او صباح الخير (على حسب التوقيت الشخصي)